00:00:00 IGIHE NETWORK KN KINYARWANDA EN ENGLISH FR FRANCAIS

Mozambique yahaye imbabazi 25 bahoze mu byihebe i Cabo Delgado

Yanditswe na Ntabareshya Jean de Dieu
Kuya 22 Ukwakira 2022 saa 10:41
Yasuwe :

Perezida wa Mozambique, Felipe Nyusi, yahaye imbabazi abantu 25 bahoze mu mitwe y’iterabwoba yari yarayogoje intara ya Cabo Delgado bafashwe mu bihe bitandukanye.

Bahawe imbabazi mu birori byabereye mu Ntara ya Nampula, aho bavuze ko bagiye bafatirwa mu bice bitandukanye bizezwa akazi bakisanga bagiye muri iyo mitwe y’iterabwoba.

Perezida Nyusi yavuze ko abababariwe ari abemeye kumanika amaboko nyuma yo kotswa igitutu n’ingabo ziri muri iki gihugu zaba iz’u Rwanda n’izo mu bihugu bigize Umuryango w’Afurika y’Amajyepfo (SADC).

Ibihugu bigize uyu muryango wa SADC ni Angola, Botswana, Comoros, RDC, Eswatini, Lesotho and Madagascar, Malawi, Mauritius, Mozambique, Namibia, Seychelles, Afurika y’Epfo, Tanzania, Zambia na Zimbabwe.

Ibitero by’imitwe y’inyeshyamba muri Mozambique byatangiye mu 2017 ndetse iyi mitwe yigarurira uduce dutandukanye turimo Mocimboa da Praia bikomeza byerekeza mu majyaruguru ya Cabo Delgado by’umwihariko muri Macomia, Palma na Nangade n’ahandi.

Mu 2021 nibwo ingabo z’u Rwanda zageze muri iki gihugu muri gahunda yo guhashya imitwe y’iterabwoba ndetse mu gihe cy’umwaka zimazeyo zakoze ibishoboka byose ku buryo uyu munsi uduce twose zari zarahawe zamaze kudushyitsa mu maboko ya Leta.

Nyuma yo guhangana n’imitwe y’iterabwoba yari iri aho hanakurikiyeho gahunda yo kongera gutuza abari barakuwe mu byabo n’intambara aho muri Palma hamaze gucyurwa impunzi ibihumbi 87, Mocimboa da Praia hacyuwe ibihumbi 26, Macomia ho hacyuwe ibihumbi bitatu mu gihe Mweda ari abarenga ibihumbi 40.

Kugeza ubu, ubuzima muri iyi ntara bwamaze kugaruka kuko hakomeje urugamba rwo kongera kubaka ibyangijwe n’intambara aho na bimwe mu bigo bikomeye byahakoreraga nka sosiyete y’Abafaransa Total Energies yatangiye imirimo yayo ndetse n’ibindi bikorwaremezo bikomeje gushyirwamo imbaraga kubakwa.

Ku ruhande rw’Ingabo z’u Rwanda zari zimazeyo umwaka kuri ubu zamaze gusimburwa kuko guhera muri Nzeri hoherejweyo iziyobowe na Gen Maj Eugene Nkubito naho umuyobozi w’urugamba akaba Brig Gen Frank Mutembe ngo bakorere mu ngata bagenzi babo.

Ibyihebe byo byarirukanywe, abaturage basubizwa mu byabo, bacungirwa umutekano ku buryo ubu bishimiye uko babanye n’ingabo z’u Rwanda.

Ubu igisigaye ni ukubakariza umutekano, kubaha icyizere ubuzima bugakomeza.

Ingabo n'abapolisi b'u Rwanda bakomeje kugarura ubuzima mu bice byari byarayogojwe n'ibyihebe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .