00:00:00 IGIHE NETWORK KN KINYARWANDA EN ENGLISH FR FRANCAIS

RDC yinjije abasirikare 2000 bashya nyuma y’intabaza ya Tshisekedi

Yanditswe na Musangwa Arthur
Kuya 6 Ugushyingo 2022 saa 08:29
Yasuwe :

Umuvugizi w’Ingabo za Repubulika Iharanira Demokarasi ya Congo, Général Sylvain Ekenge, yatangaje ko abantu basaga 2000 binjijwe mu ngabo za Leta guhera ku wa Kane, nyuma y’intabaza ya Perezida Tshisekedi wasabye abasore n’inkumi guhagurukira kurwanira igihugu cyabo.

Ni ubutumwa yatanze avuga ko igihugu cyugarijwe n’umutwe wa M23, avuga ko urimo "gufashwa n’u Rwanda mu basirikare n’ibikoresho."

Yavuze ko mu guhangana n’ibyo bikorwa, RDC yari ifite amahitamo abiri ariyo dipolomasi cyangwa intambara.

Tshisekedi yakomeje ati "Nahisemo kubanza ubwo buryo mbere, mbere yo kugera ku bwa kabiri mu gihe nta musaruro bwaba butanze."

Mu ijambo yavuze ku wa 3 Ugushyingo kuri televiziyo y’igihugu, yasabye abaturage kujya mu gisirikare kugira ngo barwanire igihugu cyabo.

Yakomeje ati "Ku rundi ruhande, ndongera gushimangira ubusabe mperuka gutanga ku rubyiruko rwacu rushaka kwiyandikisha mu gisirikare, nibutsa amabwiriza natanze ku Mugaba Mukuru w’Ingabo bwo kwihutisha gushyiraho ibigo bifasha mu kwinjiza abasirikare bashya, mu ntara 26 z’igihugu cyacu."

Mu kiganiro yagiranye n’abanyamakuru kuri uyu wa Gatandatu i Kinshasa, hamwe n’Umuvugizi wa Guverinoma, Patrick Muyaya, Gen Ekenge yavuze ko mu buryo bugaragara, urubyiruko rwitabiriye ubusabe bwa Perezida bwo kwinjira mu gisirikare, no kurushaho kuba maso kugira ngo bunganire igisirikare.

Yakomeje ati “Nyuma yo guhamagarwa n’Umukuru w’Igihugu, urubyiruko rusaga 2000 rwo muri Goma gusa, rwamaze kwiyandikisha.”

Yahishuye ko urubyiruko rumaze kwinjizwa mu ngabo ruzoherezwa mu bigo by’imyitozo bya gisirikare birimo Kitona muri Kongo-Central.

Muri Icyo kiganiro n’abanyamakuru kandi, Gen Ekenge yabajijwe ku mpamvu abasirikare bemeye guhara ibice bya Kiwanja na Rutshuru bikajya mu maboko ya M23, yari imaze iminsi isaga 150 ifashe Bunagana.

Yavuze ko hafi teritwari ya Rutshuru yose imaze gufatwa.

Yakomeje ati “Kuva muri Kiwanja na Rutshuru ni uko tutashoboraga kurwanira ahantu hari abaturage, kubera ko inshingano yacu ya mbere ni ukurinda abaturage. Nta bisobanuro tugomba uwo ari we wese.”

Yavuze ko inzego zitandukaye zifite inshingano zaco, haba inzego za politiki ndetse na dipolomasi, abasirikare nabo bakagira izabo.

Yakomeje ati “Nk’uko mubizi, igihugu cyacu, babivuga batabivuga, kiri mu bihano byo kutemererwa kugura intwaro, kandi muri icyo gihe byahaye intwaro umwanzi wacu.”

Yavuze ko umutwe wa M23 mu 2012 wafashe Goma, nyuma y’umwaka umwe ngo uza kwirukanwa.

Icyo gihe ngo byasabye ko igisirikare cyisuganya, kigahindura amayeri kugira ngo kitarwana mu buryo bwatuma abantu bapfa bitari ngombwa.

Gen Ekenge yakomeje ati “Tuzakora ibishoboka byose ku buryo tubasha kwisubiza uduce tose uyu munsi twafashwe n’u Rwanda, kuko ubundi M23 ntabwo ifite umubare w’abasirikare cyangwa ubushobozi, abari hariya bose ni abasirikare b’u Rwanda n’ibikoresho byabo.”

Yakomeje ati “Ndabizeza ko nta santimetero n’imwe y’igihugu cyacu izasigara munsi y’ibirenge bw’umwanzi.”

Mu gihe RDC ikomeza gushinja u Rwanda kugira uruhare mu bibazo byo mu burasirazuba bwayo, rwo rushimangira ko ntaho ruhuriye nabyo, ahubwo guverinoma ikomeje kuyiobya uburari, yihunza ibibazo byayo ikabyegeka ku bandi.

Umuvugizi wa FARDC, Gen Sylvain Ekenge yavuze ko abasore n'inkumi bakomeje kwitabira igisirikare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .