Abanyarwandakazi biyemeje kubyaza umusaruro urubuga rwashyiriweho abagore bo muri Afurika

Yanditswe na N.Kubwimana Janvière
Kuya 16 Ukwakira 2020 saa 10:08
Yasuwe :
0 0

Abanyarwandakazi bari mu bikorwa by’ubucuruzi bitandukanye biyemeje kubyaza umusaruro urubuga rwashyiriweho guteza imbere ba rwiyemezamirimo b’abagore muri Afurika ruzwi nka 50 Million African Women Speak Networking Platform (50MAWS).

50MAWS ni urubuga rwatangijwe n’Umuryango w’ibihugu byo muri Afurika y’iburasirazuba,EAC muri Kanama rwitezweho kongerera ba rwiyemezamirimo b’abagore bo muri Afurika ubushobozi bwo guhanga no kwagura imishinga yabo ndetse no kubona ahari amahirwe y’ishoramari.

Imigabo n’imigambi yo kubyaza uru rubuga umusaruro, aba banyarwandakazi bayigarutseho kuri uyu wa 15 Ukwakira ubwo rwatangizwaga mu Rwanda mu muhango wabereye mu Karere ka Musanze.

Iki gikorwa cyahuriranye kandi n’umunsi mpuzamahanga w’umugore wo mu cyaro, wari ufite insanganyamatsiko igira iti "umugore wo mu cyaro ku ruhembe rw’iterambere".

Minisitiri w’Uburinganire n’Iterambere ry’Umuryango, Bayisenge Jeannette, yasabye aba bagore kurushaho gukoresha uru rubuga no kurumenyekanisha, ndetse abemerera ubufatanye muri iki gikorwa kugira ngo barusheho guteza imbere ubucuruzi bwabo.

Ati "Aya ni amahirwe aje yiyongera ku yo twari dusanganywe, icyo dusaba abagore ni ugukoresha cyane uru rubuga barushaho kurumenyekanisha, bakoreshe neza telefone bafite babyaza umusaruro uru rubuga.”

“Natwe tuzakomeza kubafasha kurumenyekanisha, aho twatangiye guhugura abazahugura abandi, kugira ngo bigere no kuri wa mugore wo mu cyaro, abashe guteza imbere ibyo akora binyuze kuri uru rubuga."

Umunyamabanga Mukuru wungirije w’Umuryango wa Afurika y’Iburasirazuba (EAC), Bazivamo Christophe, yavuze ko uru rubuga rw’ikoranabuhanga rugamije gutanga amakuru no gufasha abagore kwiteza imbere mu rwego rw’ubucuruzi rukamenyekanisha ibyo bakora.

Yagize ati “Uru rubuga rugamije guhanahana amakuru yafasha abagore kwiteza imbere mu rwego rw’ubucuruzi, kuvugana bakamenya ibikorerwa mu bihugu runaka n’uburyo bashobora guhererekanya ibicuruzwa byabo bigakorwa ntawe uvuye aho ari."

Bamwe mu bagore bafite imishinga y’ubucuruzi, bavuga ko uru rubuga rwashyiriweho igihe, kuko rutuma abaguzi b’ibyo bakora biyongera, rukanatuma boroherwa no kunoza imishinga yabo bamwe bigira ku bandi.

Uwamahoro Ariane ukora ubucuruzi bw’ibikorerwa mu Rwanda byiganjemo ibiva mu bitenge yavuze ko uru rubuga arwitezeho byinshi.

Ati “Icyo mbona uru rubuga rugiye kumfasha ku bikorwa byanjye ni ukubimenyekanisha mu bindi bihugu no mu Rwanda hose kuko wasangaga ababizi ari abo muri Musanze nabo bake, bikazatuma abaguzi biyongera n’ubucuruzi bwanjye butere imbere."

Uwimbabazi Diane ufite umushinga wo gukora buji mu bimera nawe avuga ko uru rubuga ari inzira nziza yo kumenyekanisha ibikorerwa mu Rwanda mu bihugu bitandukanye,ibintu yasangaga hakirimo imbogamizi.

Yagize ati" Izi buji nkora zikorwa mu bimera bitandukanye hano iwacu, zikifashishwa mu kwirukana imibu, amasazi ndetse n’ubuzizi, bimaze kugaragara ko mu Rwanda hari ibyiza byinshi dukora ariko uburyo bwo kubimenyekanisha usanga bikigoranye, uru rubuga rero tuzarwifashisha turusheho kubimenyekanisha".

Umushinga wo gushyiraho uru rubuga uteganywa n’ingingo ya 122 y’amasezerano y’ishyirwaho rya EAC, igamije kongerera ubushobozi uruhare rw’umugore mu bikorwa by’ishoramari.

Uyu mushinga uzakorera mu bihugu 38 bya Afurika, washyizwe mu bikorwa na EAC ku bufatanye na COMESA na ECOWAS ku nkunga ya Banki Nyafurika Itsura Amajyambere (AfDB); nyuma yo kumurikwa mu nama ya Global Gender Summit yabereye i Kigali mu Ugushyingo mu 2019. Ibi bihugu 38 ibigize iyi miryango.

Minisitiri w'Uburinganire n'Iterambere ry'Umuryango, Bayisenge Jeannette yasabye abagore kubyaza umusaruro uru rubuga
Abagore biyemeje kubyaza umusaruro uru rubuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .