Cassien Ntamuhanga watorotse gereza biravugwa ko yagizwe Umuvugizi wa RNC

Yanditswe na Musangwa Arthur
Kuya 3 Ugushyingo 2019 saa 02:37
Yasuwe :
0 0

Ntamuhanga Cassien watorotse gereza ya Nyanza biravugwa ko yagizwe Umuvugizi w’Umutwe w’Iterabwoba wa RNC ugamije guhungabanya umutekano w’u Rwanda, asimbuye Turayishimye Jean Paul uheruka kwegura.

Ntamuhanga wari umunyamakuru wa Radiyo Ubuntu butangaje (Amazing Grace) yaregwaga hamwe na Jean Paul Dukuzumuremyi, Agnes Niyibizi na Kizito Mihigo.

Yahanishijwe igifungo cy’imyaka 25 ku cyaha cyo kugambirira kugirira nabi umukuru w’igihugu, kuko ari cyo gihano kiruta ibindi mu byo yahamijwe.

Yanahamijwe ibyaha bitatu ari byo kurema umutwe w’abagizi ba nabi, aho kuba gufasha kurema umutwe w’abagizi ba nabi nk’uko Ubushinjacyaha bwabimushinjaga, ahamwa kandi n’icyaha cyo gucura umugambi w’ibikorwa by’iterabwoba, ahanagurwaho icyaha cyo gucura umugambi w’ubwicanyi.

Mu ijoro rishyira ku wa 31 Ukwakira 2017, nibwo Ntamuhanga yatorotse Gereza ya Nyanza; kuva icyo gihe yakunze kumvikana yigamba ko yatorotse ubutabera bw’u Rwanda.

Ntamuhanga wakatiwe imyaka 25 muri Gashyantare 2015 yatorotse nyuma y’imyaka isaga ibiri ari muri gereza.

Amakuru IGIHE ifite ni uko Ntamuhanga agiye kugirwa Umuvugizi wa RNC ya Kayumba Nyamwasa. Umwanya w’Ubuvugizi agiye kuwusimburaho Turayishimye uheruka kwegura kubera urusobe rw’ibibazo byugarije RNC ku isonga birimo icy’iburirwa irengero rya Ben Rutabana, umwe mu bayoboke bawo.

Ubwegure bwa Turayishimye bwatangajwe na Gervais Condo usanzwe ari Umunyamabanga Mukuru wa RNC mu nyandiko yashyize ahagaragara ku wa 24 Ukwakira 2019. Nta mpamvu n’imwe yatangajwe y’icyaba cyatumye ava kuri iyi mirimo.

Turayishimiye utuye i Boston muri Leta Zunze Ubumwe za Amerika bivugwa ko yari we cyegera cya hafi cya Kayumba Nyamwasa, Umuyobozi Mukuru wa RNC utuye muri Afurika y’Epfo aho yahungiye ubutabera.

Afite uruhushya rwa burundu rwo gutura muri Amerika, ni umwe mu bikomerezwa bya RNC akaba umucurabwenge w’uwo mutwe haba mu migambi yo gutegura ibitero, muri make azwi nk’umuyobozi ukuriye Ubutasi.

Turayishimiye avugwaho kuba umwe mu bacurabwenge b’ibitero bya gerenade byahitanye inzirakarengane ndetse no kuba mu migambi mibisha igamije kwibasira u Rwanda.

Turayishimye we aregwa kugira uruhare mu bitero by’iterabwoba byabaye hagati ya 2010-2014 mu Rwanda byahitanye abantu 17 abandi benshi bagakomereka.

Bivugwa kandi ko Turayishimiye yari yategetse ibyitso bya RNC i Kigali kumukusanyiriza amakuru yose ku bikorwaremezo nk’ibiraro n’ahandi muri Kigali kugira ngo bizagabweho igitero rimwe, bituritswe mu gihe cy’amatora ya 2017.

Uyu yanavuzwe mu rubanza rw’abo kwa Rwigara, aho Perezida w’Urukiko Rukuru yanamuhamagaje we na Thabita Gwiza, Mukangarambe Xaverine, Mushayija Edmond bakunze kwita Sacyanwa.

Turayishimiye yavuye ku mwanya wo kuvugira RNC mu gihe uyu mutwe wisuganyaga ngo utangize radio muri Uganda, byanatumye Ndayizeye Serge ashyiraho amananiza asaba gukubirwa umushahara cyangwa akareka kuyobora Radio Itahuka ikorera kuri internet.

Ntamuhanga bivugwa yamaze kugera muri Uganda akaba arimo no gushakirwa ibyangombwa bigenewe impunzi bitangwa na HCR.

Turayishimye na Ntamuhanga ugiye kumusimbura bakurikiranyweho ibyaha by’iterabwoba byakozwe mu bihe bitandukanye.

Ntamuhanga yatorotse ubutabera atarasoza igihano yahawe. Amategeko ahana y’u Rwanda agena ko umuntu wese utoroka yarakatiwe ahanishwa igihano gikubye inshuro ebyiri igihano yari asigaje.

Turayishimye we Ubushinjacyaha bw’u Rwanda bwashyizeho impapuro zisaba Leta Zunze Ubumwe za Amerika kumuta muri yombi.

-  Indi nkuru wasoma: Umwiryane, gucikamo ibice n’umuvumba w’amarira; ibyaranze imyaka 8 RNC imaze ishinzwe

Jean Paul Turayishimiye uheruka kwegura ku mwanya w'Umuvugizi wa RNC agiye gusimbuzwa
Ntamuhanga wari umunyamakuru wa Radiyo Ubuntu butangaje (Amazing Grace) watorotse ubutabera agiye kugirwa Umuvugizi wa RNC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .