Ababyara bose ntabwo tubita ababyeyi- Minisitiri Munyakazi

Yanditswe na Prudence Kwizera
Kuya 19 Nzeri 2019 saa 06:24
Yasuwe :
0 0

Umunyamabanga wa Leta muri Minisiteri y’uburezi ushinzwe amashuri abanza n’ayisumbuye, Dr Isaac Munyakazi, yavuze ko umuntu atitwa umubyeyi kuko yabyaye gusa ahubwo ari uwita ku nshingano zo kurera umwana akamukuza neza.

Yabigarutseho kuri uyu wa gatatu ubwo yari mu Karere ka Gisagara mu bikorwa by’ukwezi kwahariwe gusoma no kwandika.

Dr Munyakazi yabanje gushyira ibuye ry’ifatizo ahagiye kubakwa ibyumba by’amashuri mu Murenge wa Musha mu rwego rwo kugabanya ubucucike mu mashuri, asura n’ishuri ryigamo abana b’incuke n’iryigishirizwamo abafite ubumuga bwo mu mutwe mu Murenge wa Save.

Mu biganiro yagiranye n’ababyeyi yabibukije inshingano bafite ikomeye yo kurera neza abana babitaho, babatoza kubaha no kugira imico myiza kugira ngo bazakure ari abantu b’ingirakamaro.

Yagize ati “Ababyara bose ntabwo tubita ababyeyi kuko hari ababyara bakajugunya ku muhanda, hari abihakana abo babyaye, hari ababyara abafite ubumuga bakabahisha. Umubyeyi tuvuga hano ni wawundi ubyarira kurera; ni wawundi ubyara agaherekeza uwo yabyaye akamenya ko hari inshingano amufiteho zo kumurera, kumukuza no kumujyana mu ishuri.”

Yavuze no ku babyeyi bavana abana mu ishuri abibutsa ko baba bahemuka cyane bicira umwana ejo hazaza he.

Ati “Babandi bavana abana babo mu ishuri ntabwo tuzajya tubafata nk’ababyeyi. Warabyaye koko ari ko uwo wabyaye ntabwo uri kumuha uburenganzira bwe.”

Yasobanuye ko Leta y’u Rwanda yagennye ibishoboka byose bifasha umwana kwiga no kubaho neza bityo ntawe ukwiye kumuvutsa ubwo burenganzira kuko yabiryozwa.

Bamwe mu babyeyi bo mu Karere ka Gisagara bavuze ko bamaze kumenya akamaro ko kurera neza umwana no kumujyana mu ishuri bityo biyemeje kutarebera umuntu ubitambamira.

Mukaburasa Pascasie ati “Ntabwo nashyigikira ko umwana wanjye ava mu ishuri; (….) n’umwana w’umuturanyi iyo mbonye atagiye kwiga mbaza impamvu atagiyeyo nkaba nabimenyesha n’ubuyobozi igihe mbonye bashaka kumukura mu ishuri.

Umuyobozi w’Akarere ka Gisagara, Rutaburingoga Jérome, yashimiye Leta n’abafatanyabikorwa avuga ko babafasha byinshi mu gutuma abana bahabwa uburezi n’uburere.

Ati “Turashimira Leta y’u Rwanda uburyo izana abafatanyabikorwa kugira ngo dufatanye mu iterambere ry’uburezi by’umwihariko duhereye ku bana bato.”

Bamwe muri abo bafatanyabikorwa ni Ishami ry’Umuryango w’Abibumbye ryita ku bana, Unicef, ribafasha mu kubaka ibyumba by’amashuri; n’Ikigo cya Leta Zunze Ubumwe za Amerika gishinzwe Iterambere Mpuzamahanga, Usaid, gitanga inkunga mu kugura ibitabo no gutoza abana gusoma.

Hari kandi Umushinga wa VSO ufasha mu bikorwa bitandukanye by’uburezi bw’abana b’incuke.

Mu mirenge 13 y’Akarere ka Gisagaraga haboneka ibigo by’amashuri abanza 64 byigwamo n’abanyeshuri 81 911; iby’uburezi bw’ibanze bw’imyaka icyenda na 12 byakira abanyeshuri 14 517 n’amashuri y’incuke 78 afite abanyeshuri 6 750.

Ababyeyi bo mu Karere ka Gisagara basabwe kwita ku burere n'uburezi bw'abana
Abana b'incuke biga i Save mu Karere ka Gisagara
Bamwe mu bana bafite ubumuga bwo mu mutwe biga i Save mu Karere ka Gisagara
Bamwe mu banyeshuri biga mu mashuri yisumbuye mu Karere ka Gisagara
Dr Isaac Munyakazi aganira na bamwe mu babyeyi bo mu Karere ka Gisagara
Dr Isaac Munyakazi ari kumwe n'abandi bayobozi bashyize ibuye ry'ifatizo ahagiye kubakwa ibyumba by'amashuri mu Murenge wa Musha
Dr Isaac Munyakazi ari kumwe n'abandi bayobozi basuye ibikorwa by'uburezi bitandukanye mu Karere ka Gisagara
Umunyamabanga wa Leta muri Minisiteri y’uburezi ushinzwe amashuri abanza n’ayisumbuye, Dr Isaac Munyakazi, areba uko abana b'incuke bigishwa gusoma
Umunyamabanga wa Leta muri Minisiteri y’uburezi ushinzwe amashuri abanza n’ayisumbuye, Dr Isaac Munyakazi, yavuze ko umuntu atitwa umubyeyi kuko yabyaye gusa
Umuyobozi w’Akarere ka Gisagara, Rutaburingoga Jérome, yashimiye Leta n’abafatanyabikorwa mu guteza imbere uburezi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza