00:00:00 IGIHE NETWORK KN KINYARWANDA EN ENGLISH FR FRANCAIS

Abaturarwanda basabwe kongera imbaraga mu kwandukuza abapfuye ku nyungu z’abakiriho

Yanditswe na Manzi Angelo
Kuya 6 Mutarama 2023 saa 10:56
Yasuwe :

Leta y’ u Rwanda ku bufatanye n’Ishami ry’Umuryango w’Abibumbye ryita ku buzima(OMS) yagaragaje akamaro ko kwandukuza abapfuye no kwandikisha abavutse kugira ngo abakiriho babone uburenganzira bwo kubona serivise zimwe na zimwe z’irangamimerere no guteza igihugu imbere.

Mu myaka ya kera kwandukuza umuntu witabye Imana mu irangamimerere byakundaga kubamo imbogamizi yaba ku muturage no ku gihugu kuko batandikwaga mu gitabo cy’irangamimere ugasanga rimwe kubona cyangwa gukusanya amakuru biragoranye.

Uko imyaka niko Leta y’ u Rwanda n’abafatanyabikorwa bagendaga bashyiramo ingufu ndetse bafasha n’umuturage kubona serivise hafi ye bijyane n’icyerezo cyo guharanira impinduka ku mibereho myiza y’umuturage, iterambere ry’igihugu n’ibindi hifashishijwe uburyo bwo kwandika abavutse n’abapfuye mu gitabo cy’irangamimerere mu buryo bw’ikoranabuhanga (CRVS).

Kuva muri 2020 kugeza ubu kwandikisha uwavutse no kwandukuza uwapfuye bikorerwa mu kagali no ku bitaro kandi bigakorwa mu buryo bw’ikoranabuhanga.

Ubu buryo bwo gukusanya amakuru yose mu gihugu bufitiye inyungu nyiri ubwite ndetse n’igihugu ariko buri wese abigizemo uruhare.

Hagaragazwa ko kwandikisha uwapfuye mu irangamimere ari ingirakamaro kuko byorohereza abasigaye guhabwa serivise zishamikiye ku kuba barabuze umuntu wabo. Aha twavuga nka pansiyo, serivisi z’ubutaka, gukuza uwitabye Imana ku rutonde rw’abagomba kwishyurirwa mituweli, kugira uburenganzira busesuye ku muturage,koroshya no kwihutisha itangwa rya serivisi z’Irangamimerere no kunoza igenamigambi hagendewe ku mubare w’abapfuye.

Ishami ry’Umuryango w’Abibumbye ryita ku buzima, OMS rigaragaza ko ku isi hose bibiri bya gatatu bya miliyoni 56 bapfa buri mwaka batandikwa, mu gihe mu Rwanda kwandika abapfuye bigeze kuri 30% bigaragaza ko ari urugendo rwiza ariko hakiri icyuho.

Ikigo cy’igihugu gishinzwe indangamuntu (NIDA) gisanga kuba uburyo bwo kwandukuza uwapfuye bwarashyizweho, hari intambwe igenda iterwa ariko hakwiye gushyirwamo imbaraga,abaturage bakarushaho kubwitabira.

Umwe mu bakozi mu kigo cy’Ibarurishamibare yavuze ko imibare bari bafite muri 2015 yagaragazaga ko 56% by’abana bafite imyaka kuva munsi y’itanu aribo banditswe mu gitabo cy’irangamimerere ariko aho uburyo bw’ikoranabuhanga(CRVS) buziye, imibare yagiye izamuka ku buryo raporo ya 2021 yagaragaje ko 84% by’abavutse aribo banditswe.

Nubwo kwandikisha abavutse byiyongereye, yagaragaje ko kwandukuza abapfuye byo bikiri hasi.

Ati “Imibare nubwo yagabanutse ntabwo bivuze ko n’umubare w’abapfuye wagabanutse ahubwo nuko abagana izi serivise bagabanutse bitewe n’imbogamizi zagiye zibizamo cyane cyane Covid-19 aho nk’ibiro by’irangamimerere byabaga bifunze bityo bigatuma niba hari uwitabye Imana ya minsi ishobora ku murengeraho.”

U Rwanda rwifuza kugera ku ntego yo kwandika abavutse ku kigero cya 95 % ndetse na 90 % ku bapfuye, icyakora haracyari urugendo.

Ushinzwe gukurikirana ibikorwa by’Irangamimerere muri Minisiteri y’Ubutegetsi bw’Igihugu, Gashegu Uwitonze Patience asaba abaturage ubufatanye kuko kwandikisha uwapfuye bifasha Igihugu na bo ubwabo.

Ati “Turahamagarira kandi twibutsa abaturage gushyira imbere no kwiyemeza kwandikisha ku gihe mu buryo bwuzuye kuko bifasha gukurikirana ingano y’abaturage no gutegura iterambere rigana ku ntego z’ubuzima.”

Umukozi mu Ishami ry’Umuryango w’Abibumbye ryita ku buzima, Dr. Candide Tran Ngoc yavuze ko bakomeje gukora na Leta y’u Rwanda mu gushyira ingufu muri gahunda zo kwandukuza abapfuye kuko bifite inyungu ku mpande zombi.

Ati “Ndashimira u Rwanda kubera ko iki gikorwa kiri kugenda neza cyane yaba imibare y’abandikisha abavutse, gusa umwaka ushize twasanze 30% by’abapfuye aribo bandikishijwe mu buryo bw’ikoranabuhanga bwa CRVS bityo turasaba Leta y’u Rwanda kudufasha gushishikariza abaturage bagize ibyago kwandikisha ababo kuko bifite inyungu umuturage n’igihugu.”

Umuganga mu Ishami ry’Umuryango w’Abibumbye ryita ku buzima(OMS) ushinzwe amakuru y'Ubuzima mu Rwanda, Dr. Candide Tran Ngoc yagaragaje ko gahunda yo kwandukuza abapfuye ikwiriye kongerwamo imbaraga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .