Abangavu barenga ibihumbi 70 mu Rwanda barasambanyijwe banaterwa inda guhera mu 2016

Yanditswe na Evariste Nsengimana
Kuya 19 Ugushyingo 2019 saa 11:56
Yasuwe :
0 0

Minisiteri y’Uburinganire n’Iterambere ry’Umuryango (Migeprof) igaragaza ko ikibazo cyo gusambanya abana no kubatera inda gikomeje gufata indi ntera, igasaba inzego zitandukanye, by’umwihariko abagabo gufatanya mu gukumira iki kibazo kigira ingaruka zikomeye ku muryango nyarwanda.

Imibare igaragaza ko mu mwaka wa 2016, abangavu basambanyijwe bakabyarira kwa muganga bari ibihumbi 17 849, mu 2017 bagabanutseho gake bagera kuri 17337. Gusa iyi mibare yongeye kuzamuka mu mwaka wa 2018 igera kuri 19 832 mu gihe guhera muri Mutarama 2019 kugera muri Kanama imibare yabo yari imaze kugera kuri 15 596. Bivuze ko bose hamwe ari 70 614 guhera mu 2016.

Intara y’Uburasirazuba niyo iza ku isonga mu kugira umubare munini w’abangavu basambanyijwe bakanaterwa inda kuko hagati ya 2016 na 2018 bari 19 838, bangana na 36.1% by’abangavu bose [barenga ibihumbi 70] basambanyijwe bakanaterwa inda.

Iyi Ntara ikurikirwa n’iy’Amajyepfo yihariye ifite 11 572 (21%), iy’Amajyaruguru ikagira 16.5% (9 112), Uburengerazuba bukagira 15.2% (8 343) naho Umujyi wa Kigali ukagira 11.2%, bangana na 6153.

Nubwo imibare y’abangavu basambanywa bakanaterwa inda ikomeza kwiyongera, igiteye inkeke ni uko abagabo n’abasore babasambanya badafatwa ngo bashyikirizwe ubutabera uko bikwiye, rimwe na rimwe bitewe no kubahishira bigirwamo uruhare n’inzego zitandukanye.

Imibare y’Ubushinjacyaha bw’u Rwanda igaragaza ko mu mwaka wa 2018/19, abagabo bakekwagaho ibyaha byo gusambanya abangavu byari 3320, mu 2017/18 bari 2926 naho mu mwaka wawubanjirije bari 2030. Abagore bakekwagaho gusambanya abana bavuye kuri 62 mu 2016/17 bagera kuri 75 mu 2017/18 naho mu 2018/19 bagera kuri 97.

Muri abo bose bakekwagaho icyaha cyo gusambanya abangavu, mu 2018/19 ibyoherejwe mu nkiko byari 2221, mu 2017/18 byari 1866 naho mu 2016/17 byari 1285.

Mu manza 1673 zashyikirijwe Inkiko mu 2018/19 hahanwe abantu 1222. Mu manza 1480 zashyirijwe inkiko mu 2017/18, abahanwe ni 1168 mu gihe mu mwaka wawubanjirije haburanishijwe imanza 1355 zisiga abantu 1109 ari bo bahanwe gusa.

Minisitiri w’Uburinganire n’Iterambere ry’Umuryango, Nyirahabimana Solina yavuze ko inzego zitandukanye zikwiye gushyira hamwe mu gukumira ko abangavu bakomeza gusambanywa no guterwa inda.

Hari mu nama nyunguranabitekerezo ifite insanganyamatsiko igira iti “Turere u Rwanda turwanya isanambanywa ry’abana.” Yabaye kuri uyu wa 19 Ugushyingo, ku munsi mpuzamahanga w’umugabo.

Minisitiri Nyirahabimana yavuze ko mu Rwanda abana 7% bari hagati y’imyaka 15- 19 baba barabyaye, byerekana uguta indangagaciro n’umuco bya Kinyarwanda zo kwirinda ibintu byose bihohotera abana.

Ati “Gusambanya abana ntabwo ari umuco wa Kinyarwanda, mureke tubirwanye twivuye inyuma. Guhishira abasambanya abana nabyo si umuco nyarwanda, ni ngombwa kubavuga kugira ngo babihanirwe ariko ikiruta byose ni ugukumira ko umwana w’umunyarwanda asambanywa.”

Minisitiri Nyirahabimana yavuze ko abagabo b’abanyarwanda bakwiye kongera imbaraga mu gusigasira umuryango nyarwanda by’umwihariko gusambanya abana, ashimira abafashe iya mbere mu kubikumira.

Igitabo cy’amategeko ahana ibyaha mu Rwanda giteganya ko umuntu uhamijwe icyaha cyo gusambanya umwana uri munsi y’imyaka 18 ahanishwa igifungo kitari munsi y’imyaka 20 ariko kitarenze imyaka 25.

Iyo gusambanya umwana byakorewe ku mwana uri munsi y’imyaka 14 igihano kiba igifungo cya burundu kidashobora kugabanywa naho iyo byamuteye indwara idakira cyangwa ubumuga, igihano kiba igifungo cya burundu. Iyo gusambanya umwana byakurikiwe no kubana nk’umugabo n’umugore, igihano kiba igifungo cya burundu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza