Abadepite batoye itegeko ryemeza iyubakwa ry’Uruganda rukoresha ingufu za Nucléaire mu Rwanda

Yanditswe na Twarabanye Venuste
Kuya 15 Kamena 2020 saa 08:11
Yasuwe :
0 0

Inteko rusange y’Umutwe w’Abadepite mu Nteko Ishinga Amategeko y’u Rwanda yatoye itegeko ryemera kwemeza burundu amasezerano hagati ya Guverinoma y’u Rwanda n’iy’u Burusiya y’ubufatanye mu kubaka Ikigo cy’Ubumenyi n’Ikoranabuhanga mu bya Nucléaire ku butaka bw’u Rwanda.

Mu mpera za Gashyantare 2020 nibwo Abadepite bemeje ishingiro ry’umushinga wo kubaka Ikigo cy’Ubumenyi n’Ikoranabuhanga mu bya Nucléaire mu Rwanda, nyuma y’amasezerano y’u Rwanda n’u Burusiya, yasinyiwe i Sochi, ku wa 24 Ukwakira mu 2019.

Ku Gicamunsi cyo kuri uyu wa 15 Kamena 2020 Inteko rusange y’Umutwe w’Abadepite yatoye itegeko ryemeza ko ayo masezerano yakwemezwa burundu ikigo kikubakwa. Ni itegeko ryatowe n’abadepite 76 muri 78 bitabiriye inteko rusange y’uyu munsi.

Abadepite babiri baryanze ni abo mu Ishyaka riharanira Demokarasi no kurengera Ibidukikije mu Rwanda (Democratic Green Party of Rwanda) Dr. Frank Habineza na Jean Claude Ntezimana.

Dr. Frank Habineza yumvikanye yamagana cyane iby’uwo mushinga ndetse avuga ko bishoboka wasubizwa inyuma ntutorwe, avuga ko ari uwo kuzanira Abanyarwanda ibyago.

Ati “Nk’uko tubizi ahantu hari za Nucléaire hapfa abantu bari muri za miliyoni. Dore n’ubu ukuntu Abanyarwanda dutuye n’uko ubucucike bwacu bumeze, ahantu yaba hose nta ho wavuga ngo hariherereye honyine wayishyira ngo ntizagire ikibazo ku Banyarwanda kandi ingaruka zayo zimara igihe kirekire cyane. Si akantu koroshye nka sitasiyo ya lisansi cyangwa guturana n’umunara wa telefoni, oya rwose ni uguturana n’igisasu, noneho n’igisasu cya Nucléaire ntabwo ari n’igisasu kiri aho wavuga ngo icya Katyusha, oya ni icya kirimbuzi.”

Yashimangiye igitekerezo cye avuga ko hari ibihugu nk’u Budage na Suède byatangiye gukuraho izo ngufu za Nucléaire.

Dr Habineza yavuze ko ibihugu bya Afurika nka Afurika y’Epfo biri guteza imbere izo ngufu ariko ko nta butore bwo kugifatiraho urugero, ngo igihugu gikore ibyo yise ‘kwizirikaho igisasu’.

Ati “Ntabwo ari ikintu cyo kwishimira wavuga ngo dufateho urugero tuzabe intore muri icyo kintu, nta butore buri muri ibi bintu ahubwo ni ukwizirikaho igisasu kizaturimbura. Nasabaga yuko uyu mushinga bawusubizayo bishobotse.”

Perezida wa Komisiyo y’Uburezi, Ikoranabuhanga, Umuco n’Urubyiruko yasuzumye umushinga w’iryo tegeko, Depite Nyabyenda Damien, yavuze ko hazabaho inyigo irimo iyigangaruka zaterwa n’impanuka ishobora kuba ariko hakaba n’amasezerano mpuzamahanga ibihugu bisinya mu gushyira mu bikorwa uwo mushinga hakubiyemo no kwita ku ngaruka zawukomokaho.

Yavuze ko nubwo ibihugu bike muri Afurika aribyo bimaze gukora uwo mushinga u Rwanda rufite ubwigenge bwo gukora umushinga wafasha mu iterambere rutarebeye ku bindi bihugu.

Minisitiri w’Ibikorwaremezo, Amb Claver Gatete, witabiriye Inteko ahagarariye Guverinoma yavuze ko hagendewe ku cyerekezo 2050 u Rwanda rwiteze ko siyansi yazaba ifite uruhare runini mu nzego zitandukanye z’ubuzima byaba ari ikibazo hadakoreshejwe ingufu za Nucléaire.

Ati “Tutabikoze na gato tukabyihorera twagira ikibazo ahubwo gikomeye cyane kubera ko ari ibyo kurya dukura hanze y’igihugu biba birimo Nucléaire ntabwo tuzi icyo twabikoraho tudafite nubwo bumenyi. Iyo muza hano cyangwa ugiye aho ariho hose bya byuma byo gusaka banyuzamo hasi biba bifitemo Nucléaire none ntituzi uko tugomba kubishyingura.’’

“Ibyo dukoresha hano yaba mu buzima, mu buhinzi, mu bucukuzi bw’amabuye, mu nganda, tudafite ubwo bumenyi twaba dufite ikibazo gikomeye cyane kuko ntituzi uko twabigenza. icyo dushyiriraho iki kigo ni ukugira ngo kiduhe bwa bumenyi tudafite.”

U Rwanda ubu rufite abanyeshuri 50 biga mu Burusiya, rugiye kohereza abandi 20 ndetse rushaka kohereza n’abandi muri Amerika, mu Burayi, muri Aziya kugira ngo rugire itsinda rifite ubumenyi butandukanye.

Abo bariga basoza bakajya kwimenyereza mu nganda za Nikeleyeri zigezweho, zir ku rwego mpuzamahanga.

Ikigo cy’Ubumenyi n’Ikoranabuhanga mu bya Nucléaire mu Rwanda, kigamije gukoresha Nucléaire mu buryo bugamije amahoro, burimo guteza imbere inzego zitandukanye z’iterambere harimo ubuhinzi binyuze mu bushakashatsi mu kongera umusaruro, ubuzima harimo ubuvuzi bugezweho, uburezi n’amahugurwa, Jewoloji, ikoranabuhanga, inganda n’ibindi.

Abadepite batoye itegeko ryemeza iyubakwa ry'Ikigo cy’Ubumenyi n’Ikoranabuhanga mu bya Nucléaire ku butaka bw’u Rwanda
Mu gihe kiri imbere u Rwanda ruzaba rukeneye nka megawatt ibihumbi bitanu, bizasaba ko ruzakenera uruganda rukoresha ingufu za Nucléaire ngo rubigereho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .