Abanyarwanda baba muri Australia banyomoje Zihabamwe uvuga ko yatotejwe na Leta y’u Rwanda

Yanditswe na Uwimana Abraham
Kuya 20 Ukwakira 2020 saa 09:32
Yasuwe :
0 0

Abanyarwanda baba muri Australia banyomoje ibirego byavuzwe n’Umunyarwanda witwa Zihabamwe Noel, ushinja Leta y’u Rwanda kumutera ubwoba nyuma yo kwanga kuyibera maneko, bavuga ko ibyo birego nta gaciro bifite ko bigamije guharabika Leta y’u Rwanda gusa.

Noel Zihabamwe ni umunyarwanda wavuye mu gihugu mu 2006 ajya muri Australia nk’impunzi. Mu 2017 yaje gutangira kuvuga ko umutekano we uri mu kaga kubera ko yanze kuba maneko wa Leta y’u Rwanda. Uretse ibi yaje kuvuga ko kandi hari abavandimwe be babiri bashimuswe nyuma yo kugeza iri totezwa akorerwa na Leta y’u Rwanda k’ubuyobozi bwa Australia.

Mu nyandiko, umuyobozi wa Diaspora Nyarwanda muri New South Wales Ngenzi Evariste, yasohoye ku wa mbere tariki ya 19 Ukwakira yibajije impamvu Leta y’u Rwanda yashaka kwinjiza mu kazi umuntu wo kubakorera muri Australia, avuga ko bitumvikana.

Impamvu ngo ni uko umubare munini w’abagize diaspora Nyarwanda mu bihugu byose, bashyigikiye igihugu cyabo mu rugendo rwo kwiyubaka nyuma ya Jenoside yakorewe Abatutsi mu 1994.

Ngenzi yavuze ko bafashe umwanzuro wo kuvuga bamagana ibi birego kuko bashaka ko Abanya-Australia bumva ko u Rwanda ari kimwe mu bihugu biri kwihuta mu iterambere muri Afurika, rukaba ari n’ahantu hatekanye Abanya-Australia b’abakerarugendo n’abashoramari bakwerekeza.

Diaspora yamaganiye kure ibirego bya Zihabamwe unavuga ko bene wabo baburiwe irengero mu Rwanda kubera ko yanze kuba maneko w’u Rwanda.

Ngenzi yagize ati “Nyuma y’umwaka havuzwe ko babuze, kuki ikibazo kitagejejwe ku bayobozi bireba mu Rwanda?”

Yongeyeho ati “Ni gute abantu baburira mu gihugu kimwe mu gihe kirenze umwaka, hanyuma ibyo bigatangarizwa mu kindi gihugu (Australia) kiri kure cyane y’icyo ngicyo?”

Ngenzi yavuze ko itangazamakuru rya Australia ryakoreshejwe ku bw’impamvu zihishe, rikoreshwa n’abantu bashakaga inzira yoroshye yo kugira ngo imiryango yabo igezwe muri Australia.

Yagize ati “Ibi turabizi ko byagiye bibaho mu bihe byashize.”

Yongeyeho ko abo bavugwaga ko baburiwe irengero, basangwa mu nkambi z’impunzi zo mu bihugu bituranyi, bakavuga ko bahunze itotezwa rya Leta y’u Rwanda, kugira ngo bongerere imbaraga ubusabe bwabo bwo kwemererwa kujya gutura muri Australia basanzeyo bene wabo.

Indi mpamvu yavuze ngo ni uko na none bikoreshwa kugira ngo baharabike Leta y’u Rwanda, nk’imwe mu iturufu ikoreshwa n’abayirwanya bari mu buhungiro.

Yavuze ko hari benshi mu barwanya Leta y’u Rwanda bagiye basura Australia mu bihe bitandukanye, barimo na Paul Rusesabagina kuri ubu uri mu maboko y’ubutabera mu Rwanda, akaba aheruka mu mujyi wa Brisbane mu 2018.

Mu bandi barwanya u Rwanda bagiye basura Australia, Ngenzi yavuze ko barimo Padiri Nahimana Thomas, ujya uvuga ko ari perezida wa Guverinoma y’u Rwanda ikorera mu buhungiro.

Yavuze ko ari inshuti ya hafi y’uyu Zihabamwe, ndetse ko bakunze guhurira i Sydney bari kumwe n’abanyapolitiki b’Abanya-Australia benshi.

Ngenzi yavuze ko Abanyarwanda baba hanze iyo batijandika mu bikorwa byo kurwanya Leta y’u Rwanda, bitwa maneko za Leta y’u Rwanda, bagashijwa gutoteza abo batavuga rumwe n’ubutegetsi kandi atari ukuri.

Yagize ati “Ibi birego nta kimenyetso na kimwe biba bifite, uretse ibihimbano binyuzwa mu binyamakuru no ku mateleviziyo, njyewe n’abandi bayobozi ba za Diaspora Nyarwanda, dushaka ko ukuri kuvugwa, kukandikwa, kugira ngo bene wacu batuye mu Rwanda ntibahangayikishwe n’umutekano wacu, ndetse n’igihugu cyacu kitandurizwa isura n’abafite indi migambi.”

Noel Zihabamwe yamaganywe na bagenzi be baba muri Australia bavuga ko ibirego ashinja Leta y'u Rwanda nta shingiro bifite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .