Gen Maj Nzabamwita yagarutse ku batunguwe n’ifatwa Rusesabagina

Yanditswe na Ndahayo Emmanuel
Kuya 21 Nzeri 2020 saa 11:35
Yasuwe :
0 0

Byatunguye benshi ubwo ku wa 31 Kanama, Urwego rw’Igihugu rw’Ubugenzacyaha, RIB, rwerekanaga Paul Rusesabagina wari umaze iminsi afatiwe mu Rwanda, akekwaho ibyaha 13 birimo n’iterabwoba.

Ni umugabo wavugaga ko arwanya leta y’u Rwanda, ndetse yagiye kure akavuga ko ashaka kuyikuraho “hifashishijwe uburyo bwose bushoboka”.

Yaranagerageje koko, kuko mu 2018 humvikanye ibitero by’inyeshyamba za FLN, umutwe w’ingabo ushamikiye kuri MRCD, ihuriro ry’amashyaka arwanya leta y’u Rwanda, bigahitana abaturage b’inzirakarengane mu bice bya Nyaruguru na Nyamagabe.

Nyuma y’iyerekanwa rye, hibajijwe uburyo uyu mugabo yageze i Kigali, mu gihe ubuyobozi bwo buvuga ko “yizanye i Kigali ku bushake”.

Umunyamabanga Mukuru w’Urwego rushinzwe iperereza n’Umutekano, Gen Maj Joseph Nzabamwita, yongeye gushimangira ko nta gihugu na kimwe cyagize uruhare mu ifatwa rya Paul Rusesabagina, kuko ari we ‘wizanye mu gihugu ku giti cye.’

Nzabamwita yabwiye The New York Times ko nta tegeko ryishwe mu bikorwa byo guta muri yombi Paul Rusesabagina, kuko byanyuze mu mucyo, ashimangira ko Leta Zunze Ubumwe za Amerika n’u Bubiligi byafatanyije n’inzego z’u Rwanda mu gukora iperereza kuri Rusesabagina.

Yavuze ko icyatunguranye gusa ari uburyo u Rwanda rwakoresheje ubuhanga buhanitse mu ifatwa rya Rusesabagina, ati “batunguwe gusa n’uburyo twashoboye gukoramo igikorwa nka kiriya, kandi kikagenda neza cyane”.

Hari amakuru yari yatangajwe mbere avuga ko Amerika yari imaze igihe ifatanya n’u Rwanda mu iperereza ry’ibyaha birimo gutera inkunga imitwe y’iterabwoba, ndetse ko yagiye abazwa n’inzego z’iperereza za Amerika.

Mu kiganiro cyihariye aherutse kugirana na IGIHE, Umunyamabanga Mukuru wa RIB, Col Jeannot Ruhunga, yahishuye ko ubufatanye mpuzamahanga bwavuzwe ubwo Rusesabagina yerekwaga itangazamakuru butari busobanuye ko hari igihugu cyamushyikirije u Rwanda.

Ruhunga yasobanuye ko iyo RIB iri kugenza ibyaha ku muntu ukekwa ari mu mahanga, hifashishwa ibihugu bitandukanye kugira ngo haboneke ibimenyetso, ari nabyo bishingirwaho mu gushyira hanze impapuro zimushakisha.

Kuri Rusesabagina, inyandiko zisaba itabwa muri yombi rye zatanzwe n’Ubushinjacyaha bw’u Rwanda ku wa 9 Ugushyingo 2018, icyo gihe uwari Umushinjacyaha Mukuru w’u Rwanda, Jean Bosco Mutangana niwe wazishyizeho umukono.

Zasabaga ibihugu birimo u Bubiligi, nk’igihugu uyu mugabo afitiye ubwenegihugu, ko bumuta muri yombi ashinjwa ibyaha birimo kurema umutwe witwaje intwaro n’ibindi birenga bitandatu bifitanye isano n’iterabwoba. Yashakishwaga kandi ku byaha birimo ubwicanyi, ubujura n’ibindi.

Ruhunga asobanura ko amahanga muri urwo rugendo rwo gukusanya ibimenyetso yafashije u Rwanda cyane, uhereye ku ho yabaga, aho yakoraga n’ahandi.

Ku wa kane w’icyumweru gishize, Urukiko rw’Ibanze rwa Kicukiro rwanzuye ko Rusesabagina afungwa muri gereza iminsi 30 y’agateganyo mu gihe iperereza rigikomeje, umwanzuro yahise ajuririra.

Rusesabagina ashinjwa ibyaha 13 birimo iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .