00:00:00 IGIHE NETWORK KN KINYARWANDA EN ENGLISH FR FRANCAIS

BK yahembye abanyamahirwe muri poromosiyo yagenewe abo mu mahanga

Yanditswe na Mugisha Christian
Kuya 25 June 2022 saa 09:54
Yasuwe :

Banki ya Kigali yahembye abanyamahirwe batatu mu bitabiriye Poromosiyo yiswe ‘Bank Home & Win Big’ yashyiriweho ababa mu mahanga.

Iyi poromosiyo yari igamije gushishikariza abari mu mahanga kubika imari yabo mu Rwanda no gukora ibikorwa by’ishoramari imbere mu gihugu binyuze muri iyi banki hagamijwe kurushaho kubona serivisi zayo zinyuranye.

Uwayitabiriye yasabwaga byibuze kubitsa kuva kuri miliyoni 1 Frw kuri konti iri mu Rwanda ngo abashe kuba umwe mu banyamahirwe begukana ibihembo byashyizweho na BK.

Umuhango wo gusoza ku mugaragaro iyi poromosiyo yari imaze amezi atanu wabereye ku cyicaro gikuru cya BK mu Mujyi wa Kigali ku wa Gatanu, tariki ya 24 Kamena 2022.

Mu basaga 2000 bitabiriye iyi poromosiyo, 500 ni bo babikije amafaranga yagenwe ndetse ni bo bavuyemo abanyamahirwe batatu bahembwe.

Twagirayezu Gonzalve na Rugema Telesphore ni bo begukanye umwanya wa mbere n’uwa kabiri batsindira itike y’indege izabakura mu bihugu barimo bagasura u Rwanda n’izabasubizayo.

Ruberintwari Melchiade yegukanye umwanya wa gatatu atsindira gusura Pariki y’Igihugu ya Nyungwe aherekejwe n’undi muntu umwe yihitiyemo ndetse no kurara iminsi ibiri muri ‘One & Only’ iherereye muri Nyungwe.

Umuyobozi Ushinzwe Ubucuruzi muri BK, Benjamin Mutimura, yavuze ko ku bacikanwe n’iyi poromosiyo amahirwe agihari kuko izagaruka umwaka utaha.

Yagize ati “Nubwo twaba tutari muri poromosiyo serivisi zizahoraho nk’ibisanzwe, abakiliya bacu baba mu mahanga bashobora guhabwa inguzanyo haba mu mafaranga y’u Rwanda cyangwa amadorali. Akarusho ni uko wakohereza amafaranga kuri konti yawe mu Rwanda nta kiguzi.”

Yakomeje avuga ko hari umwihariko kuri aba bakiliya kuko konti zabo nta kiguzi zisabwa cya buri kwezi.

Kuva iyi poromosiyo yatangizwa, hafunguwe amakonti mashya mu gihe abarenga 2000 babikije asaga miliyoni 8$, akabakaba miliyari 8 Frw.

Banki ya Kigali yashyiriyeho Abanyarwanda baba mu mahanga konti iborohereza kubitsa mu gihugu ngo bakomeze kugira uruhare mu iterambere ry’igihugu.

Iyi konti kuyifunguza ni ubuntu kandi umuntu ashobora kubitsaho amafaranga ayo ari yo yose yaba Amanyarwanda, Amadorali ya Amerika n’aya Canada, akoreshwa mu Busuwisi (CHF), Amayero cyangwa Ama-pound.

Serivisi za Diaspora Banking muri BK zitanga inyungu kugeza kuri 12% buri mwaka. Ni ku muntu ufite konti yo kubitsa mu gihe cyemeranyijwe kuva ku kwezi kumwe kugera ku myaka itanu guhera k’ufite 300.000 Frw.

Ufite iyi konti mu madorali akabitsa ahereye ku 50.000$ kuzamura ahabwa inyungu kugeza kuri 1.5% buri mwaka.

Izi serivisi ziha inyungu ya 8% ku mwaka, umuntu ufite konti yo kwizigamira iri mu mafaranga y’u Rwanda.

Ushaka gufunguza iyi konti anyura kuri www.bk.rw/Diaspora, akamanura [download] inyandiko iriho, akayuzuza, akayijyana kwa noteri kuri Ambasade y’u Rwanda na fotokopi y’irangamuntu n’ifoto ngufi, akabyohereza kuri email ya [email protected]

Umuyobozi Ushinzwe Ubucuruzi muri BK, Benjamin Mutimura, yavuze ko abakiliya baba mu mahanga boroherejwe kugera kuri serivisi z'imari
Uyu muhango wari witabiriwe n'abakozi batandukanye ba BK ndetse n'itangazamakuru
Banki ya Kigali igira ishami ryihariye rya Diaspora Banking ryo kwita ku bakiliya bayo baba mu mahanga
Abakozi ba Banki ya Kigali biyemeje guha serivisi nziza ababa mu gihugu cyangwa hanze yacyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .