Abanyarwanda biga muri Kaminuza ya Nebraska bafite inzozi zo kuzamura urwego rw’ubuhinzi n’ingufu

Yanditswe na Mukaneza M.Ange
Kuya 18 Mutarama 2019 saa 01:30
Yasuwe :
0 0

Abanyarwanda 160 bafashijwe kujya kwiga muri Kaminuza ya Nebraska-Lincoln muri Leta Zunze Ubumwe za Amerika, bafite inzozi zo kugaruka mu Rwanda bagahindura inzego zitandukanye by’umwihariko izifitanye isano n’ubuhinzi, ubworozi n’ingufu zitanga umuriro w’amashanyarazi.

Aba banyeshuri bagiye kwiga muri Kaminuza ya Nebraska-Lincoln binyuze mu bufatanye bwa guverinoma y’u Rwanda n’Umuryango w’umuherwe Howard G. Buffett.

Lincoln Journal Star ivuga ko aba banyarwanda bagize igice kinini cy’abanyamahanga biga muri iriya kaminuza, bitabira kwiga amasomo yiganjemo arebana n’ubuhinzi, umutungo kamere, imiyoborere no kwihangira imirimo.

Umuyobozi ushinzwe abanyeshuri bitegura kurangiza icyiciro cya kabiri cya kaminuza mu Ishuri ry’Ubuhinzi rya Kaminuza ya Nebraska-Lincoln, Tiffany Heng-Moss, avuga ko mbere yo kugaruka mu gihugu bahabwa amahirwe yo kwihugura byisumbuyeho binyuze mu kwimenyereza akazi mu mishinga n’ibindi bigo.

Ati “ Ikigamijwe ni uko abahawe amahirwe yo kwiga basubira mu Rwanda, bagashyira impano n’imbaraga zabo mu kurushaho guteza imbere urwego rw’ubuhinzi”.

Berwa Lisa uri mu ba mbere bahawe amahirwe yo kwiga muri iyi kaminuza avuga ko mu ntego afite harimo guteza imbere imirire myiza.

Ati “ Ninsubira mu gihugu cyanjye, nibona muri gahunda z’imiryango ituye mu cyaro aho nzigisha abandi uburyo bwo gukoresha neza ubushakashatsi n’ibindi by’ibanze bisanzwe bihari”.

Ni mu gihe Kabanda Christian we yibanze ku birebana n’ingufu, aho mu ntego afite harimo gutanga umusanzu mu gutuma umuriro w’amashanyarazi ugera ku Banyarwanda bose, bakava kuri 40% bawufite uyu munsi.

Umuryango Howard G.Buffet Foundation, uyoborwa n’umuhungu we Warren Buffet wiyemeje korohereza Abanyarwanda 200 kuminuza muri Kaminuza ya Nebraska-Lincoln, bakazatanga umusanzu mu iterambere ry’u Rwanda.

Usanzwe kandi utera inkunga imishinga igamije guteza imbere ubuhinzi, imirire myiza n’ibikorwa by’ubutabazi.

Berwa na Kabanda biteguye kugaruka mu Rwanda bagatanga umusanzu mu guteza imbere inzego zirimo ubuhinzi n'ingufu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza