Bugesera: Hagaragajwe imbogamizi mu kwirinda Coronavirus zirimo iz’amazi adahagije

Yanditswe na Evariste Nsengimana
Kuya 2 Nyakanga 2020 saa 09:27
Yasuwe :
0 0

Abaturage bo mu Karere ka Bugesera bavuga ko bafite imbogamizi mu kubahiriza amabwiriza yo kwirinda no gukumira COVID-19 zirimo kuba aho batuye batabona amazi ahagije, abandi bakaba bafite imyumvire ishobora kubongerera ibyago byo kwandura iki cyorezo gihangayikishije u Rwanda n’Isi muri rusange.

Iki cyorezo cyagaragaje bwa mbere mu Bushinwa mu mpera za 2019 ariko kikaba kimaze gukwira ku Isi hose, kugeza ubu nta muti cyangwa urukingo kirabonerwa.

Abaturarwanda basabwa gukomeza kubahiriza amabwiriza hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi n’ibindi.

Gusa bamwe mu batuye mu Bugesera bavuga ko ibice bimwe na bimwe bikagize bagorwa no kubona amazi, bikababera imbogamizi mu kubahiriza aya mabwiriza ndetse ko usanga benshi batarumva neza akamaro ko kwambara agapfukamunwa.

Bamwe mu baganiriye na IGIHE bavuga ko bakora urugendo rurerure bajya kuvoma amazi ku buryo ayo babonye bayakoresha bayarondereza.

Munyemana Ladislas wo mu Murenge wa Rweru yagize ati “Ikijyanye no kugira isuku mu kwirinda Coronavirus batubwira ko ari ugukaraba intoki kenshi gashoboka kandi ni nabyiza ariko usanga tugira ikibazo cy’amazi tuvoma kure, n’uyabonye akagerageze kuyarondereza ngo adashira. Urumva rero ko ari ikibazo, ubuyobozi bukwiriye kudufasha bukatwegereza amazi.”

Nyiramana Domina yavuze ko ikibazo cy’amazi mu bice bitandukanye by’Akarere ka Bugesera gihangayikishije, cyane cyane muri ibi bihe Abanyarwanda basabwa kongera isuku mu kwirinda Coronavirus.

Ati "Hari nk’aho bacururiza usanga bafite kandagira ukarabe ariko ugasanga nta mazi aherukamo bitewe nuko nabo bayabona byabagoye.”

Mu kiganiro Umuyobozi w’Akarere ka Bugesera, Mutabazi Richard, yagiranye n’abanyamakuru bagize Ihuriro ry’abanyamakuru barwanya icyorezo cya Sida (Abasirwa) ku wa 1 Nyakanga 2020, yavuze ko ikibazo cy’amazi adahagije muri aka karere kizwi kandi kirimo gushakirwa umuti.

Ati “Dufite ibice byinshi bitarageramo ibikorwaremezo bitari amazi gusa. Igikorwa rero na mbere y’iki cyorezo ni uko bigomba kuhagezwa. Bigenda bikorwa uko ubushobozi bubonetse, uko ingengo y’imari ibonetse.’’

Mutabazi avuga ko akarere gafite ingamba zo kongera amazi atunganyijwe akava kuri metero kibe 3600 ku munsi (ari munsi ya 20% by’amazi akenewe) akagera ku bihumbi 15.

Ati “Kurwanya Coronavirus abantu badafite amazi birumvikana ko ari imbogamizi ariko nanone ntabwo ibintu byose dukora ariko biba bitworoheye kubikora. Kuba udafite amazi hafi ntabwo bivuze ko wicwa n’indwara ahubwo bivuze ko uvunika uyashaka.’’

Yasabye abaturage babona amazi bavunitse kwihanganira imvune bakajya kuyashakira aho ari kugeza igihe bazayegererezwa.

Mutabaziyavuze ko mu karere ayobora hakiri n’abaturage bafite imyumvire ibangamiye amabwiriza yo kwirinda Coronavirus barimo abatambara neza agapfukamunwa, abantu usanga begeranye cyane, abakora ibikorwa bitewe birimo gucuruza inzoga n’ibindi bakwiye gucikaho.

Mu Rwanda hamaze kuboneka abantu 1063 banduye Coronavirus mu bipimo 151 641 byafashwe mu gihe abantu 493 bakize naho 567 bakaba bakiri kwitabwaho mu bitaro naho Abanyarwanda imaze kwica ni batatu.

Umuyobozi w'Akarere ka Bugesera, Mutabazi Richard, aganira n'abanyamakuru bagize Ihuriro ryo kurwanya Sida mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .