Ubwoko bushya bw’imibu bushobora gukongeza icyorezo cya Malaria ku mugabane wa Afurika

Yanditswe na Ndahayo Emmanuel
Kuya 17 Nzeri 2020 saa 09:06
Yasuwe :
0 0

Mu gihe umugabane wa Afurika wari umaze imyaka ugabanya imibare y’abarwara n’abahitanwa na malaria, ibintu bishobora kuba bigiye gusubira irudubi bitewe n’ubwoko bushya bw’imibu itera malaria buri kugaragara henshi ku mugabane wa Afurika, kandi bufite ubushobozi buhambaye ugereranyije n’indi mibu yari isanzwe ku mugabane.

Ubu bwoko bwitwa Anopheles Stephensi, busanzwe bumenyerewe cyane ku mugabane wa Aziya n’u Burasirazuba bwo Hagati. Ni ubwoko bw’imibu nabwo bufite ubushobozi bwo kwanduza malaria, igiteye impungenge ariko, ni uburyo imibu yo muri ubu bwoko ifite ubushobozi bwo kubaho mu mijyi, ndetse no gukora ku manywa.

Ubwoko bw’imibu busanzwe henshi ku mugabane wa Afurika buzwi nka Anopheles gambiae, buzwiho kugira ubushobozi bucye bwo kororokera mu mazi y’ibidendezi yanduye cyane, ari nayo mpamvu iyi mibu idakunze kuba mu mijyi nk’uko iba mu byaro, kuko amazi yo mu mijyi aba yanduye kurusha ayo mu cyaro.

Anopheles Stephensi yo iratandukanye, kuko ifite ubushobozi bwo kwihanganira umukungugu ndetse n’umwanda uba mu mijyi, ibituma iyi mibu igira ubushobozi bwo kuba mu mijyi minini.

Kuva mu mwaka wa 2012, iyi mibu yagaragaye bwa mbere mu bihugu bya Afurika itari yarigeze igaragaramo. Yahereye muri Djibouti, ikomereza muri Ethiopie muri 2016, ndetse ubuherutse ikaba yaragaragaye muri Sudan mu mwaka ushize.

Mu gihe kandi anopheles gambiae ikunze cyane kugaragara ahantu hapfutse kandi nabwo mu gicuku, anopheles Stephensi yo ifite ubushobozi bwo kuba hanze, ndetse ikanakora ku manywa, byose bituma ubu bwoko bw’imibu buba ubwa mbere mu gukwirakwiza malaria ku mugabane wa Aziya.

Kuba ubu bwoko bukomeje kugaragara ku mugabane wa Afurika ku bwinshi, bituma ubuzima bwa miliyoni zirenga 126 z’Abanyafurika batuye mu mijyi nka Mombasa na Lagos iri ku butumburuke bwakwihanganirwa n’iyi mibu, bujya mu kaga ko guterwa n’icyorezo cya malaria, ibintu byari bitangiye kugabanuka ku mugabane wa Afurika.

Mu mijyi 68 ituwe n’abarenze miliyoni imwe ku mugabane wa Afurika, 44 yose ishobora guturwamo n’ubwoko bw’imibu bwa Anopheles Stephensi, bigatuma miliyoni 126 z’Abanyafurika batari basanzwe bagerwaho na malaria, biyongera ku bandi barenga miliyoni 150 basanzwe barwara iyi ndwara ku mugabane wa Afrika buri mwaka.

Iyi ndwara yahitanye abarenga 405 000 ku Isi muri 2018, abarenga 94% bakaba bari muri Afurika yo munsi y’ubutayu bwa Sahara.

Muri miliyoni zirenga 228 zanduye malaria ku Isi muri 2018, 93% bari mu karere ka Afurika yo munsi y’ubutayu bwa Sahara.

Ni mu gihe kandi hamaze iminsi havugwa amakuru y’uko imiti isanzwe ikoreshwa cyane mu kuvura malaria ku mugabane wa Afurika, itangiye kugenda icika intege, ku buryo bishoboka ko nta gikozwe, iyi ndwara ishobora kuganza imiti isanzwe iyivura, ibintu bikarushaho kuba bibi ku barenga miliyari eshatu z’abatuye Isi, batuye mu bice bishobora kwakira malaria.

Ubwoko bwa Anopheles Stephensi buri kwiyongera ku mugabane wa Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .