00:00:00 IGIHE NETWORK KN KINYARWANDA EN ENGLISH FR FRANCAIS

Byagoye uwahoze ari umuvugabutumwa gusobanura uburyo yinjijwe muri FDLR ku gahato

Yanditswe na Prudence Kwizera
Kuya 21 Ukuboza 2022 saa 05:03
Yasuwe :

Abagabo batandatu bahoze mu mutwe w’iterabwoba wa FDLR urwanya u Rwanda ukorera mu mashyamba ya Repubulika Iharanira Demokarasi ya Congo, kuri uyu wa Gatatu bakomeje kwiregura ku byaha baregwa birimo iterabwoba.

Bisobanuye imbere y’Urukiko Rukuru rw’Urugereko Ruburanisha Ibyaha Mpuzamahanga n’Ibyambukiranya Imipaka ruri i Nyanza mu Majyepfo y’u Rwanda.

Kuri uyu wa 21 Ukuboza 2022 hisobanuye Habimana Emmanuel na Mpakaniye Emilien kuko bagenzi babo bo bahawe umwanya mu maburanisha aheruka.

Ku wa 30 Ugushyingo 2022 hisonanuye Gen Mujyambere Leopold alias Musenyeri na Col. Ruzindana Félicien naho ku munsi wawubanjirije hisobanuye Habyarimana Joseph alias Sophonie Mucebo na Habimana Marc.

Kuri uyu wa Gatatu tariki ya 21 Ukuboza 2022 hireguye Mpakaniye Emilien na Habimana Emmanuel.

Kimwe na bagenzi babo bane babanje, nabo bireguye bavuga ko binjijwe muri FDLR ku ngufu bahitamo kubyemera barengera ubuzima bwabo kugira ngo baticwa.

Hatangiye kwiregura Mpakaniye Emilien, avuga ko avuka mu Karere ka Karongi mu Ntara y’Iburengerazuba.

Yavuze ko mu 1998 yari umuvugabutumwa mu itorero ADEPR akanaririmba muri korali. Icyo gihe ngo abarwanyi ba FDLR bari abaracengeye mu Rwanda bamufashe ari hamwe n’abandi basore n’abagabo babinjiza mu mutwe wabo ku ngufu.

Yavuze ko yemeye kujya muri uwo mutwe w’iterabwoba kugira ngo arengere amagara ye.

Yasobanuye ko yashinzwe imirimo itandukanye irimo kurinda abasivile n’abari abayobozi babo no guhuza ibikorwa bya gisivile n’ibya gisirikare.

Mpakaniye yabwiye urukiko ko nk’umuntu wari warize iby’ubuhinzi, muri FDLR yahawe n’inshingano zo gushishikariza abaturage n’abasirikare guhinga kugira ngo bajye babona ibibatunga.

Uyu mugabo wari ufite ipeti rya Lt Colonel muri FDLR , yavuze mu 2014 yarwaye ndetse mu 2018 birakomera biba ngombwa ko yandika asezera ariko baramwangira.

Mu 2019 yafashwe n’Ingabo za DRC zimwohereza mu Rwanda.

Habimana Emmanuel wari ufite ipeti rya Lt Colonel ni we wakurikiyeho mu kwisobanura maze na we abwira urukiko ko yinjijwe muri FDLR ku ngufu.

Yavuze ko mu 1998 abo mu muryango we bishwe, we arahunga ageze mu nzira ahura n’abacengezi ba FDLR mu nzira baramufata abamubwira ko agomba kuba umurwanyi wabo, arabyemera kugira ngo batamwica.

Kimwe na mugenzi we wamubanjirije kwisobanura, Habimana yavuze ko yahuye n’uburwayi ariko we arwara umugongo ku buryo atabasha kugenda aticumbye ikibando.

Yabwiye urukiko ko yigeze gushaka gutaha mu Rwanda ariko abanza kohereza umugore n’abana, gusa ngo abayobozi ba FDLR barabimenye ahabwa ibihano bikomeye.

Yavuze ko yagerageje gutoroka ngo atahe mu Rwanda ariko arafatwa bihurirana n’uko byamenyekanye ko yohereje umugore we n’abana, ahabwa igihano cyo gukubitwa inkoni 300 ariko bamukubita 200 asigaramo ideni ryo kuzakubitwa izindi 100.

Yatakambiye urukiko arwumvisha ko yagiye mu mutwe w’iterabwoba urwanya u Rwanda atabishaka, avuga ko akunda u Rwanda kuko yafashe n’umwanzuro wo kurwoherezamo umugore we n’abana.

Mu 2019 yafatiwe mu Mujyi wa Goma n’igisirikare cya DRC yoherezwa mu Rwanda.

Abaregwa bose uko ari batandatu bisobanura mu mujyo umwe babwira urukiko ko binjijwe muri FDLR batabishaka, bakaba barabyemeye kugira ngo barengere amagara yabo.

Bagowe no kumvisha urukiko ukuntu batagize uruhare mu bitero byagiye bigabwa mu Rwanda n’ahandi kandi bari abayobozi muri FDLR,.

Bose baregwa kurema umutwe w’ingabo utemewe, kuba mu mutwe w’iterabwoba n’ubugambanyi bugamije kugirira nabi ubutegetsi buriho mu Rwanda.

Aba ni bamwe mu bahoze muri FDLR bari kuburanishirizwa i Nyanza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .