Nigeria: Igisirikare cyarashe mu bigaragambya i Lagos, benshi bahasiga ubuzima

Yanditswe na Uwimana Abraham
Kuya 21 Ukwakira 2020 saa 12:35
Yasuwe :
0 0

Mu murwa Mukuru Lagos muri Nigeria haravugwa impfu z’abantu benshi barashwe n’igisirikare kuri uyu wa 20 Ukwkakira 2020, ubwo bari mu myigaragambyo imaze iminsi muri icyo gihugu yo kwamagana ihohotera rikorwa n’abapolisi.

Umwe mu bari bahari yabwiye itangazamakuru ko ubwe yiboneye imirambo igera muri 20 ndetse n’abakomeretse barenga 50. Amnesty International na yo yavuze ko yakiriye raporo ziteye ubwoba zivuga abishwe.

Ubuyobozi bwahise buvuga ko bugiye gukora iperereza kuri ibi bivugwa, hakaba hahise hashyirwaho umukwabu w’amasaha 24 mu Mujwi wa Lagos no mu tundi duce bihana imbibe.

Iyi myigaragambyo yamagana ihohotera rikorwa n’itsinda rya polisi ryashyiriweho kurwanya ubujura ryiswe SARS, imaze ibyumweru bibiri aho muri Nigeria, mu ntero igira iti “#EndSARS.

Uwahoza ari umunyamabanga wa Leta muri Leta Zunze Ubumwe za Amerika, Hillary Clinton, yagize icyo avuga kuri ibi biri kuba muri Nigeria, aho yahamagariye Perezida Muhammadu Buhari n’igisirikare guhagarika kurasa urubyiruko ruri kwigaragambya rwamagana SARS.

Ibi kandi byanavuzweho n’umukinnyi mpuzamahanga w’icyo gihugu, Odion Jude Ighalo, washinje leta ya Nigeria kwica abaturage bayo, mu mashusho yasakaje ku rubuga rwe rwa twitter ati “Ntewe ipfunwe n’iyi guverinoma.”

Uku kuraswa kw’abigaragambyaga kwabaye ku wa kabiri, abari bahari bavuga ko abasirikare bakoze uruzitiro ahari abigaragambyaga ubundi ngo bakabarasamo urufaya mu gihe kigera ku isaha, benshi cyane ngo babiguyemo, ndetse n’abakomeretse ntibabonye ubutabazi kuko imbangukiragutabara na zo zabujijwe gutambuka urwo ruzitiro.

Amnesty International yo muri Nigeria ibinyujije kuri twitter, yaranditse iti “Twakiriye ibimenyetso bifatika ariko bibabaje cyane by’uburyo hari gukoreshwa imbaraga z’umurengera ziri gutera impfu nyinshi z’abigaragambya mu gace ka Lekki Toll Gate muri Lagos.”

Umuvugizi wa Guverineri w’Umujyi wa Lagos, Gboyega Akosile, yanditse kuri twitter ati “Biravugwa ko habayeho irasana kuri Lekki Toll Plaza, byaje bikurikira umukwabu w’amasaha 24 wari washyizweho muri Lagos wo guhagarika abagizi ba nabi bihishe mu myigaragambyo ya #EndSARS ngo bateze akaduruvayo mu baturage b’inzirakarengane.”

Iyi myigarambyo yatangiye mu byumweru bibiri bishize, aho yasabaga iseswa ry’umutwe wa polisi wa SARS washinjwaga kurenganya, gufunga binyuranyije n’amategeko no kurasa abaturage.

Ibi byatumye ku wa 11 Ukwakira, Perezida Buhari ahita asesa uyu mutwe, ariko abigaragambya barakomeje basaba ko haba impinduka no mu zindi nzego z’umutekano, banasaba ko haba impinduka mu buryo igihugu kiyobowe.

Guverineri wa Lagos, Babajide Sanwo-Olu, yavuze ko abagizi ba nabi bacengereye mu myigaragambyo.

Igisirikare cyaraye kirashe mu bigaragambya benshi bahasiga ubuzima
N'ubwo umutwe wa SARS washeshwe abigaragambya ngo baracyashaka izindi mpinduka mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .