Bamporiki witabiriye Rwanda Day zose yagaragaje inkomoko yayo ahereye ku bakurambere

Yanditswe na Philbert Girinema
Kuya 4 Ukwakira 2019 saa 09:36
Yasuwe :
0 0

Umukuru w’Itorero ry’Igihugu, Bamporiki Edouard, ni umwe mu Banyarwanda umaze kwitabira Rwanda Day zose zabayeho, aho yagaragaje ko igikorwa nk’iki cyahoze mu ntekerezo z’abakurambere b’u Rwanda bifuzaga ko ruhora mu mitima y’abarwo aho baba hose.

Yabigarutseho mu kiganiro yagiranye na IGIHE ubwo yari ageze i Bonn ku nyubako ya World Conference Center ahazabera iki gikorwa cy’amateka ku Banyarwanda baba mu mahanga.

Bamporiki yavuze ko kuva kera na kare, abakurambere b’u Rwanda bifuzaga ko u Rwanda ruhora mu mitima y’abarwo aho bagiye hose, none iyo mitekerereze ikaba yarakomejwe na Perezida Kagame ashyiraho umunsi uhuza Abanyarwanda aho bari hose.

Yagize ati “Iki Umutoza w’Ikirenga akora cyo guhura n’Abanyarwanda ukibona mu ntekerezo z’abakurambere bacu kuko bari baratekereje ko izina u Rwanda ari igisobanuro cyarwo kimwe cyo kwanda, rukaba mu mitima y’abarwo aho bagiye, rukaba u Rwanda bagendamo, u Rwanda bagendana.”

Yavuze ko Rwanda Day ari umusanzu wo kwagura u Rwanda, ku buryo Abanyarwanda bagira umusanzu mu iterambere ryarwo “kugira ngo n’abakura bakurire muri uwo muco wo guhura no guhuza amaboko kuko aricyo cyonyine kizarengera u Rwanda.”

Nk’umuntu umaze kwitabira Rwanda Day zose, Bamporiki yavuze ko hari amagambo atajya yibagirwa yavuzwe na Perezida Kagame mu nshuro zose yaganiriye n’Abanyarwanda muri iki gikorwa.

Atanga urugero rw’ibyo Perezida Kagame yavugiye muri Canada mu 2013, yavuze ku ijambo rye aho yabwiraga Abanyarwanda ko ’uhinga mu kwe adasigana’, aho avuga ko rifite igisobanuro gikomeye kuko u Rwanda rwubakwa n’Abanyarwanda bahari, babikuye ku batagihari, bakabisigira abazaza.

Ati “Ni impanuro nyambukiranyabinyejana noneho n’aya mahitamo y’Abanyarwanda, gutekereza byimbitse, kuba umwe, ibyo byose ni ibyagiye bigarukwaho cyane mu biganiro Perezida wa Repubulika yatanze ariko agarura n’abahabye.”

Yatanze urugero rw’ijambo rya Perezida Kagame mu 2015 aho yabwiye abavuga nabi u Rwanda, ko mu gihe barangije kubikora bazataha.

Yakomeje ati “Aziko n’iyo umuntu yakosa akagera aho avuga ati ubu ndahindukiye, yatanze umurongo ko uwo muntu yahabwa umwanya nubwo nagira inama abo bantu bo kudakomeza gutana ngo ni uko biringiye imbabazi.”

Muri Rwanda Day igiye kubera mu Budage, biteganyijwe ko hazabaho umwanya wo kumurika ibikorwa bikorerwa mu Rwanda bitandukanye. Ibigo bya leta n’abyigenga bizaba biri mu hazamurikirwa ibikorwa ku munsi nyir’izina.

Hateganyijwe kandi ibiganiro bivuga ku muco, guhanga udushya, ijambo rya Perezida Kagame ndetse n’umwanya w’ibibazo ku bitabiriye.

Umukuru w’Itorero ry’Igihugu, Bamporiki Edouard, yasobanuye inkomoko ya Rwanda Day ifite umuzi mu mateka y’abakurambere
Bamporiki ari mu bayobozi bakuru b'igihugu bageze ku nyubako ya World Conference Center iri i Bonn ahazabera Rwanda Day

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .