Ba rwiyemezamirimo 2500 bagiye guhabwa amahugurwa azabafasha kwigobotora ingaruka za Covid-19

Yanditswe na Niyitanga Jean Paul
Kuya 18 Ugushyingo 2020 saa 04:54
Yasuwe :
0 0

Urwego rw’Igihugu rw’Iterambere (RDB) ku bufatanye na African Management Institute (AMI) bagiye gutanga amahugurwa ku byerekeye ishoramari kuri ba rwiyemezamirimo bato n’abaciritse bagera ku 2500, azabaha ubumenyi buzabafasha guhangana n’ingaruka Covid-19 yagize ku ishoramari ryabo.

Ku wa 16 Ugushyingo 2020 ni bwo RDB na AMI basinyanye amasezerano y’imikoranire, agamije gufasha ba rwiyemezamirimo 2500 kubona amahugurwa y’ubuntu ku byerekeye kuzahura imishinga yazahajwe n’ingaruka za Covid-19.

Ubu bufatanye bwitezweho gutanga umusanzu muri gahunda y’igihugu yo kuzahura ubukungu, binyuze mu mishinga ya ba rwiyemezamirimo bato n’abaciriritse.

Ba rwiyemezamirimo bafite imishinga bahawe uburyo bwo gusaba kwitabira aya mahugurwa azatangwa mu rurimi rw’Icyongereza n’Ikinyarwanda binyuze mu buryo bw’ikoranabuhanga, aho bazasaba kuyitabira banyuze ku rubuga rwa African Management Institute.

AMI izabanza gutanga amahugurwa y’ukwezi kumwe yiswe ‘Business Survival Bootcamp’, ikomerezeho na gahunda y’amahugurwa y’amezi atandatu, byose bigamije gufasha ba rwiyemezamirimo kwiteza imbere binyuze mu guhangana n’ingaruka Covid-19 yagize ku mishinga yabo.

Umuyobozi Mukuru wa RDB, Clare Akamanzi, yavuze ko imishinga y’Abanyarwanda yose yagizweho ingaruka mbi n’icyorezo cya Covid- 19.

Yakomeje ati “Twabonye gahunda nyinshi zigamije kudufasha kwigira, hibandwa ku bumenyi ngiro n’ibindi byafasha imishinga ya ba rwiyemezamirimo kongera guhaguruka, ikazahuka maze iterambere rigakomeza.”

“Ishoramari rero ntabwo rigomba guhagarara, ubumenyi n’ibikoresho ba rwiyemezamirimo bahawe bigomba gukoreshwa binyuze muri aya mahugurwa ya AMI, mu kwigira ku nararibonye zizatanga ubumenyi mu buryo bw’ikoranabuhanga. Turashishikariza ba rwiyemezamirimo bo mu gihugu hose kubyaza umusaruro aya mahirwe.”

Binyuze mu masezerano RDB yagiranye na AMI, babitewemo inkunga na MasterCard Foundation, gahunda y’aya mahugurwa izatangira muri uku kwezi irangire muri Mata 2021.

Umuyobozi uhagarariye AMI mu Rwanda, Diederik Wokke, yavuze ko kuva muri 2014 gahunda za AMI zatumye hahangwa byibuze imirimo irenga itatu kuri buri mushinga wayitabiriye, ndetse bizamura imisoro ku ijanisha rya 19%.

Yakomeje agira ati ”Birakwiye ko AMI ikorana n’abashoramari b’u Rwanda muri ibi bihe bikomeye byo kuzahura ubukungu. Twishimiye gukorana na ba rwiyemezamirimo kugira ngo tubafashe gukomeza imishinga yabo kandi turabashishikariza kubyaza umusaruro aya mahirwe.”

Gahunda ya AMI yiswe Business Survival Bootcamp izamara ukwezi, izaba yiganjemo ubumenyingiro, gukoresha ikoranabuhanga n’uburyo bwo kwihuza n’abandi bakora ishoramari.

Ni mu gihe gahunda izakomerezaho ikamara amezi atandatu, yo izibanda ku guhanga udushya, kwitegura ahazaza, no kongera iterambere.

Aya mahugurwa azatangwa ku buntu yitezweho kuzamura ingano y’imishinga izazanzamuka nyuma yo kuzahazwa na Covid-19, ku buryo bizanatuma hahangwa imirimo mishya cyane cyane ku bagore n’urubyiruko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .