Amb. Nduhungirehe Olivier yavanywe ku mirimo ye ku bwo gushyira imbere imyumvire ye

Yanditswe na Ishimwe Israel
Kuya 9 Mata 2020 saa 10:57
Yasuwe :
0 0

Perezida Paul Kagame yavanye ku mirimo Ambasaderi Olivier Nduhungirehe wari Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe Umuryango w’Ibihugu bya Afurika y’Iburasirazuba, kubera imikorere yamuranze yo gushyira imbere imyumvire ye kurusha politiki y’igihugu.

Ni umwe mu bagize Guverinoma bake mu myaka igera ku icumi ishize bakuwe ku myanya hakavugwa impamvu bibayeho, ndetse ntibyari bisanzwe ko mu itangazo risimbuza umuyobozi, havugwamo amakosa ye yose nk’uko we byagenze.

Wasangaga bikorwa mu bundi buryo, niba hari ibyo atujuje akabimenyeshwa ariko ntibijye hanze.

Gusa itangazo rivana Nduhungirehe ku mirimo yari amazeho imyaka isaga ibiri ryashyizweho umukono na Minisitiri w’Intebe, Dr Ngirente Edouard mu izina rya Perezida Paul Kagame risobanura neza amakosa yakoze.

Rivuga ko "Ashingiye ku biteganywa n’Itegeko Nshinga rya Repubulika y’u Rwanda ryo mu 2003 ryavuguruwe mu 2015, cyane cyane mu ngingo yaryo ya 116, none ku wa 9 Mata 2020, Perezida wa Repubulika yavanye ku mirimo Amb. Olivier Nduhungirehe wari Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe Umuryango w’Ibihugu bya Afurika y’Iburasirazuba kubera imikorere yakunze kumuranga yo gushyira imbere imyumvire ye aho gushingira kuri politiki za Leta mu kazi yari ashinzwe.’’

Perezida Kagame yari aherutse guca amarenga ko hari abayobozi bashobora kuvanwa mu nshingano ku bwo kutubahiriza akazi kabo uko bikwiye.

Ubwo yatangizaga umwiherero w’abayobozi bakuru, yavuze ku bwegure bw’Abanyamabanga ba leta, Evode Uwizeyimana na Dr Munyakazi Isaac n’uwari Minisitiri w’Ubuzima Dr Diane Gashumba.

Uwo mwiherero wabaye nyuma y’iminsi mike abaminisitiri batatu muri Guverinoma beguye, ndetse Perezida Kagame avuga ko “iyo umwiherero tuwutangira ku wa Kabiri, haba havuyemo abandi nka batatu”.

Amb Nduhungirehe yaranzwe no kutaripfana

Amb Nduhungirehe ni umugabo utaripfana, uhorana ibitekerezo kuri buri ngingo kandi akabigaragaza ashize amanga ndetse nta watinya kuvuga ko mu bagize Guverinoma bose yari umuntu wihariye. Ibi ubwabyo bisobanura neza impamvu yakuwe ku mirimo ye.

Kuva yaba Umunyamabanga wa Leta muri Minisiteri y’Ububanyi n’Amahanga, Amb Nduhungirehe yagaragaje amatwara atandukanye n’ay’abandi baminisitiri yaba abamubanjirije ndetse n’abari muri Guverinoma ubu.

Abakoresha imbuga nkoranyambaga bamuzi cyane ku buryo ari umuntu wasubizaga iteka, ikintu cyiza ashimirwa gusa, hakaba na bamwe bamunengaga ko avuga no ku ngingo zitamureba, zitajyanye n’umwanya yarimo cyangwa agasabwa n’amarangamutima ku ngingo zimwe.

Umunota umwe yabaga avuga ku bibazo muri siporo y’u Rwanda, byavaho agaha ubutumwa abatifuriza ineza u Rwanda, nyuma y’aho akavuga ku ngingo zijyanye n’imyambarire mu rubyiruko bityo bityo.

Yihebeye ikipe ya Mukura VS ku buryo yakunze kugaragaza aho ahagaze ku ngingo iyo ariyo yose ijyanye nayo. Hari benshi bajyaga batera urwenya ku mbuga nkoranyambaga bibaza uburyo abasha guhuza akazi ke ka dipolomasi no kubonera umwanya ingingo zose zicaracara ku mbuga nkoranyambaga.

Mu minsi ya vuba, yakunze kugaragara cyane mu biganiro bigamije guhosha ubwumvikane buke hagati y’u Rwanda na Uganda. Ni we wari uyoboye delegasiyo y’u Rwanda mu biganiro byabereye i Kampala ndetse n’ibyo mu Rwanda bya Komisiyo ishinzwe kwiga ku bibazo hagati y’ibihugu byombi.

Ku wa 30 Kanama 2017 nibwo yari yagizwe Umunyamabanga wa Leta muri Minisiteri y’Ububanyi n’Amahanga avuye ku kuba Ambasaderi w’u Rwanda mu Bubiligi.

Mu 2007 yabaye Umujyanama wa mbere muri Ambasade y’u Rwanda muri Ethiopia [2007-2010] n’i New York muri Amerika.

Yavuye muri Amerika muri Gicurasi 2015 agizwe Umuyobozi mukuru w’agateganyo muri Minisiteri y’Ububanyi n’Amahanga n’Ubutwererane ushinzwe imiryango mpuzamahanga mbere yo kugirwa Ambasaderi w’u Rwanda mu Bubiligi aho yamaze imyaka ibiri.

Uyu mugabo w’imyaka 45 afite impamyabumenyi y’Icyiciro cya Gatatu cya Kaminuza (Masters) muri Gestion Fiscale yavanye muri Kaminuza ya ULB (Université Libre de Bruxelles-Institut Solvay). Afite kandi Impamyabumenyi y’Icyiciro cya Kabiri cya Kaminuza mu mategeko yaherewe muri UCL (Université Catholique de Louvain).

Nyuma yo gukurwa kuri uyu mwanya, Amb Nduhungirehe yashimiye Perezida wa Repubulika ku cyizere yamugiriye mu myaka ibiri ishize akamugira Minisitiri, avuga ko yiteguye gukomeza gukorera igihugu.

Ambasaderi Olivier Nduhungirehe wari Umunyamabanga wa Leta muri Minisiteri y'Ububanyi n'Amahanga yakuwe ku mirimo yari ashinzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .

Article (132780) Re-process this page