00:00:00 IGIHE NETWORK KN KINYARWANDA EN ENGLISH FR FRANCAIS

Perezida William Ruto yaciye ikoreshwa ry’impapuro mu nama y’Abaminisitiri

Yanditswe na Ntabareshya Jean de Dieu
Kuya 7 Mutarama 2023 saa 09:50
Yasuwe :

Perezida wa Kenya, William Ruto yavuze ko mu gihe cy’Inama y’Abaminisitiri bakwiye gutangira gukoresha uburyo bw’ikoranabuhanga mu itumanaho aho kwitwaza umurundo w’impapuro.

Ibi yabigarutseho mu mwiherero w’abagize Guverinoma wabereye muri Nyeri County aho yashimangiye ko uburyo gakondo bwifashishwa mu guhana amakuru by’umwihariko ikoreshwa ry’impapuro buri mu bidindiza serivisi bityo hagiye gutangiza ikoreshwa ry’ikoranabuhanga.

Ati “Guhera ku nama z’abaminisitiri ziri imbere, Mercy Wanjau yaduhaye icyizere ko inama zacu zitazongera kurangwamo impapuro. Tugiye kwimakaza uburyo bw’ikoranabuhanga mu mikorere yacu.”

Yakomeje ati “Mu buryo bw’iterambere biteganyijwe ko guverinoma yimakaza ikoranabuhanga muri buri nzego kugira ngo yihutishe itangwa rya serivisi.”

Perezida Ruto yavuze ko hakenewe ko serivisi zitangwa zishyirwa mu ikoranabuhanga kandi bizihutisha imikorere ndetse no guhanga udushya.

Ati “Kohereza ibaruwa bifata igihe kirekire kurusha gukoresha email. Ubundi email igerayo vuba mu gihe ibaruwa isaba ko tugomba gukenera intumwa izayijyana nk’umumotari n’uwo uyoherereje nawe akazohereza intumwa n’izindi nzira zigoye. Ntekereza ko ari icyo gihe ngo abanyakenya tubone agaciro k’umutungo dufite mu kwita ku byacu.”

Yavuze ko gukoresha ikoranabuhanga bizafasha guverinoma kuzigama imwe mu mitungo yangizwaga binyuze mu gukoresha uburyo busanzwe mu bikorwa bitandukanye.

Yasabye ko abagize guverinoma bakomeza kugirana inama mu guhanga udushya no gufashanya kuri ubu buryo bushya bugomba gukoreshwa kugira ngo ishyirwa mu bikorwa ryabwo rizarusheho kugenda neza.

Ati “Buri mwanditsi n’umwanditsi mukuru w’Inama y’Abaminisitiri bagomba kubigira ibyabo gukorana na Minisiteri y’Ikoranabuhanga ngo serivisi za guverinoma zinyuranye zishyirwe mu buryo bw’ikoranabuhanga mu gihe cy’amezi atandatu ari imbere kugira ngo abaturage ba Kenya babashe kuzibona bidasabye inzira nyinshi.”

Biteganyijwe ko nibura 80% bya serivisi za leta zigomba kuba zarashyizwe ku ikoranabuhanga.

Bimwe mu byo Ruto yijeje abaturage ubwo yiyamamazaga harimo ko Kenya igomba kugirwa igicumbi cy’ikoranabuhanga muri Afurika ndetse n’icyiciro gihuza ibihugu bya Afurika y’Iburasirazuba mu ikoranabuhanga.

Ubutegetsi bwa William Ruto buteganya ko bushobora gukoresha arenga miliyoni 400 z’amadolari mu kuzamura urwego rw’ikoranabuhanga muri Kenya.

Nko mu 2021 Kenya yashyize ku isoko abahanga mu byo guteza imbere porogaramu za mudasobwa 2000 muri bo 15% gusa ni abagore.

William Ruto ateganya kubaka nibura umuyoboro wa internet (Fibre Optic) wa kilometero 100.000 mu gihugu hose mu gihe cy’imyaka itanu iri imbere.

William Ruto yiyemeje ko hagomba gukorwa ibishoboka byose hakagabanywa imisoro itangwa kuri Smartphone [telefoni zigezweho] kugira ngo umuturage imugereho ihendutse abashe koroherwa no kubona serivisi za Leta yifashishije ikoranabuhanga.

Perezida Ruto yavuze ko guverinoma igomba kwimakaza ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .