00:00:00 IGIHE NETWORK KN KINYARWANDA EN ENGLISH FR FRANCAIS

Umwami w’u Bubiligi mu ruzinduko muri RDC, abacamanza bo muri Tunisie mu myigaragambyo: Amakuru muri Afurika

Yanditswe na Kanamugire Emmanuel
Kuya 7 June 2022 saa 11:06
Yasuwe :

Abacamanza bo muri Tunisie batangije imyigaragambyo y’icyumweru kuri uyu wa Mbere bamagana ukwivanga mu butabera kwa Perezida Kais Saied nyuma y’aho yirukanye bagenzi babo bagera kuri 57.

Saied wahagaritse Inteko Ishinga Amategeko muri Nyakanga umwaka ushize, yasinye iteka rimwongerera ububasha bwo kugenzura urwego rw’ubutabera.

Ku wa Gatandatu, amahuriro ane y’abacamanza yatangaje ko hagiye kuba imyigaragambyo mu gihugu hose yamagana mu buryo bukomeye ugukomeza kwivanga kwa perezida mu by’ubutabera.

Aba bacamanza bashinja perezida kwirukana bagenzi babo mu buryo bunyuranyije n’itegeko nshinga.

Mbere y’uko afata umwanzuro, mu nama y’abaminisitiri, Perezida Saied yari yabanje gushinja abacamanza atavuze amazina, ko bamunzwe na ruswa, bashyigikira iterabwoba, bakora itoteza rishingiye ku gitsina kandi bakivanga mu mashyaka ya politiki bakanabangamira ubutabera.

Umuyobozi w’ihuriro ry’abacamanza bakiri bato, Mourad Massoudi, yabwiye Ibiro Ntaramakuru by’Abafaransa, AFP ko kuri uyu wa Mbere ko batangiye imyigaragambyo ku nkiko zose mu gihugu ndetse bigaragara ko yitabiriwe na benshi.

Inkiko zizakomeza gukora ku manza zifitanye isano n’iterabwoba.

Abacamanza bo muri Tunisie biyemeje gukora imyigaragambyo bamagana Peerzida uherutse kwirukana bagenzi babo 57

Afurika y’Epfo: Abavandimwe bo mu muryango wa ‘Gupta’ bafatiwe muri UAE

Abavandimwe babiri bo mu muryango w’abakire bazwi nka ‘Gupta family’, bafatiwe muri Leta Zunze Ubumwe z’Abarabu nk’uko byatangajwe na Guverinoma ya Afurika y’Epfo.

Atul na Rajesh Gupta bashinjwa kuba baruririye ku bucuti bari bafitanye n’uwahoze ari Perezida wa Afurika y’Epfo, Jacob Zuma bakagira uruhare mu bikorwa bitemewe n’amategeko.

Ibiganiro byo kubohereza muri Afurika y’Epfo birakomeje nk’uko ubutegetsi bw’iki gihugu bwabitangaje.

Abo bavandimwe bahunze nyuma y’aho ubutabera butangiye gukora iperereza ku ruhare bagize mu byaha bya ruswa mu 2018.

Bashinjwa gutanga ruswa kugira ngo batsindire amasezerano y’ibikorwa bibyara inyungu mu nzego za leta no kugira ijambo mu ishyirwaho ry’abagize guverinoma.

Byinshi mu birego bikomeye bya ruswa byashinjwaga abo bavandimwe bakomoka mu Buhinde bishingiye ku mibanire yabo na Jacob Zuma, wari perezida wa Afurika y’Epfo kuva mu 2009 kugeza igihe yahatiwe kuva ku butegetsi nyuma y’imyaka icyenda.

Bitewe kandi ngo n’umubano Zuma yari afitanye n’abo muri uyu muryango, hari aho wamutegekaga gushyiraho zimwe politiki z’igihugu no gushyiraho abaminisitiri.

Iyi mikoranire itemewe bibarwa ko yaba yarahombeje Leta ya Afurika y’Epfo agera kuri miliyari 81 z’amadolari ya Amerika nubwo yaba Zuma cyangwa abo muri uyu muryango batemera ibyo birego.

Jacob Zuma wayoboye Afurika y’Epfo kuva mu 2009 kugeza mu 2018 yakatiwe gufungwa amezi 15 kubera gusuzugura urukiko ubwo yangaga kwitaba ngo yisobanure kuri ibi byaha. Yaje kurekurwa nyuma y’amezi abiri.

Atul na Rajesh Gupta bashinjwa kuba baruririye ku bucuti bari bafitanye n’uwahoze ari Perezida wa Afurika y’Epfo, Jacob Zuma bakagira uruhare mu bikorwa bitemewe n’amategeko

Ethiopie: Kurangiza intambara biracyari kure nk’umuzi w’ibuye

Guverinoma ya Ethiopie yatangaje ko yiyemeje kubahiriza inama z’Umuryango wa Afurika Yunze Ubumwe zo kurangiza intambara ya gisivile imaze amezi agera kuri 19 ibica bigacika muri iki gihugu.

Ubwo yaganiraga n’itangazamakuru kuri uyu wa Mbere, Umunyamabanga wa Minisitiri w’Intebe, Abiy Ahmed, ushinzwe itumanaho, yavuze ko Ethiopie ihanze amaso uwahoze ari Perezida wa Nigeria, Olusegun Obasanjo akaba umuhuza muri aya makimbirane.

Nubwo bimeze bityo ariko, Billene Seyoum yakomeje avuga ko urugendo rugana ku mahoro rukiri rurerure ndetse rutoroshye.

Ibi byavuzwe nyuma y’aho Obasanjo ahuye n’abayobozi ba Tigray n’abo mu nzego nkuru za leta barimo Minisitiri w’Intebe mu rugendo aherutse kugirira muri Ethiopie.

Billene yashinje ingabo za Tigray kongera kwenyegeza intambara mu byumweru bishize mu gihe mbere zari zavuze ko zemera kwinjira mu biganiro biganisha ku mahoro.

Mu byumweru bike bishize Ethiopie yafunze ibihumbi by’abantu by’umwihariko mu Majyaruguru ya Amhara no mu Murwa Mukuru, Adis Ababa mu bikorwa by’umukwabu witiriwe kugarura ituze.

Abanyamakuru 18 n’abandi bakozi bo mu itangazamakuru bari mu bafunzwe.

Komisiyo ishinzwe uburenganzira bwa muntu muri iki gihugu yamaganye ibyo bikorwa ivuga ko binyuranyije n’amategeko.

Billene ntiyemeranya n’ibyo iyi komisiyo yavuze ahubwo yemeje ko abanyamakuru bafunzwe ari abadafite uburenganzira bwo gukorera mu gihugu.

Hagati aho inzego za leta zatangaje ko imirwano yashyamiranyije inzego z’umutekano n’abitwaje intwaro vuba aha, yasize abagera kuri 19 bahatakarije ubuzima.

Intambara muri Ethiopie ikomeje kubica bigacika

Nigeria: Ishyaka riri ku butegetsi ryahisemo umukandida waryo mu matora ya Perezida

Ishyaka riri ku butegetsi muri Nigeria, All Progressives Congress (APC) ryatangiye gutoranya umukandida uzarihagararira mu matora ya perezida mu matora ateganyijwe muri Gashyantare umwaka utaha.

Perezida Muhammadu Buhari uri ku butegetsi muri iki gihe ntiyemerewe kongera kwiyamamaza mu gihe azaba asoje manda ebyiri.

Abagera kuri 700 ni bo byari biteganyijwe ko batora mu nama yahuje abarwanashyaka ba APC nyuma y’umunsi umwe abantu bitwaje intwaro bishe benshi mu kiliziya yo mu burengerazuba bw’amajyepfo ya Leta ya Ondo ku Cyumweru, tariki ya 5 Kamena 2022.

Bamwe mu barwanashyaka b’imena barimo Perezida Buhari bari basabye ko bakwemeranya ku mukandida aho guhurira muri kongere y’ishyaka ngo batore hirindwa ko ryacikamo ibice.

Biteganyijwe ko uzatsinda muri 23 bahatanye ari we uzahagararira iri shyaka agahatana na Atiku Abubakar, uhagarariye abatavuga rumwe n’ubutegetsi.

Ishyaka APC ryatangiye gutoranya uzarihagararira mu matora ya perezida

Abanya-Ethiopie mu nkundura yo guhindura amazina

Inkundura yo kwisubiza agaciro kw’abo mu bwoko bw’Aba-Oromo buri mu bukomeye muri Ethiopie yatumye bamwe biyemeza guhindura amazina.

Barimo Moti Begi, umugabo w’imyaka 40, ubusanzwe witwaga Dereje Begi.

‘Dereje’, ijambo ryo mu rurimi rwa Amhara rosobanura ‘uwagwijwe’ yarisimbuje ‘Moti’ risobanura ‘umwami’ mu rurimi rwa Afaan Oromoo.

Moti, ni umu-enjeniyeri w’umwuga. Si we wenyine uri muri iyi nkundura yo guhindura amazina; hari abandi barindwi muri bagenzi be baherutse kwishimira ko ari aba-Oromo babihamisha guhindura amazina.

Mu binyejana bishize abo mu bwoko bwa Oromo bashyizwemo imyumvire y’uko ururimi rwabo (Afaan Ormooo) nta gaciro rufite bikozwe n’abategekaga Ethiopie by’umwihariko abami bavugaga ururimi rwa Amharic rwo mu majyaruguru.

Mu rwego rwo guha imbaraga no guhuza ubwami bwabo, abo bami bemeje ko ururimi rw’igihugu ari Amhara.

Benshi bahisemo amazina yo muri urwo rurimi kugira ngo bibone muri ubwo bwami ariko hamwe n’impinduka muri politiki zatangiye mu 1991, imyitwarire yarahindutse cyane cyane mu rubyiruko rurimo urwafashije Abiy Ahmed mu rugendo rwo kuba Minisitiri w’Intebe.

Abiy yabaye Minisitiri w’Intebe mu 2018 kandi ni we wa mbere wo mu ba-Oromo wabashije kujya muri izi nshingano.

Moti yabwiye BBC ko ikintu cya mbere cyo gukora kugira ngo yisubize icyubahiro n’ishema nk’umu-Oromo ari uguhindura izina.

Intandaro y’ibyo ni itangazo ryamamaza mu karere ka Oromia, aho aba-Oromos benshi batuye kuko bisa n’aho igihugu kigabanyijemo bibiri bishingiye ku moko.

Inzego z’ubuzima zo muri ako karere zakoze ubukangurambaga bwo gushaka abaganga 2000 n’abandi bakozi b’ubuzima mu bigenderwaho hashyirwamo ko abakeneye ako kazi bagomba kuba bashobora kuvuga uririmi rwa ‘Afaan Oromoo.’

Kuri Moti ibi byamuteye impungenge kuko nubwo benshi mu babirwanyije bakuriye muri Oromia batigeze bagaragaza ubushake bwo kwiga urwo rurimi ruvugwa na benshi mu batuye muri ako gace.

Yafashe iyo myitwarire nk’iciriritse ndetse iteye inkeke.

Ati “Icyo ni cyo cyatumye mpindura izina.”

Yafashe icyemezo cyo guhindura izina ngo yisubize icyubahiro

Umwami w’u Bubiligi aragirira uruzinduko muri RDC

Umwami w’u Bubiligi, Philippe Léopold Louis Marie, kuri uyu wa Kabiri aratangira uruzinduko rw’iminsi itandatu azamara muri Repubulika Iharanida Demokarasi ya Congo.

Radiyo Ijwi rya Amerika dukesha iyi nkuru, yatangaje ko Philippe Léopold yatumiwe na Perezida Felix Tshisekedi.

Urugendo rwe rufite igisobanuro gikomeye nyuma y’aho agaragarije perezida Tshisekedi ko yicuza ku bw’ibikomere ubukoloni bw’Ababiligi bwasize ku baturage b’iki gihugu.

Ni bwo bwa mbere Umwami Philippe w’u Bubiligi agiriye uruzinduko muri Repubulika Iharanira Demokarasi ya Congo.

Araba ari kumwe n’umugore we, Mathilde d’Udekem d’Acoz n’abandi bayobozi muri leta y’u Bubiligi barimo Minisitiri w’Intebe, Alexander De Croo.

Kuri uyu wa Gatatu biteganyijwe ko azageza imbwirwaruhame ku bagize Inteko Ishinga Amategeko ari kumwe na Perezida Tshisekedi naho ku wa Gatanu akazavugira ijambo muri Kaminuza ya Lubumbashi.

Abanyamateka bavuga ko abaturage babarirwa muri za miliyoni muri Repubulika Iharanira Demokarasi ya Congo bishwe, bacibwa ibice by’umubiri, abandi bicwa n’indwara ubwo bakoraga mu mirima y’Umwami w’u Bubiligi, Leopold II mu myaka yo hagati ya 1865 na 1909.

U Bubiligi buri mu myiteguro yo gusubiza Congo iryinyo rya Patrice Lumumba warwanije ubukoloni akaba ari na we wabaye Minisitiri w’Intebe wa mbere ubwo igihugu cyari kimaze kubona ubwigenge.

Umwami w'u Bubiligi aragirira uruzinduko rw'iminsi itandatu muri RDC uhereye kuri uyu wa Kabiri

AU igiye gutanga impozamarira ku miryango y’abasirikare b’Abarundi biciwe muri Somalia

Komiseri ushinzwe ibibazo bya politiki, kubungabunga amahoro n’umutekano mu muryango wa Afurika Yunze ubumwe, Bankole Adeoye, yatangaje ko igikorwa cyo gutanga impozamarira ku basirikare b’Abarundi baguye muri Somalia kigiye kwihutishwa.

Yabivuze mu ruzinduko yagiriye mu Burundi, yasoje kuri uyu wa Mbere.

Hashize imyaka igera kuri 15 u Burundi butangiye kohereza ingabo mu bikorwa byo kurwanya iterabwoba muri Somalia.

Komiseri Bankole yasuye agace gashyinguyemo abaguye ku rugamba muri Somalia ashyira indabo ku mva zabo, avuga ko ari umwanya mwiza wo kubibuka no kuzirikana uruhare rwabo mu kugarura amahoro n’umutekano muri iki gihugu boherejwemo.

Bankole Adeoye n’abayobozi b’u Burundi birinze kugira icyo batangaza ku makuru inzego z’ubutasi za Somalia n’abarwanyi ba Al-Shabab batangaje, ko hari abasirikare b’Abarundi bafashwe bugwate na Al-Shabab mu gitero cyabaye kuri kimwe mu birindiro bikomeye by’abasirikare b’Abarundi mu ntangiriro z’ukwezi gushize.

Igisirikare cy’u Burundi cyemeje ko abasirikare 10 bapfuye, batanu bagashimutwa naho 25 bagakomereka mu gihe Al- Shabab yo yigambye ko yishe abasirikare b’Abarundi barenga 160.

Amatora muri Kenya: Jimi Wanjigi yangiwe kwiyamamaza kubera kutagira ‘diplôme’ ya kaminuza

Komisiyo yigenga ishinzwe amatora muri Kenya yanze kandidatire ya Jimi Wanjigi wari ufite inzozi zo kuzaba Perezida wa gatanu wa Kenya nyuma y’aho bigaragaye ko atagira impamyabumenyi y’amashuri ya kaminuza.

Perezida wa Komisiyo y’amatora, Wafula Chebukati, yatangaje ko kandidatire ya Wanjigi idashobora kwemerwa kuko adafite impamyabumenyi ya ngombwa.

Ati “Impamyabumenyi ya kaminuza ni itegeko; ku bw’iyo mpamvu ntesheje agaciro ubusabe bwo kuba umukandida ku mwanya wa perezida mu matora azaba ku wa 9 Kanama uyu mwaka.”

Ku rundi ruhande, Wanjigi yamaganye uwo mwanzuro avuga ko ari amayeri yo kumubuza kwitabira amtora akemanga impamvu zibyihishe inyuma nk’uko Citizen Digital yabitangaje.

Ati “Ibiri gukorwa biragaragara, hariho ibyemezo biri gufatirwa ahantu runaka byo kwigizayo abantu. Ntushobora gukurikiza amategeko atandukanye ku bantu batandukanye. Iki ni cyo cyerekezo cyawe nka komisiyo. Ku bw’ibyo mfite ubwoba bw’imigendekere y’amatora ari imbere.”

Amatora yo muri Kenya ateganyijwe ku wa 9 Kanama 2022. Abatora bazahitamo Perezida, abagize Inteko Ishinga Amategeko n’Abasenateri. Hazatorwa kandi ba guverineri b’uturere n’abahagarariye uturere 47.

Abakandida bane bamaze kwemezwa n’amashyaka yabo mu gihe 38 ari bo bari bamaze kwemerwa nk’abigenga kugeza ku wa 13 Gicurasi. Abandi bagera kuri batandatu barimo na Jimi Wanjigi, kandidatire zabo zimaze kwangwa.

Kandidatire ya Jimi Wanjigi ku mwanya w'umukuru w'igihugu mu matora ya Kenya, yanzwe ku mpamvu z'uko adafite impamyabumenyi yo ku rwego rwa kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .