00:00:00 IGIHE NETWORK KN KINYARWANDA EN ENGLISH FR FRANCAIS

Abahagarariye u Rwanda muri EALA barahiye mu Nteko ya mbere irimo aba RDC (Amafoto)

Yanditswe na Akayezu Jean de Dieu
Kuya 20 Ukuboza 2022 saa 07:38
Yasuwe :

Abanyarwanda icyenda bahagarariye u Rwanda mu Nteko Ishinga Amategeko y’Umuryango wa Afurika y’Iburasirazuba (EALA), barahiriye gutangira inshingano zabo.

Ibirori byo kurahiza aba badepite byabereye i Arusha muri Tanzania ahari Icyicaro Gikuru cya EAC, kuri uyu wa Mbere tariki 19 Ukuboza 2022.

Abadepite bahagarariye ibihugu birindwi birimo u Rwanda,u Burundi, Uganda, Tanzania, Sudani y’Epfo, Kenya na Repubulika Iharanira Demukarasi ya Congo, nibo bagize EALA ya Gatanu ibayeho kuva uyu muryango washingwa.

U Rwanda ruhagarariwe na Fatuma Nyirakobwa Ndangiza, Kayonga Caroline Rwivanga, Harebamungu Mathias, Musangabatware Clement, Dr Nyiramana Aisha, Uwumukiza Françoise, Rutazana Francine, Iradukunda Alodie na Bahati Alex.

Ni ku nshuro ya mbere, RDC igize abayihagarariye muri EALA kuva yakwakirwa muri uyu muryango. Abahagarariye iki gihugu giherereye mu Burengerazuba bw’u Rwanda barimo Ewanga Isewanga Iwoka Jean Bertrand n’abandi.

EALA igengwa n’ingingo ya cyenda y’amasezerano ashyiraho Umuryango wa EAC. Ni amasezerano yasinywe bwa mbere tariki 30 Ugushyingo 1999, aza gutangira gushyirwa mu bikorwa tariki 7 Nyakanga 2000.

Ibihugu bya Uganda, Kenya na Tanzania nibyo byatangiranye n’uyu muryango wa EAC nyuma u Rwanda n’u Burundi mu 2007, nabyo birayemeza mu gihe Sudani y’Epfo yaje kwinjira muri uyu muryango mu 2016.

Nk’uko biteganywa n’ayo masezerano, buri gihugu gihagararirwa n’Abadepite icyenda batorwa. EALA ifite intego zirimo gutora amategeko agenga uyu muryango, kugenzura ibikorwa bya za guverinoma ndetse no gukora ubuvugizi ku bibazo bitandukanye byugarije abaturage b’uyu muryango.

EALA kandi ijya impaka ikanatanga ibitekerezo ku ngengo y’imari y’uyu muryango ikenewe ndetse n’uburyo yakoreshwa, ikagenzura raporo zitandukanye z’ibikorwa by’uyu muryango ndetse ikanabitangaho ibitekerezo.

Inteko ya EALA igira komisiyo zitandukanye zirimo ishinzwe kugenzura imikoreshereze y’umutungo, ishinzwe amategeko n’amabwiriza, ishinzwe ubuhinzi, ubukerarugendo n’umutungo kamere, ishinzwe gahunda z’Akarere no gukemura amakimbirane, ishinzwe itumanaho, ubucuruzi n’ishoramari.

Ewanga Isewanga Iwoka Jean Bertrand uri mu bahagarariye RDC muri EALA
Fatuma Ndangiza
Iradukunda Alodie
Harebamungu Mathias
Kalala Kwete Evariste na we ni umwe mu bahagarariye RDC muri EALA
Kayonga Caroline Rwivanga
Musangabatware Clement
Nyiramana Aisha
Uwumukiza Françoise

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .