Ubucuruzi bwa Uganda mu gihombo kidasanzwe kubera umubano mubi n’u Rwanda

Yanditswe na Musangwa Arthur
Kuya 28 Kanama 2020 saa 08:31
Yasuwe :
0 0

Umubano hagati y’u Rwanda na Uganda, umaze imyaka itatu uhungabanye mu buryo bukomeye, aho u Rwanda rushinja Uganda ibirimo kubangamira ubucuruzi bwarwo, guhohotera abanyarwanda no gufasha imitwe igamije guhungabanya umutekano warwo, mu gihe Uganda ishinja Abanyarwanda ubutasi.

Ibi bikomeje kugira ingaruka zikomeye ku bucuruzi cyane cyane ubwa Uganda, yari ifite isoko rinini mu Rwanda.

Imibare ya Banki Nkuru ya Uganda, yerekana ko muri Kamena 2020 ibicuruzwa Uganda yohereza mu Rwanda byagabanyutse bigera kuri miliyoni 328 z’amashilingi, ugereranyije na miliyari 52 z’amashilingi, byariho mu gihe nk’iki umwaka ushize.

Ni ubwa mbere kuva Uganda yatangira kohereza ibicuruzwa mu Rwanda, hoherejwe bike cyane birimo ibikoresho by’ubwubatsi nka sima n’ibindi. Ibi bikaba birimo gushegesha ubucuruzi bwa Uganda ku gice cy’ibyo yohereza mu mahanga.

Umwuka mubi hagati y’u Rwanda na Uganda utarabonerwa umuti mu myaka irenga ibiri ishize, ukomeje gushegesha ubucuruzi ku buryo umusaruro Uganda ikura mu byo yohereje wagabanutseho 81 ku ijana.

Urugero nko muri Gicurasi 2019, umusaruro Uganda ikura mu byo yohereje mu Rwanda byageze kuri miliyoni $2.64 zivuye kuri miliyoni $14.51 wari ho muri Gashyantare uwo mwaka.

Mu mpera za Gashyantare umwaka ushize, Guverinoma y’u Rwanda yasabye abaturage bayo guhagarika kujya muri Uganda kubera impungenge z’umutekano wabo. Ni nyuma y’ubuhamya bw’abari bakomeje kwirukanwa ku butaka bw’icyo gihugu bagaragaza ihohoterwa n’iyicarubozo bakorewe, abandi bagafungirwaho ntihamenyekane iherezo ryabyo.

Ibintu byakomeje kuba bibi nyuma y’umwanzuro wasabye amakamyo anyura hagati y’ibihugu byombi kutongera gukoresha umupaka wa Gatuna kubera imirimo yo kuhubaka, ahubwo ayoborwa ku wa Kagitumba, Kagitumba/Mirama hills.

Ibi byemezo byakomye mu nkokora ubucuruzi bwa Uganda bwari bumaze kwizera isoko rikomeye mu Rwanda, kuko u Rwanda rwashimangiye ko urujya n’uruza rw’ibicuruzwa rudashoboka mu gihe urw’abantu rwazitiwe n’ihohoterwa ry’Abanyarwanda.

Abacuruzi na bamwe mu bayobozi b’uduce twegeranye n’u Rwanda, bakomeje kotsa igitutu ubuyobozi bwa Uganda, basaba ko umubano hagati y’ibihugu byombi usubizwa ku murongo kubera akababaro abaturage babo batewe n’ihungabana ryawo.

Urugero ni aho muri Nyakanga umwaka ushize, Roofings Mills Limited, ikora ibikoresho by’ubwubatsi yavuze ko yahomye miliyoni $4, Hima Cement ikora sima ihomba miliyoni $3.5 naho uruganda rukora ibinyobwa rwa Uganda Breweries Ltd ruvuga ko rwahombye miliyoni 1.5 z’amapound.

Ibi birashimangira ibyavuzwe n’Umwarimu mu by’Ubukungu muri Kaminuza ya Makerere muri Uganda, Ramathan Ggoobi, yigeze kuvuga ko u Rwanda aricyo gihugu gifite agaciro gakomeye ku buzima bw’ubukungu bwa Uganda kurusha u Bushinwa, u Buhinde, u Buyapani, u Bwongereza na Leta Zunze Ubumwe za Amerika.

Ku rundi ruhande ariko ubuyobozi bwa Uganda bwabwiye abaturage b’iki gihugu ko bagomba kwikuramo u Rwanda, bagashaka andi masoko mu karere boherezamo ibicuruzwa byabo ndetse bunabashishikariza kwishora muri magendo.

Muri Gicurasi 2019, Perezida Museveni yagize ati “Nubwo umupaka wafunzwe, ubucuruzi buzakomeza, buzananyura mu nzira ya magendu. Ntushobora guhagarika ubucuruzi unyuze ku buyobozi bw’umupaka, abantu bahitamo magendu”.

Ubu butumwa bwarumviswe ndetse burakurikizwa nubwo inzego z’umutekano z’u Rwanda, zidahwema gukoma mu nkokora abafite uyu mugambi wa magendu.

Imibare ya Banki nkuru ya Uganda, irashimangira ibyavuzwe na Minisitiri w’Imari n’Igenamigambi, Dr Uzziel Ndagijimana, by’uko haramutse hagize igituma ubucuruzi hagati ya Uganda n’u Rwanda bugabanuka, igihombo cyinshi cyaba ku watakaje isoko.

Ati “Igihombo cyaba kuri Uganda kurusha u Rwanda. Kubera ko kuri twe, Uganda ni isoko rito twoherezagaho ibintu bike, bo batugurishaho byinshi inshuro nyinshi.”

Imibare y’Ikigo cy’Igihugu cy’Ibarurishamibare (NISR), yerekana ko mu gihembwe cya mbere cya 2020, mu bihugu u Rwanda rwatumijemo ibicuruzwa byinshi hatarimo Uganda.

Gusa ariko u Rwanda rwohereje muri EAC ibicuruzwa birukomokamo bifite agaciro ka miliyoni $14.21 ni ukuvuga 7% k’ibyo rwohereje birukomokamo. Muri ibyo byose 38.52% byoherejwe muri Uganda, bikaba bifite agaciro ka miliyoni $ 5.47.

Ibicuruzwa bituruka muri Uganda bijya mu Rwanda byaragabanyutse cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .