Abareganwa n’Umunyamakuru Phocas Ndayizera basabye urukiko kugirwa abere

Yanditswe na Prudence Kwizera
Kuya 15 Ukwakira 2020 saa 08:55
Yasuwe :
0 0

Umunyamakuru Phocas Ndayizera n’abo bareganwa 12, basubiye imbere y’Urugereko rwihariye rw’Urukiko Rukuru mu Rwanda ruri i Nyanza ruburanisha ibyaha mpuzamahanga n’ibyambukiranya imipaka, bavuga ku cyifuzo cy’Ubushinjacyaha bwabasabiye gufungwa burundu nibaramuka bahamwe n’ibyaha baregwa.

Kuri uyu wa Kane abireguye uko ari batanu bose basabye urukiko kuzasuzumana ubushishozi ibyo bashinjwa, bavuga ko ubwo bafatwaga bari mu Bugenzacyaha bahatiwe kwemera ibyaha, basinyishwa impapuro batazi izibiriho.

Ni mu iburanisha ryabaye hifashishijwe uburyo bw’ikoranabuhanga ry’amashusho buzwi nka ‘video conference’ kubera icyorezo cya COVID-19 cyugarije Isi, abaregwa bose bari muri Gereza ya Mageragere iri mu Mujyi wa Kigali. Abaregwa muri uru rubanza batangiye gutabwa muri yombi mu 2018.

Karangwa Eliakim ni we watangiye kwiregura. Uyu asanzwe ari umuhanga mu bijyanye n’ikoranabuhanga. Ubushinjacyaha bumurega ko ari we wari ushinzwe kuzakora uburyo bwo guturitsa ibisasu bizasenya ibikorwa remezo bitandukanye hirya no hino mu gihugu.

Mu kwiregura yavuze ko ibyaha ashinjwa ntabyo yakoze kandi nta mugambi yigeze acura wo gukora ibyaha nk’ibyo, asobanura ko inzego z’umutekano zagiye mu kigo cye kuhafata ibikoresho asanzwe akoresha mu kazi kandi icyo gihe yari afunze kuko yamaze iminsi 22 umuryango we utazi aho aba.

Yabwiye urukiko ko inyandikomvugo zose yasinyiye mu Bugenzacyaha yabikoreshejwe ku gahato bitewe n’aho yari afungiye.

Ikijyanye n’amadolari 579 Ubushinjacyaha bumushinja ko yohererejwe na Cassien Ntamuhanga mu bikorwa byo kugura ibikoresho byo gukora ibiturika, yagihakanye avuga ko yayohererejwe n’Umunya-Kenya witwa Mugume Innocent nk’ikiguzi cyo kuzamukorera imashini zigezweho mu buhinzi yagombaga no gushyiraho uburyo burinda umutekano.

Urukiko rwabajije Karangwa impamvu atagaragaza amasezerano yagiranye na Mugume, asubiza ko bitari ngombwa mu mwuga yakoraga w’ubushabitsi ariko asobanura ko impapuro yayabikurijeho zihari.

Karangwa yavuze ko Ubushinjacyaha bwaranzwe no guhindura inyito y’ibyaha bumushinja, bityo ku bwe asanga bigagaraza ko ari ibihimbano, anasaba urukiko kuzabisuzumana ubushishozi, rukamugira umwere.

Umunyamategeko wunganira Karangwa Eliakim yavuze ko ibimenyetso bitangwa n’Ubushinjacyaha bidahagije, maze asaba ko urukiko kuzashishoza rukagira umwere umukiriya we.

Undi wakurikiyeho mu kwiregura ni Niyonkuru Emmanuel, uregwa ko yagombaga gushyikirizwa ibiturika na Phocas Ndayizera akazabiturikiriza za Gatsata na Nyacyonga mu Mujyi wa Kigali.

Niyonkuru yabwiye urukiko ko yaba Ntamuhanga Cassien na Phocas Ndayizera nta n’umwe azi kandi nta n’ibiganiro kuri telefoni Ubushinjacyaha bugaragaza ko bagiranaga, asaba kugirwa umwere.

Niyihoze Patrick, uregwa ko ari we wari ushinzwe gushaka abarwanyi bajya mu gisirikare cya RNC yahakanye ibyo aregwa, avuga ko atigeze abitekereza ndetse atazi n’amahame y’iryo huriro. Yavuze ko ibyo aregwa nta bimyenyetso byatangiwe, asaba urukiko kumugira umwere.

Bikorimana Bonheur na we yireguye ahakana ibyaha byose ashinjwa avuga ko mu bimenyetso byose Ubushinjacyaha bugaragaza nta na kimwe kimushinja.

Mu kwiregura kwa Bizimana Terence we yabwiye urukiko ko atemera ibyo Ubushinjacyaha bumurega ko yafatiwe i Rwamagana ari kumwe na mugenzi we Shiragahinda Erneste berekeza i Nyagatare bashaka kwambuka bajya muri Uganda mu Gisirikare cya RNC.

Yavuze ko i Rwamagana atahazi kuko atigeze ahagera na rimwe ahubwo ko we na Shiragahinda batandukaniye i Nyabugogo mu Mujyi wa Kigali.

Bizimana yabwiye urukiko ko icyaha ashinjwa cyo kugambirira kugirira nabi ubutegetsi bw’u Rwanda atacyemera kuko atigeze anabitekereza.

Abareganwa n’Umunyamakuru Phocas Ndayizera ni Karangwa Eliaquim, Niyonkuru Emmanuel alias Elungu, Niyihoze Patrick alias Nick, Byiringiro Garnon alias Bingo, Bikorimana Bonheur, Bizimana Terence, Munyensanga Martin alias Corbon, Mushimiyimana Yves, Nshimyumuremyi Jean Claude alias Kayima, Rutaganda Bosco, Nshiragahinda Erneste na Ukurikiyimfura Théoneste.

Urukiko rwasubitse iburanisha ryo kuri uyu wa Kane, ruvuga ko rizakomeza ku wa 25 Ugushyingo 2020 humvwa ubwiregure bw’abasigaye.

Umunyamakuru Phocas Ndayizera (uwa mbere iburyo) na bagenzi be basubiye imbere y'urukiko bisobanura ku byaha bashinjwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .