00:00:00 IGIHE NETWORK KN KINYARWANDA EN ENGLISH FR FRANCAIS

Uwishe umunyeshuri w’umugore yasabiwe kunyongwa imbonankubone kuri televiziyo, Macron yatangiye ingendo muri Afurika: Ay’ingenzi mu Karere

Yanditswe na Kanamugire Emmanuel
Kuya 25 July 2022 saa 12:31
Yasuwe :

Urukiko rwo mu Misiri rwasabye ivugururwa ry’itegeko ku buryo byemerwa gutambutsa imbonankubone kuri televiziyo, igikorwa cyo kunyonga umugabo uherutse kwica umunyeshuri w’umugore.

Abanyamisiri batewe akababaro n’amashusho yasakajwe ku mbuga nkoranyambaga mu kwezi gushize agaragaza uwitwa Mohammed Adel atera icyuma Nayera Ashraf akamwicira inyuma ya kaminuza nyuma yo kumwangira ibyo yamusabaga.

Mu ibaruwa urukiko rwakatiye uwo musore w’imyaka 22 urwo gupfa, rwandikiye Inteko Ishinga Amategeko, rwavuze ko nubwo hatangazwa agace gato k’uwo muhango byaba bihagije kuko byatuma abantu batinya kwishyira mu byaha nk’ibi.

Ubusanzwe Misiri ntinyuza mu bitangazamakuru ibijyanye no kunyonga abakatiwe urwo gupfa. Bikorwa binyuze mu kubamanika muri za gereza imbere.

Mu 2015, Umuryango w’Abibumbye wakoze icyegeranyo cyagaragaje ko abagore b’Abanyamisiri bagera kuri miliyoni umunani bahuye n’ihohoterwa.

Kenya: Polisi yasatse ibiro bifite aho bihuriye na Visi Perezida Ruto

Polisi yo mu Mujyi wa Nairobi, yasatse ibiro bivugwa ko bifitanye isano na Visi Perezida wa Kenya, William Ruto, uri mu bakandida bahabwa amahirwe yo gutsinda amatora ku mwanya wa perezida. Aya matora ateganyijwe ku wa 9 Kanama uyu mwaka.

Polisi yatangaje ko muri iryo saka hafashwe mudasobwa ebyiri n’ububiko ‘servers’ bubiri. Ntihasobanuwe aho Ruto yaba ahuriye n’ibyo biro byasatswe.

Ubunyamabanga bushinzwe ibikorwa byo kwamamaza Ruto bwatangarije BBC ko badashaka gushorwa mu byo bwise ’kurangaza.’

Uku gusaka kubaye mu gihe hari ubushyamirane hagati y’inzego z’umutekano za Kenya na Komisiyo Yigenga y’Amatora.

Mu cyumweru gishize, Perezida w’iyi komisiyo yanenze icyemezo cyo gufunga abakozi bayo batatu b’abanyabiraka bahawe akazi k’igihe gito ko gushyira ku murongo ikoranabuhanga rizifashishwa mu matora.

Polisi yavuze ko nta bimenyetso byagaragazaga ko Komisiyo y’Amatora yahaye akazi abo bantu batatu b’abanyamahanga cyangwa ko hari amasezerano bagiranye na yo.

Abanya-Nigeria bagiriwe inama yo guhagarika ingendo ku bw’izamuka ry’ibikomoka kuri peteroli

Ubuyobozi bw’Ikigo cy’Indege cya Nigeria, bwagiriye abagenzi inama yo guhagarika ingendo muri iki gihe ibikomoka kuri peteroli byabaye iyanga n’aho bibonetse ibiciro byabyo bikaba biri hejuru.

Umuvugizi w’iki kigo, Professor Obiora Okonkwo, yatangaje ko abagenzi bakwiye kwitega ko hari ingendo zishobora gusubikwa hirya no hino mu gihugu.

Ati “Hazabaho kirogoya muri gahunda z’indege ndetse harimo n’ingendo zizasubikwa cyangwa habeho gukererwa hirya no hino ku bibuga by’indege mu gihugu.”

Uru rwego rwatangaje ko igiciro cy’ibikomoka kuri peteroli bikoreshwa mu ndege cyazamutse ku gipimo cya 400% uhereye mu Ukuboza 2021.

Usibye ikibazo cy’ibikomoka kuri peteroli, Okonkwo yanavuze ko uru rwego rubangamiwe n’ifungwa ry’igice cy’Ikibuga Mpuzamahanga cy’indege cya Murtala Muhammed giherereye mu Mujyi wa Lagos n’ubushobozi bwo kugura ibikoresho bisimbura ibyangiritse. Mu ndege 10 iki kigo cyakoreshaga, ebyiri zifite ibibazo bituma zitabasha gukora ingendo.

U Burusiya bwahakanye uruhare mu kibazo cy’ibura ry’ibiribwa ku isi

Minisitiri w’Ububanyi n’Amahanga w’u Burusiya, Sergei Lavrov, yahakanye ibivugwa ko igihugu cye cyagize uruhare mu bibazo by’ibura ry’ibiribwa ku isi.

Mu ijambo yavugiye mu ihuriro rya ba ambasaderi b’Abarabu mu Misiri, yahamije ko ibihugu byo mu Burengerazuba bw’isi bitavugisha ukuri ku bijyanye n’ingaruka z’ibihano u Burusiya bwafatiwe.

Yashinje ibi bihugu kugerageza kwigarurira ibindi bice by’isi.

Ibihugu byinshi by’Abarabu n’ibya Afurika byagizweho ingaruka n’ibura ry’ibinyampeke ryatewe n’intambara hagati y’u Burusiya na Ukraine.

Lavrov yagiranye ibiganiro na mugenzi we wa Misiri, Sameh Shoukry nk’uko Ibiro Ntaramakuru by’Abafaransa byabitangaje.

Misiri isanganywe umubano mwiza n’u Burusiya, igihugu ikuramo ingano, intwaro ndetse mbere y’uko intambara yo muri Ukraine itangira, Misiri yagiraga ba mukerarugendo benshi baturutse mu Burusiya.

IMF irashaka ko hakorwa igenzura kuri ruswa ivugwa mu mabanki yo muri Kenya

Ikigega Mpuzamahanga cy’Imari (IMF) kirashaka kugenzura ibikorwa by’amabanki muri Kenya nyuma y’abo hakomeje guhwihwiswa iyezandonke rigizwemo uruhare n’udutsiko tw’abaryi ba ruswa.

Raporo y’itsinda ry’abahagarariye IMF, ivuga ko Kenya igomba kugenzura ruswa mu mabanki n’izindi nzego nkuru zishobora guhura n’iki kibazo.

Kenya yavuzweho ibikorwa by’iyezandonke byo ku rwego rwo hejuru aho za miliyari z’amashilingi zafatiwe mu bigo no mu bantu ku giti cyabo ariko ba nyirabyo bakananirwa gusobanura inkomoko y’ubwo bukungu.

Macron yatangiye ingendo mu bihugu bitatu bya Afurika

Perezida w’u Bufaransa, Emmanuel Macron, yatangiye kuri uyu wa Mbere, ingendo mu bihugu bitatu bya Afurika, bwa mbere kuva yatorerwa manda ya kabiri. Icyo agamije ni ukuvugurura umubano w’u Bufaransa n’umugabane wa Afurika.

Uruzinduko rwa Macron ruratangira kuri uyu wa 25 ruzarangire ku wa 28 Nyakanga 2022, akaba azarukorera muri Cameroun, Benin na Guinea-Bissau.

Mu biganiro bizibandwaho harimo ibijyanye no kohereza ibiribwa muri iki gihe Afurika ifite ubwoba ko bizakomeza kugabanuka by’umwihariko ibinyampeke biturutse ku ntambara hagati y’u Burusiya na Ukraine.

Ibibazo by’umutekano na byo bizagarukwaho kuko u Bufaransa buri mu myiteguro yo gukura ingabo zabwo muri Mali uyu mwaka, aho ibihugu byose mu Karere bifite ubwoba ko ibitero by’imitwe y’iterabwoba bishobora gukaza umurego.

Ibi bihugu Macron azasura ubusanzwe ntibikunze gusurwa n’abategetsi bakomeye ku isi.

Umuyobozi mu biro bya Perezida utashatse ko amazina ye atangazwa yabwiye AFP ati “Uru ruzinduko ruzagaragaza umuhate wa Perezida mu kuvugurura imikoranire n’ibihugu bya Afurika.”

Goma: Ubuyobozi bwihanangirije abakora imyigaragamyo batabifitiye uburenganzira

Umuyobozi w’Umujyi wa Goma uherereye muri Kivu y’Amajayaruguru, Colonel François Kabeya, yatanze amabwiriza kuri uyu wa 24 Nyakanga abuza imyigaragambyo iyo ari yose itemewe.

Iri kumira rije nyuma y’ubutumwa bwakwirakwijwe ku mbuga nkoranyambaga buhamagarira abantu kwigaragambya bamagana Ingabo z’Umuryango w’Abibumbye zishinzwe kubungabunga Amahoro muri iki gihugu (MONUSCO).

Colonel François Kabeya yasabye inzego zishinzwe umutekano kuburizamo imyigaragambyo yose itemewe n’amategeko.

Ku rundi ruhande, ihuriro ry’urubyiruko rwo mu ishyaka riri ku butegetsi (UDPS), ryanyomoje amakuru avuga ko hari umugambi wo kwigaragambya bamagana MONUSCO.

Perezida w’iri huriro, Fidèle Kasereka, yamaganye itangazo yise ko ari irihimbano ryakwirakwijwe ku mbuga nkoranyambaga rishishikariza abantu kwitabira imyigaragambyo.

Kenya: Abantu 33 bapfiriye mu mpanuka ya bisi yaguye mu mugezi

Abantu bagera kuri 33 bapfuye abandi benshi barakomereka bazize impanuka ya bisi yarenze ikiraro ikagwa mu mugezi muri Kenya.

Iyi mpanuka yabaye kuri iki Cyumweru hari abagera ku 10 babashije kuyirokoka nk’uko ubuyobozi bwabitangaje.

Inkuru dukesha BBC ivuga ko iyo bisi yavaga mu Mujyi wa Meru igana ku Cyambu cya Mombasa ubwo yakoraga impanuka.

Iperereza ry’ibanze ryakozwe na polisi ryerekanye ko yaba yagize ikibazo cya feri zananiwe gukora nk’uko bisanzwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .