Abashaka gukorera ingendo hanze y’igihugu basabwe kujya bipimisha Coronavirus mbere y’amasaha 48

Yanditswe na Bukuru JC
Kuya 13 Nzeri 2020 saa 09:34
Yasuwe :
0 0

Ikigo cy’Igihugu gishinzwe ubuzima (RBC) cyatangaje ko guhera kuri uyu wa Mbere abantu bashaka kwipimisha Coronavirus bazajya baza mbere y’amasaha 48 mu rwego rwo koroshya uburyo bwo guhabwa ibisubizo.

RBC ibinyujije kuri Twitter kuri iki Cyumweru yagize iti “RBC Rwanda iramenyesha abipimisha #COVID19 ko guhera ku wa mbere tariki ya 14 Nzeri 2020, abipimisha mbere yo gukorera ingendo hanze y’u Rwanda basabwa kuza kwipimisha habura amasaha 48 ngo urugendo rutangire.Tubashimiye kubyubahiriza.”

Umuyobozi Mukuru wa RBC, Dr Sabin Nsanzimana yabwiye IGIHE ko nta cyahindutse mu mabwiriza yatanzwe mbere, ahubwo ari uburyo bwo guhwitutra abari basigaye baza kwipimisha ku munota wa nyuma.

Yagize ati “Ni ukwibutsa abantu bajyaga baza ku munota wa nyuma basigaje nk’amasaha 24 cyangwa 12 ugasanga kubaha ibisubizo mbere y’uko bagenda birasa nl’ibibashyira ku gitutu cy’indege. Twari tumaze iminsi tugira abantu baza ku munota wa nyuma, akaza nk’uyu munsi afite urugendo ejo mu gitondo.”

Dr Nsanzimana yavuze ko abantu bafite ingendo mu mahanga bakwiriye kubyitabira kugira ngo biborohere mu gutegura ingendo zabo.

Igisubizo kigaragaza ko umuntu atanduye Coronavirus, kiba gifite agaciro mu gihe cy’amasaha 120 umuntu agihawe.

Dr Nsanzimana yavuze ko kugeza ubu u Rwanda rudite ubushobozi bwo gupima abantu hagati y’ibihumbi birindwi n’ibihunmbi icumi ku munsi imashini zose zihari ziri gukora.

Kuva tariki ya 1 Kanama 2020, u Rwanda nibwo u Rwanda rwongeye gufungura ingendo zose z’indege, ni nyuma y’uko zari zafunzwe muri Werurwe uyu mwaka kubera icyorezo cya Coronavirus.

Uretse abagenzi bagiye mu mahanga basabwa kwipimisha, abavuye mu mahanga nabo barimo n’abanyura mu gihugu bakomeza ahandi, basabwa kwerekana icyemezo cy’uko bapimwe Coronavirus na Laboratwari zibyemerewe ibisubizo bikerekana ko batanduye, nibura amasaha 72 mbere y’uko bagera mu Rwanda.

Ku bagenzi baza mu Rwanda, banabapimwa Coronavirus bwa kabiri iyo bahageze ibisubizo bigatangwa mu masaha 24.

RBC yavuze ko abashaka kwipimisha Coronavirus mbere yo kujya mu mahanga basabwa kubikora mbere y'amasaha 48

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .