00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda 103 barimo abahunze mu 1994 batahutse bavuye muri RDC (Amafoto)

Yanditswe na Akayezu Jean de Dieu
Kuya 7 July 2022 saa 09:40
Yasuwe :

Leta y’u Rwanda yakiriye Abanyarwanda 103 batahutse baturutse muri Repubulika ya Demokarasi ya Congo aho bari bamaze imyaka baba mu nkambi zitandukanye nk’impunzi zagezeyo mu 1994 ubwo Jenoside yakorewe Abatutsi yabaga na nyuma yaho.

Abahungutse bageze mu Rwanda ku mugoroba wo ku wa Gatatu, tariki 6 Nyakanga 2022, bakirirwa mu Nkambi y’Agateganyo ya Kijote iri mu Murenge wa Bigogwe, Akarere ka Nyabihu mu Ntara y’Iburengerazuba.

Ni abo mu miryango 36 biganjemo abana kuko ari 65 mu gihe abagabo ari 15 naho abagore bakaba 23.

Umuhango wo kubakira ku mugaragaro wabaye kuri uyu wa Kane witabirwa n’Umuyobozi uhuza Ibikorwa by’imishinga muri Minisiteri Ishinzwe Ibikorwa by’Ubutabazi [MINEMA], Ingabire Veneranda wari kumwe n’Umuyobozi w’Ishami rya UNHCR mu Burengerazuba, Francis Ezike Okagu n’abandi bayobozi mu nzego zitandukanye.

Imibare ya Minema igaragaza ko kuva mu 1994, ubwo Jenoside yakorewe Abatutsi yari imaze guhagarikwa na FPR Inkotanyi, abagera kuri miliyoni 3,5 bamaze guhunguka bava mu bihugu bitandukanye bari barahungiyemo.

Iyo bageze mu Rwanda bafashwa gusubizwa mu buzima busanzwe, bakagezwa mu miryango yabo, ubundi bagafatanya n’abandi mu bikorwa byo kwiteza imbere no kubaka igihugu cyabo.

Ingabire yabwiye IGIHE ko aba bakiriwe uyu munsi bazamara ibyumweru bibiri muri Nkambi y’Agateganyo ya Kijote, aho bazaba barimo gutanga amakuru y’ibanze ku myirondoro yabo, aho bakomoka n’ibindi.

Bazanafashwa mu bijyanye n’irangamimerere, abafite imyorondoro yuzuye bagafotorwa bagahabwa indangamuntu n’ibindi. Bazanapimwa indwara zirimo Covid-19, banakingirwe ku batarafashe inkingo.

Ingabire ati “Iyo bamaze kwitegura bihagije, bahabwa ubufasha bakajya mu miryango yabo no mu turere bakomokamo. Twabahaye ikaze, tubabwira ko amarembo y’igihugu ahora afunguye icyo basabwa ari ukuza bagafatanya n’abandi gufatanya mu iterambere no kubaka igihugu cyabo.”

Yakomeje agira ati “Ikindi twabasabye ni ukubabwira ngo nk’uko mugeze hano, murasabwa kubana neza n’imiryango yanyu n’abaturanyi banyu. Mwegere ubuyobozi bw’inzego z’ibanze muhabwe amakuru kuri gahunda zihari zirimo Umuganda, Ejo Heza n’izindi zitandukanye.”

Ku ruhande rw’Ishami ry’Umuryango w’Abibumbye ryita ku Mpunzi, UNHCR, Francis Ezike Okagu, yavuze ko ari ishema kwakira aba Banyarwanda bahungutse bataha mu gihugu cyabo.

Ati “Ku bijyanye no guhunguka, iki ni imwe mu ntsinzi za UNHCR, iyo impunzi itashye ku bushake ikagera mu gihugu cyayo nyuma y’imyaka myinshi, ikagera mu gihugu ikakirwa, igasubizwa mu buzima busanzwe igatekana mu gihugu cyayo. Ni yo mpamvu iki ari igikorwa cy’ingenzi kandi turakishimiye.”

Aba Banyarwanda barahabwa amafaranga abafasha gutangira ubuzima, aho umuntu mukuru ahabwa 250$ [ibihumbi 250 Frw], abana bagahabwa 150$. Ikindi kandi bishyurirwa ubwisungane mu kwivuza, abana bagafashwa kujya mu mashuri yaba asanzwe cyangwa ay’imyuga n’ibindi bibafasha kwisanga mu Muryango Nyarwanda.

Ubuzima bw’ubuhunzi n’intambara z’urudaca muri RDC

Aba banyarwanda batashye bagaragaza ko ikibazo cy’umutekano muke mu Burasirazuba bwa RDC n’imibereho mibi, biri ku isonga mu byatumye bataha bava mu buhunzi bari bamazemo imyaka 28, bivuze ko bamwe bavukiye mu buhungiro.

Uwase Immaculée avuga ko yavutse muri Nyakanga 1994, kubera ko umubyeyi we yahunze amutwite. Yavukiye ahitwa i Mweso mu Mujyi wa Kitchanga uri mu Burasirazuba bwa RDC.

Iyo asobanura uko yamenye ko ari impunzi, Uwase agira ati “Twatangiye kujya twumva bavuga ko turi impunzi, natwe tukajya tubona uyu munsi turi hano, ejo tukaba twimutse twagiye ahandi, nibwo naje kumenya ko turi impunzi twaturutse mu Rwanda.”

Yakomeje agira ati “Mama twajyaga tumubaza amateka yabaye, akatubwira ko mu Rwanda habayeho kwicana hakaba Jenoside yakorewe Abatutsi. Nakuriye muri ubwo buzima na basaza banjye, kugeza ubwo nakuze nshaka umugabo, ntandukana n’abo mu muryango wanjye.”

Uwase avuga ko ubuzima bwo mu buhungiro bwari bumeze nabi cyane ko igihugu babagamo cyahoragamo ibibazo by’intambara, gutoteza abavuga Ikinyarwanda n’ibindi.

Ati “Twabayeho mu buzima bubi bw’intambara, twari tubayeho nabi cyane kuko hari kwica umuntu urimo kureba n’amaso nta kintu biba bivuze, kwitwa ngo uri kuvuga Ikinyarwanda ukabona baguciye umutwe batereye hariya barigendeye, ni ibintu byari bisanzwe hariya.”

Yakomeje agira ati “Kumva ngo hano haturute FDLR, ngo hariya haturutse Nyatura, Raïa Mutomboki, mu kanya mukumva ngo haje n’izindi za Mai Mai […] ni utuntu tw’udutwe twinshi duhora dushoza intambara, bigatuma tubaho mu buzima bwo kwirirwa twimuka duhunga buri munsi.”

Uwitwa Mapendo Ruzagiriza Aimé wavukiye i Musanze mu 1994, akaza guhungana n’ababyeyi yaje gukura aziko ari Umunye-Congo gusa nyuma aza kumenya ubwenge bamubwira ko ari Umunyarwanda.

Ati “Nakuriye ahantu hitwa i Gicanga [muri Kivu y’Amajyaruguru’], ubuzima bwo gukurira mu buhungiro bwari bugoye, wasangaga ibintu by’intambara bihoraho, kwiga bikaba ikibazo, mbese ubuzima bwari bubi.”

Yavuze ko yaje kugira amahirwe akiga amashuri kugeza ku yisumbuye aho yize ‘Uburezi’, gusa ntabwo yagize amahirwe yo kubona akazi ko kwigisha uretse ko kuri ubu yakoraga ako kurinda umutekano.

Abatahutse bavuze ko bishimiye kongera kugera mu gihugu cyabo

Bageze ku butaka bw’isezerano….

Byari akanyamuneza ubwo aba Banyarwanda bageraga mu gihugu cyabo ndetse abenshi mu butumwa batanze bagarutse ku buzima bushaririye bari babayemo ubwo babaga mu buhunzi, itotezwa bakorerwaga bitwa ’Aba-Nomades’ n’ibindi bikorwa byatumaga bumva bifuje kugira igihugu cyabo.

Abenshi mu batahutse barimo abakiri bato bavutse nyuma ya Jenoside yakorewe Abatutsi ku buryo baboneye izuba mu buhungiro mu mashyamba ya Repubulika Iharanira Demokarasi ya Congo.

Uwase avuga ko gufata icyemezo cyo gutaha yabitekerejeho nyuma yo kumenya amakuru y’uko abo babanaga batashye bakagera mu Rwanda bakakirwa neza.

Ati “Twumvaga dufite iyo gahunda yo kuvuga ngo twataha ariko bikagenda bizamo imbogamizi. Ariko ubu nishimiye ko nageze mu gihugu cyanjye nkakirwa nk’umwana uje iwabo.”

Yakomeje agira ati “Twatunguwe no kubona tugeze mu Rwanda bakatwakira nk’abami, uburyo batwakiriye natwe ubwacu twamwaye bitewe n’imyumvire twari dufite. Twageze aha amahoro, batwakiriye neza, baduha buri kimwe, amazi meza n’isabune turakaraba baradusiga.”

Mapendo ati “Nyuma yo kumenya ko u Rwanda rwakira abantu ni bwo nafashe umwanzuro wo kujya kuri UNHCR nkavuga ko nshaka gutaha, ubwo nari maze ukwezi muri icyo kigo, ejo batubwira ko tugomba gutaha, none ubu turi mu gihugu cyacyo.”

Yakomeje agira ati “Hano nakiriwe neza kandi nizeye ko nzajya kureba abavandimwe banjye kubera ko hari abo tuvugana bari hirya no hino mu gihugu, ubundi ntangire ubuzima busanzwe, mfatanye nabo kubaka igihugu.”

Francis Ezike Okagu uhagarariye UNHCR yavuze ko ikintu kibabaje kandi kigomba kuganirwaho n’impande zombi ari uko hari Abanyarwanda bari mu nkambi cyangwa mu bindi bice bya RDC bajya bashaka gutaha bakabuzwa.

Ati “Ikintu kibabaje namenye uyu munsi ni uko hari impunzi ziri muri RDC zijya zumva amakuru ya hano mu Rwanda zigashaka gutaha ariko ubuyobozi bukazangira cyangwa bugatambamira ibyifuzo byabo.”

Yakomeje agira ati “Turateganya kugirana inama na bagenzi bacu ba UNHCR muri RDC, icyo kibazo nzakibagezaho kugira ngo barebe uko bakorana na Guverinoma kugira ngo babe batanga ishusho y’ibiri kubera hano mu Rwanda.”

Ingabire Veneranda ushinzwe guhuza Ibikorwa bya MINEMA avuga ko ku ruhande rwa Guverinoma y’u Rwanda bazakomeza kuganira n’inzego zo mu bihugu nka RDC icumbikiye impunzi z’Abanyarwanda kugira ngo bose babashe gutaha mu Rwababyaye.

Abatashye barimo n'abasore ubona ko bavutse nyuma ya Jenoside yakorewe Abatutsi, ni ukuvuga ko bavukiye mu buhungiro
Abanyarwanda batahutse mu gihugu cyabo bavuga ko bicuza igihe cyose bataye mu buhungiro
Abayobozi mu nzego zitandukanye bitabiriye igikorwa cyo kwakira Abanyarwanda batahutse bavuye muri RDC
Abanyarwanda batahutse barimo n'ababyeyi bafite abana bato
Baganirijwe mu guhabwa ikaze, banasobanurirwa aho rugeze u Rwanda
Francis Ezike Okagu uhagarariye UNHCR mu Ntara y'Iburengerazuba yashimye uburyo u Rwanda rukomeje guha ikaze abaturage barwo bari barahungiye mu bihugu bitandukanye
Ingabire Veneranda ushinzwe guhuza Ibikorwa bya MINEMA yavuze ko u Rwanda rukomeje gushishikariza Abanyarwanda bahunze gutaha mu gihugu cyabo
Mapendo Ruzagiriza avuga ko yavukiye i Musanze mu 1994, agahungana n'ababyeyi be bamuhetse ariko ubu akaba atakibana na bo yatahutse wenyine
Umuyobozi uhuza Ibikorwa by'Imishinga muri Minisiteri Ishinzwe Ibikorwa by’Ubutabazi, Ingabire Veneranda (hagati) yashimye Abanyarwanda bafashe icyemezo cyo gutaha ku bushake
Uyu mubyeyi ni umwe mu batahutse mu gihugu cyabo, afite n'umwana ukiri muto
Uyu mubyeyi ni umwe mu batahutse mu gihugu cyabo, afite n'umwana ukiri muto
Uyu mubyeyi ni umwe mu batahutse mu gihugu cyabo, afite n'umwana ukiri muto

Amafoto: Munyakazi Emile


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .