Sudani yatangiye iperereza ku byaha byakozwe ku butegetsi bwa Bashir

Yanditswe na Uwase Joie Clarisse
Kuya 23 Ukuboza 2019 saa 08:23
Yasuwe :
0 0

Leta ya Sudani yatangije iperereza ryimbitse ku byaha byakorewe mu gace ka Darfur kuva mu 2003 bigizwemo uruhare n’abayobozi bahoze muri Guverinoma ya Perezida Omar al-Bashir.

Bashir yahiritswe ku butegetsi muri Mata 2019 nyuma y’imyigaragambyo ikomeye y’abaturage yatangijwe n’izamuka ry’igiciro cy’umugati, aregwa ibyaha birimo ibya ruswa no gutunga amafaranga y’amanyamahanga binyuranye n’amategeko.

Imibare ya Loni igaragaza ko imvururu zavutse hagati y’uruhande rwa Leta n’abarwanyi batavuga rumwe nayo ku ngoma ya Bashir yasize abantu bagera ku 300,000 bitabye Imana mu gihe abasaga miliyoni 2.5 bakuwe mu byabo.

Umushinjacyaha wa Repubulika ya Sudani, Tagelsir Al Heber, yatangaje ko hatangije iperereza kuri ibyo byaha.

Ati ‘‘Twatangiye iperereza ku byaha byakozwe mu gace ka Darfour guhera mu 2003.’’

Yongeyeho ko “ibi byari ibirego ku bahoze mu butegetsi’’ bwa Bashir ushakishwa n’Urukiko Mpuzamahanga Mpanabyaha (ICC), ku ruhare rwe mu mvururu zabereye i Darfur.’’

Inyandiko zisaba itabwa muri yombi rya Bashir zatanzwe na ICC mu 2009 na 2010 zimushinja ibyaha bya Jenoside, iby’intambara n’ibyibasiye inyokomuntu ariko ntiyigeze ajyanwa i La Haye mu Buholandi aho uru rukiko rubarizwa.

Heber yanavuze ko Salah Gosh wahoze ashinzwe ibijyanye n’iperereza ku butegetsi bwa al-Bashir yatangiye gukurikiranwa.

Ati “Hari ibirego bine kuri Salah Gosh ndetse twatangiye uburyo bwo kumugarura muri Sudani bigizwemo uruhare na Interpol.’’

Gosh wayoboye Urwego rw’Igihugu rw’Iperereza (National Intelligence and Security Services -NISS) yeguye ku mirimo ye muri Mata nyuma y’iminsi ibiri Bashi ahiritswe ku butegetsi, ahita ahungira hanze y’igihugu.

BBC yanditse ko iperereza riri gukorwa ku byaha byakorewe i Darfour rireba abayobozi bahoze mu butegetsi bwa Bashir ariko bose amazina ntiyashyizwe hanze.

Tariki 14 Ukuboza 2019, Urukiko rwo mu Mujyi wa Khartoum rwahamije Bashir ibyaha bya ruswa, nyuma yo gutunga amafaranga y’abanyamahanga binyuranye n’amategeko, indonke n’ibindi.

Bashir ngo yahawe amadolari agera kuri miliyoni 25 n’Umwami wa Arabia Saoudite, Mohammed bin Salman, gusa we yasabye ko yakurwaho iki cyaha.

Bashir wayoboye Sudani mu myaka 30 ubu afungiwe muri Gereza ya Kobar iri mu zikomeye i Khartoum, aho abantu batavugaga rumwe n’ubutegetsi bwe bafungiwe.

Omar Hassan Ahmad al-Bashir w’imyaka 75 na we ari guhatwa ibibazo kuri coup d’etat yo mu 1989 yamugejeje ku butegetsi.

Bashir wayoboye Sudani mu myaka 30 ubu afungiwe muri Gereza ya Kobar iri mu zikomeye i Khartoum
Imvururu hagati ya Leta n’abarwanyi batavuga rumwe nayo ku ngoma ya Bashir yasize abantu bagera ku 300,000 bitabye Imana mu gihe abasaga miliyoni 2.5 bakuwe mu byabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza