CESTRAR yasabiye ubuvugizi abakozi batazashobora kwishyura ubukode n’inguzanyo z’amabanki

Yanditswe na Nkurunziza Ferdinand
Kuya 8 Mata 2020 saa 06:31
Yasuwe :
0 0

Urugaga rw’Amasendika y’Abakozi mu Rwanda “CESTRAR” rwasabye Guverinoma gukorera ubuvugizi abakozi bakomeje gutakaza imirimo ya bo muri iki gihe cya Coronavirus, bakazoroherezwa uburyo bwo kwishyura nyuma y’ibihe bikomeye byugarije u Rwanda n’Isi muri rusange.

Ubuyobozi bwa CESTRAR buvuga ko ihagarara ry’ibikorwa n’imirimo ibyara inyungu muri gahunda yo gukumira ikwirakwira rya Coronavirus, byatumye hari bamwe mu bakoresha batangiye guhagarika by’agateganyo amasezerano y’akazi bari bafitanye n’abakozi.

Hari n’abandi bashyize abakozi mu kiruhuko gishingiye ku mpamvu z’ubukungu cyangwa iza tekinike, cyangwa bakabashyira mu kiruhuko cy’umwaka ku ngufu.

Itangazo ryasohowe na CESTRAR riragira riti "CESTRAR ihanganyikishijwe n’ibikorwa nk’ibi kuko aho gufasha inzego zose z’igihugu guhangana n’ingaruka z’iki cyorezo, ibikorwa nk’ibi byongera umubare w’abagirwaho ingaruka zikomeye cyane kuko bikorwa hatubahirijwe inzira ziteganywa n’amategeko agenga umurimo mu Rwanda."

CESTRAR isaba ko hakorwa ubuvugizi ku bakozi bashobora kutazabona uko bishyura ubukode n’inguzanyo z’amabanki kuri gahunda yari isanzweho kubera gutakaza akazi ka bo.

Uru rugaga ruherutse gusohora itangazo rusaba Guverinoma guteganya ikigega cyihariye cyazagoboka ibigo bito n’ibiciriritse byaba byaragizweho ingaruka n’icyorezo cya COVID-19 kuzashobora kongera gukora neza hagamijwe kuzamura ubukungu kandi abakozi ntibatakaze imirimo n’imishahara yabo.

Amwe mu mabanki aherutse gufata icyemezo cyo kongera igihe cyo kwishyura inguzanyo ku bakiliya bayo no guhagarika inyungu zaterwa n’ubukererwe bwo kwishyura.

CESTRAR ivuga ko ishishikariza n’abandi gufata icyo cyemezo kigamije gushyira hamwe imbaraga hagamijwe guhangana n’ingaruka za COVID-19.

Ubuyobozi bw’uru rugaga bwanashimiye abayobozi bakuru b’igihugu batanze urugero rwiza bakigomwa umushahara wabo w’ukwezi kwa Mata 2020, bunasaba ko umukozi wese ufite ubushobozi kandi wifuza kugira icyo atanga ku bushake bwe, yashyirirwaho ubwo buryo akunganira gahunda ya leta yo gufasha abagezweho n’ingaruka z’iki cyorezo.

CESTRAR yasabye Minisiteri y’Abakozi ba Leta n’Umurimo by’umwihariko, gushyiraho amabwiriza yihariye yafasha abakozi n’abakoresha kugira umurongo bagenderaho muri ibi bihe bidasanzwe kugira ngo iri hagarikwa ry’abakozi ryatangiye ridakomeza gufata indi ntera.

Yakomeje iri "Hakwiye kwimakazwa umuco w’ibiganiro hagati y’abakoresha n’abahagarariye abakozi (sendika n’intumwa z’abakozi) hagashakwa ingamba zinogeye impande zose zirebwa n’iki kibazo.’’

Urugaga rw’Amasendika y’Abakozi mu Rwanda rushima ingamba zinyuranye zagiye zifatwa na Guverinoma mu gihe gikwiye kandi zigashobora gushyirwa mu bikorwa hagamijwe gukumira ikwirakwizwa rya COVID–19 mu Rwanda.

Mu ngamba zafashwe zirimo kuguma mu rugo no gukorera akazi mu rugo hifashishijwe ikoranabuhanga aho bishoboka.

Imirimo imwe n’imwe yarahagaze, abakozi benshi biganjemo abakora imirimo itanditse bitewe n’imiterere yayo ntibashoboye kongera gukora, mu gihe nyamara ifunguro ryabo rya buri munsi barikeshaga umubyizi bakoze.

CESTRAR ishima cyane gahunda ya Guverinoma yo gutanga ibiribwa n’ibindi bikoresho by’ibanze ku baturage badafite ubushobozi, harimo n’abo bakozi bakora imirimo itanditse ngo bashobore kubaho mu gihe imirimo itarasubukurwa.

CESTRAR yasabiye ubuvugizi abakozi batazashobora kwishyura ubukode n’inguzanyo z’amabanki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .