Uko Prossy Bonabaana uhuza ibikorwa bya RNC muri Uganda yatse miliyoni 100Shs Gen Kayihura

Yanditswe na Musangwa Arthur
Kuya 7 Kanama 2020 saa 02:07
Yasuwe :
0 0

Abakurikiranira hafi ikibazo cy’umubano w’u Rwanda na Uganda, bakunda kumva izina Prossy Bonabaana, nk’umwe mu bantu bakomeje kugira uruhare mu bikorwa bigamije guhungabanya umutekano warwo bikorwa n’umutwe w’iterabwoba wa RNC ya Kayumba Nyamwasa.

Bonabaana na Sulah Nuwamanya, bakunze kugarukwaho cyane mu biganiro ku mubano w’u Rwanda na Uganda, aho bagaragara cyane mu bikorwa byo gushakira inkunga RNC binyuze mu muryango Self-Worth Initiative uherutse guhagarikwa muri Uganda.

Kuri ubu Bonabaana aravugwa mu bikorwa byo gukoresha iterabwoba akaka ruswa uwahoze ari umukuru wa Polisi, Gen Kale Kayihura, ya miliyoni 100 z’amashilingi ya Uganda ngo ahagarike ibikorwa byo kumwandika ku mbuga nkoranyambaga no mu bitangazamakuru bya Uganda.

Bonabaana, yakunze gushinja Kayihura gushimuta umugabo we Rwema Gendarme, wari umwami gakondo w’Abanyamulenge mu Minembwe, akamushyikiriza u Rwanda.

Kayihura akimara gukurwa ku buyobozi bwa polisi, ngo yahuriye na Bonabaana, mu rugo iwe i Kasagama bemeranya guhagarika kumwandikaho nabi ku mbuga nkoranyambaga no mu bitangazamakuru.

Bonabaana wari uzi ko Kayihura yirukanywe ndetse nta bubasha agifite, yamubwiye ko agomba kumuha miliyoni 100 z’amashilingi kugira ngo ibyo amusaba bishoboke. Boonabana ngo yanamuteye ubwoba ko yibonanira kandi afite uburinzi bwa Museveni, bituma amwemerera kumuha ako kayabo.

Gen Kayihura ako kanya yishyuye icyiciro cya mbere cya miliyoni eshanu z’amashilingi, amwizeza kuzagenda amuha andi uko Bonabaana n’itsinda rye bazagenda bareka kumwandika.

Bonabaana ukorana bya hafi n’Urwego rw’ubutasi bwa gisirikare muri Uganda (CMI), yasohotse i Kasagama yerekeza mu rugo rwe amwenyura kubera akayabo yari yiteguye guhabwa.

Amakuru avuga ko Sulah Nuwamanya wahoze ari umukunzi wa Bonabaana, akaba n’umuyobozi ukomeye w’ibikorwa bya RNC muri Uganda, yaje kumenya ko CMI izi gahunda ya Bonabaana na Kayihura ndetse na miliyoni 100 z’amashilingi azamuha.

Nuwamanya yabuze amahoro ndetse agira ishyari ry’ako kayabo Bonabaana agiye kubona akayabo nta ruhare yabigizemo.

Yahise ashaka uburyo bwo kwica uyu mugambi, ajya kwa Charles .K. Asiimwe (uzwi nka CK), wahoze ayobora ishami ryo kurwanya iterabwoba muri CMI, amumenyesha uko Bonabaana agiye kubona akayabo kuri Kayihura.

Abakurikiranira hafi iba Nuwamanya na Bonabaana, bavuga ko ari abantu bakunda gukoreshwa cyane bagahimba inkuru bakazitangaza mu binyamakuru no ku mbuga runaka bibasira umuntu runaka.

Urugero ni aha bombi bamaze igihe baterwa inkunga na Gen Henry Tumukunde wahoze ari Minisitiri w’umutekano, ubwo Kayihura yayoboraga Polisi. Bari bashinzwe guhimba no gutangaza inkuru ku mbuga nkoranyambaga bashinja Kayihura kuba inshuti ya Guverinoma y’u Rwanda, ndetse ko akorera mu nyungu zarwo.

Uko guhangana hagati ya Kayihura na Tumukunde kukaba kwari kugamije ko buri umwe ukwe yarebwa ryiza imbere ya Museveni.

Gusa Tumukunde yaje guhagarika umubano na Nuwamanya na Bonabaana nyuma yo kumenya ko bombi ari ibisambo, ku buryo atigeze yifuza kongera guhura nabo ukundi.

Uku kutavuga rumwe kw’abajenerali babiri ariko kwabaye inyungu ku banyamuryango ba RNC, babasha kubaka ibikorwa, barasesera bagera no mu nzego zo hejuru z’umutekano.

Uko iminsi yagiye yicuma, Tumukunde na Kayihura bose baje kwirukanwa mu mirimo, bituma abanyamuryango ba RNC bafashaga basigara mu mayirabiri, ndetse inkiko zirabategereje kubera ibyaha bitandukanye.

Ikindi gihamya cy’ubusambo bwa Nuwamanya na Bonabaana, ni aho umuturage wo muri Uganda aherutse kubajyana mu nkiko abarega ibyaha birimo kumuharabika, ubwo bamenyeshaga inzego z’umutekano ko ari maneko y’u Rwanda ndetse ko atunze imbunda, agafungwa azira ubusa.

U Rwanda rwakomeje kuba iturufu

Kuva muri Werurwe 2019 ubwo u Rwanda rwafungaga umupaka uruhuza na Uganda, hari benshi babonye umwanya wo gusahurira muri uwo mwuka mubi.

Boonabana yakoresheje umwuka mubi hagati y’ibihugu byombi mu gushaka abagore 50, arabandika bashinga ishyirahamwe ako kanya. Yavugaga ko ari abagore bafite abagabo bashimuswe n’abakorera u Rwanda muri Uganda.

Nk’uko bimenyerewe, Perezida Museveni agendana imifuka y’amafaranga aho agiye kandi azwiho kuyatanga ku matsinda cyangwa amashyirahamwe y’abantu nk’abo.

Bonabaana yari abonye amahirwe agomba kubyaza umusaruro. Yafashe rwa rutonde rw’abagore 50 arutanga muri CMI nyuma rugezwa kwa Museveni. Museveni washakaga kwerekana ko ari umuntu mwiza, yakiriye rwa rutonde abanza kurugenzura nyuma arusangiza ambasade y’u Rwanda i Kitante muri Kampala.

Uwahaye amakuru Taarifa yagize ati “Ambasade y’u Rwanda yahamagaye abo bagore bose irabaganiriza umwe ku wundi, bavuga ko abagabo babo bari mu rugo barimo gukora akazi bisanzwe”.

Icyizere cya Bonabaana cyo kubona akayabo kwa Museveni kiyoyoka gityo.

Uwatanze amakuru avuga ko “Abagore benshi mu bari ku rutonde bari abanyamulenge bo muri RDC. Bonabaana ntiyigeze ababwira ko arimo kubandika nk’abantu bafite akababaro ko kubura abagabo babo. Yababwiye ko ari itsinda ry’abagore agiye gushakira inkunga yo gutangira ibikorwa bibinjiriza amafaranga”.

Kale Kayihura wahoze ari Umuyobozi wa Polisi muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .