Uganda yashinje abashoferi b’amakamyo gukomeza kwinjiza Coronavirus mu gihugu

Yanditswe na Musangwa Arthur
Kuya 23 Mata 2020 saa 01:05
Yasuwe :
0 0

Guverinoma ya Uganda yavuze ko ifite impungenge z’abashoferi b’amakamyo manini yinjira muri icyo gihugu, bimaze kugaragara ko benshi banduye Coronavirus, ku buryo bashobora kuyanduza.

Mu kiganiro Minisitiri w’Umutekano Gen Jeje Odongo yagiranye n’abanyamakuru kuri uyu wa Kane, yavuze ko imibare mishya y’ubwandu bwa Coronavirus yazamuwe n’abashoferi b’amakamyo.

Yagize ati “Hari impungenge zikomeje kubaho muri aka gace, impungenge z’uko umubare munini w’abashoferi b’amakamyo banduye Coronavirus. Nk’urugero ku wa Kabiri, umubare wacu w’abanduye bari 56, ejo ku wa Gatatu bari 61, bivuze ko biyongereyeho abarwayi batanu.”

“Muri abo barwayi batanu, bose bari abashoferi b’amakamyo. Bane bari Abanyakenya, umwe yari Umunya-Tanzania. Guverinoma yumvise izo mpungenge, irimo gusuzuma icyakorwa.”

Yavuze ko mu biganiro na Minisitiri Ushinzwe ubwikorezi, Gen Katumba Wamala, hatekerejwe uburyo bwakoreshwa mu guhangana n’iki kibazo, harimo uburyo bwo gupima abashoferi bose binjira muri Uganda bavuye hanze yayo.

Yakomeje ati “Ni ukugira ngo umushoferi amenye uko ahagaze na mbere y’uko ava ku mupaka. Ibyo bipimo bambwiye ko bishobora gutanga ibisubizo mu minota icumi. Rero gukoresha ubwo buryo bwafasha mu kumenya uko uhagaze na mbere y’uko umushoferi agenda. Ariko nanone nababwira ko buri gipimo kigura amadokari $65, kandi mu mpuzandengo, imodoka 1000 zinjira muri Uganda.”

Ibyo ngo bituma urebye imodoka zose zihanyura zijya mu karere yaba ari amafaranga menshi bishobora gutwara. Byatumye mu buryo burimo gutekerezwaho, hiyongeraho ko nk’amakamyo ava muri Kenya agiye muri Uganda, ashobora kugera ku mupaka agaterwa imiti, agahabwa umuturage wa Uganda akaba ari we uyageza aho agiye.

Uretse abashoferi, Gen Odongo yavuze ko Uganda ifite impungenge kuba utubari n’utubyiniro byarafunzwe, ariko abantu benshi cyane cyane abakire, bahise bafata inzu zabo bazihinduramo utubari rwihishwa. Ibyo bikajyana n’uko ngo kuba nta muntu iki cyorezo kirica muri Uganda, hari abakomeza kukibona nk’ikidakaze ku rwego kivugwaho.

Yavuze ko hari n’ikibazo cy’uko hari imodoka zimwe zagiye zihabwa ikirango gituma zikoreshwa mu gihe abantu batava mu ngo ndetse ibikorwa byinshi bikaba byarafunzwe, ariko ugasanga hari ibirango byinshi by’ibyiganano, abandi babihawe bakabikoresha nabi. Yavuze ko hamaze gufatirwa ibirango 121.

Gen Odongo yavuze ko abashoferi bakomeje kwinjiza Coronavirus mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .