Buri mwaka mu Rwanda haboneka ibisigazwa by’ibikoresho by’ikoranabuhanga bigera kuri toni ibihumbi 15

Yanditswe na Prudence Kwizera
Kuya 11 Nzeri 2020 saa 07:25
Yasuwe :
0 0

Ubushakashatsi buheruka gukorwa n’Ikigo cyitwa Enviroserve gishinzwe kubungabunga ibikoresho by’ikoranabuhanga byashaje n’ibitagikoreshwa bugaragaza ko buri mwaka ibishingwe bikomoka ku ikoranabuhanga mu Rwanda byiyongera kandi ibihugu byinshi bitashyizeho uburyo bwo kubibyaza umusaruro.

Ubwiyongere bw’ibishingwe biva mu bikoresho by’ikoranabuhanga bugira ingaruka zitandukanye zirimo indwara z’ubuhumekero na Cancer ndetse no kwangiza ibidukikje.

Umuyobozi wa Enviroserve, Mbera Olivier, yavuze ko mu Rwanda batangije uburyo bwo gukusanya ibikoresho by’ikoranabuhanga bitandukanye kugira ngo bakumire izo ngaruka biteza ku buzima bwa muntu n’ibindi binyabuzima.

Ati “Mu gihugu cyacu twakoze ubushakashatsi dusanga buri mwaka nibura hagati ya toni ibihumbi 10 na toni ibihumbi 15 bihinduka imyanda, murumva ko ni ibintu byinshi, (…) kandi bigenda byiyongera.”

Mbera yasobanuye ko ahanini usanga mu ngo bajugunya aho babonye ibikoresho by’ikoranabuhanga byashaje birimo radiyo n’amabuye yazo, televiziyo, ibyuma n’ibindi bitabora ugasanga biteje ingaruka zitandukanye.

Ati “Ibyo bikoresho bigomba kubungwabungwa kuko birimo ubumara bushobora kwangiza ibidukikije kuko bujya mu butaka cyangwa mu mazi, umuntu yahingamo ibihingwa bikazamukiramo cyangwa mu mazi umuntu yayanywa ugasanga byateye cancer cyangwa izindi ndwara z’ubuhumekero.”

Yavuze ko kuri ubu bamaze gutangiza uruganda mu Bugesera rufasha gutunganya ibyo byuma by’ikoranabuhanga kugira byongere bibyazwe umusaruro aho guteza ingaruka.

Kuri ubu muri Bugesera, Kigali, Musanze, Nyanza na Huye hamaze gushyirwa amakusanyirizo y’ibyuma by’ikoranabuganga byashaje n’ibitagikoreshwa kugira ngo abantu bajye babona aho babishyira.

Intego ni uko uyu mwaka wa 2020 uzarangira muri buri karere hari ikusanyirizo ryabyo.

Kugira ngo intego bihaye igerweho hateguwe amahugurwa y’abantu bakora akazi kagira aho gahurira n’ibikoresho by’ikoranabuhanga (abatekinisiye) barimo abasana radiyo, televiziyo, telefoni n’ibindi kugira ngo batange umusanzu wabo mu gushishikariza abaturage gushyira ibyo byuma ahabugenewe aho kubijugunyaaho babonye.
Kuri iyi nshuro ayo mahugurwa yabereye mu Ntara y’Amajyepfo mu gihe cy’iminsi ine, aho hahuguwe abagera kuri 30 baturutse mu turere twose tuyigize.

Umwe muri bo witwa Nyantabana Alphonse yavuze ko akora akazi ko gusana radiyo n’ibindi bikoresho by’ikoranabuhanga ariko bari bafite ikibazo cyo kubona aho bajugunya ibyabaye imyanda.

Ati “Hari ukuntu twafataga ibikoresho bitagikoreshwa tukabibika mu nzu ugasanga tubijugunya mu murima aho tubonye tutazi ko bishobora kutwangiza. Twabijugunyaga aho tubonye kuko twari twarabuze ahantu twabishyira ariko ubwo habonetse ikibazo kirakemutse.”

Ubushakashatsi bwerekana ko ku Isi ibishingwe byiyongera cyane kurusha ibindi ari iby’ikoranabuhanga kuko buri mwaka hakusanywa ibirenga miliyari 50.

Mu bihugu birimo Ghana, ubushakashatsi bwerekanye ko kujugunya ibyuma by’ikoranabuhanga ahabonetse hose bigira uruhare mu bwiyongere w’abarwara cancer ku kigero kirenga 20%.

Umuyobozi ushinzwe Ikoranabuhanga mu Rwego Ngenzuramikorere (RURA), Gahungu Charles, yavuze ko bashaka ko Abanyarwanda bagira umuco wo gushyira imyanda yose ahabugenewe aho kuyijugunya aho babonye.

Ati “Nk’uko twamaze kubigira umuco ukaba udashobora kugenda mu muhanda ngo ujugunye agacupa aho ubonye kuko ugashyira ahabugenewe, no ku bikoresho by’ikoranabuhanga bibe bityo niba ufite igikoresho cyashaje kijyanye ku ikusanyirizo ahabugenewe.”

Umuyobozi wungirije ushinzwe Iterambere ry’Ubukungu mu Karere ka Huye, Kamana André, yavuze ko ubwo habonetse ikusanyirizo ry’ibikoresho by’ikoranabuhanga byashaje n’ibitagikoreshwa, hagiye gukurikiraho kubishishikariza abaturage kugira ngo bariyoboke.

Hasobanuwe ko mu bikoresho by’ikoranabuhanga bizajya bizanwa ku ikusanyirizo ryabyo, ibifite agaciro bishobora kubyazwa umusaruro bizajya bigurwa ku giciro cyumvikanyweho. Ibizajya bigurwa birimo ibyumba, bateri z’imodoka na telefoni, mudasobwa, telefoni n’ibindi.

Kuva hatangizwa uburyo bwo gukusanya imyanda y’ikoranabuganga mu Rwanda, hamaze gukusanywa ibikoresho byinshi byiganjemo ibyuma ndetse bimwe byabyajwe umusaruro kuko hari mudasobwa zigera ku bihumbi bibiri zanaguwe zongera kuba nzima.

Kuri iyi nshuro mu Ntara y’Amajyepfo mu gihe cy’iminsi ine hahuguwe abagera kuri 30 baturutse mu turere twose tuyigize
Hasobanuwe ko mu bikoresho by’ikoranabuhanga bizajya bijyanwa ku ikusanyirizo ryabyo, ibifite agaciro bishobora kubyazwa umusaruro bigurwe
Havuzwe ko ubushakashatsi bwerekana ko ku Isi ibishingwe byiyongera cyane kurusha ibindi ari iby’ikoranabuhanga kuko buri mwaka hakusanywa ibirenga miliyari 50
Ikusanyirizo ry'ibikoresho by'ikoranabuhanga byashaje ryashyizwe mu Murenge wa Ngoma mu Karere ka Huye
Abahawe amahugurwa bavuze ko bishimiye ko habonetse aho bazajya bajyana ibikoresho by'ikoranabuhanga batagikeneye
Abaturage bitabiriye icyo gikorwa basabwe kugira umuco wo gushyira imyanda ahabugenewe aho kuyijugunya aho babonye
Buri wese arasabwa gutanga umusanzu mu gukumira ko ibishingwe by'ikoranabuhanga byangiza ibidukikije
Umuyobozi ushinzwe Ikoranabuhanga mu Rwego Ngenzuramikorere (RURA), Gahungu Charles, yavuze ko bashaka ko Abanyarwanda bagira umuco wo gushyira imyanda yose ahabugenewe
Umuyobozi wa Enviroserve, Mbera Olivier, yavuze ko mu Rwanda batangije uburyo bwo gukusanya ibikoresho by’ikoranabuhanga bitandukanye kugira ngo bakumire ingaruka biteza
Umuyobozi wungirije ushinzwe Iterambere ry’Ubukungu mu Karere ka Huye, Kamana André, yavuze ko ubwo habonetse ikusanyirizo ry’ibikoresho by’ikoranabuhanga byashaje n’ibitagikoreshwa, hagiye gukurikiraho kubishishikariza abaturage kugira ngo bariyoboke

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .