Abenjeniyeri bato basabwe guha agaciro amahirwe ari mu kwimenyereza umwuga

Yanditswe na Nkurunziza Ferdinand
Kuya 13 Kanama 2020 saa 02:52
Yasuwe :
0 0

Mu gihe u Rwanda rurajwe ishinga no guteza imbere ibikorwaremezo bijyanye n’icyerekezo, Urugaga rw’Abenjeniyeri mu Rwanda rurashishikariza abakinjira muri uyu mwuga guha agaciro amahirwe bahabwa yo kwimenyereza binyuze mu mushinga rwatangije kuko aribwo buryo buzabafasha guhatana ku isoko ry’umurimo.

Ni umushinga uterwa inkunga n’Ishuri ryo mu Bwongereza rya Royal Academy of Engineering, ufasha kwimenyereza umwuga abakirangiza amasomo afite aho ahuriye n’ubwubatsi bagera kuri 60 buri mwaka.

Umuyobozi w’uyu mushinga mu Rugaga rw’Abenjeniyeri mu Rwanda, Eng. Cécile Uwimana, avuga ko iki gikorwa kigamije kurushaho gufasha abakirangiza amasomo gushyira mu bikorwa ubumenyi bavana mu mashuri mu buryo bujyanye neza n’ibikenewe ku isoko ry’umurimo w’ubwubatsi kandi ko bakwiye guha agaciro ayo mahirwe bahabwa.

Yagize ati “Aya mahirwe bayabonye habaye ipiganwa, ntibakwiye kuyatesha agaciro kuko umubare munini w’abari basabye n’uwo twabashije kwakira, urabereka ko atari ibintu baboneye ubuntu. Kuri ubu baba bagize amahirwe yo kubona imishinga minini iri kuzamuka mu gihugu cyacu […] bakwirye gufata uyu mwanya bakiga kuko ejo bazakenera gukoresha ubwo bumenyi hirya no hino mu guteza imbere igihugu cyacu.”

Mu gihe gisanzwe cy’amasomo, abanyeshuri bagenerwa umwanya wo gushyira mu ngiro akazi kajyanye n’ibyo biga; gusa iki gihe ntigifatwa nk’igitanga umusaruro wifuzwa kuko abanyeshuri baba bari gukorera amanota […] ku buryo Urugaga rw’Abenjeniyeri rugaragaza ko haba hakenewe ikindi gihe cy’umwihariko kidashingiye ku gushaka amanota ya mwarimu.

Eng. Uwimana avuga ko kiriya gihe cyo kwimenyereza hagamijwe kubona amanota, kenshi na kenshi usanga umwana abifata nk’isomo risanzwe akeneye amanota gusa; ariko iyi gahunda idasanzwe yo kwimenyereza baba bashaka ko ibyo abayishyizwemo bazakora, babikora mu buryo bwubahirije amabwiriza agendana n’umwuga.

Buri wese watoranyijwe muri iyi gahunda, afashwa kubona amafunguro n’amafaranga y’urugendo mu gihe cy’amezi atandatu amara ari kwimenyerereza umwuga hamwe mu hari kubakwa ibikorwaremezo bigezweho nko mu Murenge wa Masaka, mu Karere ka Kicukiro […] ahari kubakwa inyubako zizakoreramo ivuriro rizaba ryihariye mu kubaga indwara zo mu rwungano ngogozi.

Igikorwa cyo guhitamo abagomba gufashwa muri iyi gahunda gishingira ku guhatana, abahize abandi bagahabwa amahirwe yo kwimenyereza umwuga mu buryo bujyanye n’ibiteganywa n’amabwiriza agenga ubwubatsi.

Eng. Uwimana avuga ko muri iki gihe ubwubatsi buri gutera imbere mu Rwanda, abiga uyu mwuga baba bakeneye kwirebera n’amaso yabo uburyo bikorwa kuruta kubisoma mu bitabo ndetse bakanabikora ubwabo.

Umuyobozi w’Urugaga rw’Abanjeniyeri mu Rwanda, Eng. Steven Sabiti, avuga ko gufasha abakirangiza amasomo kwimenyereza umwuga bifasha cyane urugaga, kuko biri no mu nshingano za mbere z’ibanze bafite.

Ati “Iyo barangije kwihugura muri iyi gahunda baba babonye ubumenyi bwisumbuye; iyo bagiye gukora imirimo, bayikora neza kurushaho. Ikindi kandi […] dushinzwe gushaka uburyo abanyamuryango bacu babona akazi; abenshi barangije muri iyi gahunda ibigo bitandukanye birabafata, tukabyungukiramo nk’urugaga kuko abanyamuryango bacu baba babonye akazi.”

Urugaga rw’Abenjeniyeri ruvuga ko rukigorwa no kubona ubushobozi buhagije bushingiye ku mikoro yarufasha kwita ku barangije amasomo benshi binyuze muri iyi gahunda yo kwimenyereza umwuga.

Iterambere ry’iyi gahunda ritanga icyizere cyo kuzagira umubare uhagije w’abenjeniyeri mu gihe kizaza, ibifatwa nk’igisubizo kirambye ku iterambere ry’imyubakire mu Rwanda no kugabanuka k’umubare w’abanyamahanga bakigaragara mu bikorwa byagutse by’ubwubatsi hirya no hino mu gihugu.

Ndayishimiye Olivier, umwe mu bakirangiza amasomo muri IPRC-Kicukiro avuga ko kwimenyereza umwuga binyuze muri iyi gahunda bizamuha icyerekezo cy’uburyo agomba gushyira mu bikorwa ubumenyi yavanye ku ishuri bwibandaga cyane ku biri mu bitabo.

Ni ingingo ahurizaho na Niyonkuru Bella, umwe mu bakobwa bagize amahirwe yo kwakirwa muri iyi gahunda. Yavuze ko urugendoshuri rwa mbere bakoreye ahari kubakwa inyubako rwamweretse ko byinshi yari azi, byari ibyo mu bitabo gusa, akaba yizeye kuzunguka ubumenyi mu mezi atandatu azamara yimenyereza umwuga by’umwihariko nk’umukobwa.

Ati “Nk’umukobwa, turitangira cyane tukumva ko tutabishobora, ko ari imirimo y’abasore […] ariko kuko nabigiyemo mbikunze, nzakora uko nshoboye mpe agaciro aya mahirwe nahawe, nkore ibintu byinshi kandi nizeye ko nzabyisangamo.”

Gahunda yo gufasha abenjeniyeri bagisoza amasomo yabo kwimenyereza umwuga yatangijwe mu 2017, ikaba ifite intego yo kuziba icyuho kikiri hagati y’ubumenyi umunyeshuri avana mu ishuri n’ibikenewe kugira ngo abashe gukora akazi.

Kugeza ubu iyi gahunda imaze gufasha abenjeniyeri bakiri bato 150, baziyongeraho n’abandi 60 bari gufashwa muri uyu mwaka.

Bamwe mu basoje amasomo berekwa ibice bitandukanye by'inyubako zizakoreramo ivuriro rizaba ryihariye mu kubaga indwara zo mu rwungano ngogozi
Imirimo yo kubaka inyubako zizakoreramo ivuriro rizaba ryihariye mu kubaga indwara zo mu rwungano ngogozi igeze kure
Imyubakire y'izi nyubako ikubiyemo buri kintu cyose kigishwa mu mashuri, ku buryo abazimenyerereza bazabasha kubona ibyo bize byose bikorwa imbona nkubone
Imyubakire y’izi nyubako ikubiyemo buri kintu cyose kigishwa mu mashuri, ku buryo abazimenyerereza bazabasha kubona ibyo bize kandi neza
Inyubako ebyiri muri eshanu ziri kubakwa zifite imiterere yihariye
Bamwe mu benjeniyeri 60 bari gufashwa kwimenyereza umwuga
Umuyobozi w’Umushinga w'Iyimenyerezamwuga mu Rugaga rw'Abenjeniyeri mu Rwanda, Eng. Cécile Uwimana, avuga ko iki gikorwa kigamije kurushaho gufasha abakirangiza amasomo gushyira mu bikorwa ubumenyi baba baravanye mu mashuri
Umuyobozi w’Urugaga rw'Abenjeniyeri mu Rwanda, Eng. Steven Sabiti, yavuze ko gufasha abakirangiza amasomo kwimenyereza umwuga biri mu nshingano za mbere z’ibanze bafite
Ndayishimiye Olivier warangije muri IPRC-Kicukiro avuga ko kwimenyereza umwuga bizamuha icyerekezo cy’uburyo agomba gushyira mu bikorwa ubumenyi yavanye ku ishuri
Ivuriro rizaba ryihariye mu kubaga indwara zo mu rwungano ngogozi rizaba ari irya mbere ryubatswe ku Mugabane wa Afurika, ribe irya gatanu ku Isi
Ishusho igaragaza uko imwe mu nyubako zizakoreramo ivuriro rizaba ryihariye mu kubaga indwara zo mu rwungano ngogozi izaba iteye
Igishushanyombonera kigaragaza uko inyubako zizakoreramo ivuriro rizaba ryihariye mu kubaga indwara zo mu rwungano ngogozi zizaba zimeze

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .