00:00:00 IGIHE NETWORK KN KINYARWANDA EN ENGLISH FR FRANCAIS

‘Abahunnyi’, agatsiko k’abajura kajujubije abaturage i Gicumbi

Yanditswe na Evence Ngirabatware
Kuya 9 August 2022 saa 01:25
Yasuwe :

Niba utuye mu Karere ka Gicumbi, birashoboka ko waba uzi izina ‘abahunnyi’, aka ni agatsiko k’abantu bitwaza intwaro gakondo bakora urugomo rwo gukomeretsa abaturage, kwangiza ibidukikije n’ubujura bw’amabuye y’agaciro.

Utekereje kwitambika ibikorwa by’aka gatsiko k’abagizi ba nabi gasiga kamukomerekeje. Ni ikibazo abaturage bavuga ko kigomba guhagurukirwa n’inzego zitandukanye.

Ni ibikorwa bigaragara cyane mu mudugudu wa Gashirira, Akagari ka Gashirira mu Murenge wa Ruvune.

Abahunnyi cyangwa imparata ni agatsiko k’abantu biba ku ngufu amabuye y’agaciro ya Wolfram. Aba bagendana ibyuma byo gukomeretsa abantu nk’imihoro wongeyeho inkoni.

Umuturage wakomerekejwe n’aka gatsiko yabwiye IGIHE ati “Abahunnyi baza ari igitero, baba ahitwa muri Nyarwina muri Gashirira, njye barankomerekeje banteye aho ikigo gikorera, bankubita ikibando mu mutwe”.

Uyu muturage ushinzwe gucunga umutekano mu kigo cya U.H Mining Ltd, gicukura amabuye ya Wolfram, avuga ko hari n’abandi bakomerekejwe mu minsi mike ishize.

Ati “Umwe bamutemye mu mutwe n’undi bamukubita ikintu mu mutwe hashize ukwezi bibaye”.

Undi muturage yavuze ko abahunnyi iyo bagiye kwiba baba ari benshi ku buryo abacunga umutekano bababona bakiruka kuko baba babarusha intege. Aba baturage basaba ko banahabwa ubwishingizi kugira ngo uwakomeretse ajye avuzwa neza.

Umukozi w’iki kigo gicukura amabuye y’agaciro, yabwiye IGIHE ko kuwa 6 Kanama 2022 abahunnyi na bwo bateye ikigo gicukura amabuye y’agaciro, bangiza ibikorwa, bakomeretsa abakozi bashinzwe umutekano.

Ati “Iyo baje bagendana intwaro gakondo imihoro, amafuni, ibisongo n’ibindi byose, ubwa mbere bateye mu kigo bagenda bakomerekeje ushinzwe umutekano mu mutwe, ubwa kabiri baje barenga 60 ubona ko ari igitero bakubita umukozi wacu ifuni mu mutwe, undi na we bamukubita umuhoro mu mutwe baramukoretsa cyane”.

Umunyamabanga Nshingwabikorwa w’Akagari ka Gashirira, Mukarubayiza Dancille, avuga ko iki kibazo bakizi kandi ko babimenyesheje inzego zibakuriye basaba ubufatanye mu gukumira ibi byaha bimaze gukomerekeramo abaturage batandukanye.

Ati “Abaturage turabasaba gukora irondo rifite ingufu, twakumva hari igikomye twese tukagendera rimwe nta muntu n’umwe usigaye kugira ngo turebe ko twakumira abo bahunnyi cyangwa imparata”.

Umunyamabanga Nshingwabikorwa w’Umurenge wa Ruvune, Beningoma Oscar, avuga ko iki kibazo gikomeje gukurikiranwa ngo bamenye neza ababyihishe inyuma kuko hari abafatwa hakabura gihamya bityo bakaba bari gucunga abazafatirwa mu cyuho.

Ati “Ibikorwa byo kwigomeka ntibikwiye, abashaka akazi baragasaba bakagahabwa ndetse n’ikigo gicukura amabuye kigomba gushaka abakozi bacunga umutekano kuko ari ku musozi uri wonyine”.

Umuyobozi w’Akarere ka Gicumbi, Nzabonimpa Emmanuel yavuze ko aherutse gusura aho iki kigo gicukura amabuye gikorera, aho bari kuganira ngo barebe icyakorwa harimo no gushaka abarinzi bafite imbunda.

Yihanangirije abiyita abahunnyi ko inzego zose zabahagurukiye uzafatwa akazahanwa nta kujenjeka.

Yagize ati “Ababyihishe inyuma bamenye ko tutazacika intege mu guhangana na bo ndetse turaza no kureba uburyo twaganira n’ inzego zishinzwe umutekano, turebe niba twaganira uburyo muri uyu murenge bakwegerezwa sitasiyo ya polisi, nabyo ni imwe mu nzira tubona yatanga igisubizo”.

Aba baturage bagaragaza ko kuba muri uyu murenge wa Ruvune nta sitasiyo ya polisi ihari ari ikibazo gikomeye kuko uwo abaturage bafashe akekwaho icyaha bamwijyanira i Rutare cyangwa Bwisige bamutegeye moto.

Umurenge wa Ruvune wegeranye n’akarere ka Gatsibo, akenshi iyo abahunnyi bahanganye n’abaje kubakumira, biruka bajya mu karere ka Gatsibo.

Kugera aha hantu hacukurwa amabuye y'agaciro ntabwo byoroshye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .