00:00:00 IGIHE NETWORK KN KINYARWANDA EN ENGLISH FR FRANCAIS

Mali yikuye muri G5 Sahel; Raila Odinga arashaka kubaka amateka mashya: Amakuru y’ingenzi muri Afurika

Yanditswe na Kanamugire Emmanuel
Kuya 16 May 2022 saa 11:26
Yasuwe :

Mali yatangaje ku mugoroba wo kuri iki Cyumweru ko yikuye mu ihuriro rya G5 Sahel kandi ko n’ingabo zayo zari zishinzwe kurwanya imitwe y’iterabwoba izazikuramo.

Iki gihugu cyangiwe guhabwa ubuyobozi bw’uyu muryango cyari gihuriyemo na Mauritanie,Tchad, Burkina Faso na Niger.

Itangazo leta yashyize hanze rigira riti “Guverinoma ya Mali yafashe icyemezo cyo kuva mu nzego zose za G5 Sahel harimo n’umutwe w’ingabo uhurirweho. Iki cyemezo kizamenyeshwa ibihugu binyamuryango nk’uko biteganywa n’amabwiriza.”

Iri tangazo rikomeza rivuga ko inama y’abakuru b’ibihugu byo muri G5 Sahel yagombaga kuba muri Gashyantare 2022, i Bamako ari yo yari guhesha Mali kuyobora uyu muryango ariko ngo hashize amezi hafi atatu itabaye.

Mali yamagana yivuye inyuma impamvu ishingiye ku bibazo byayo bya politiki muri kimwe mu bihugu bya G5 Sahel, ko ari yo ishyirwa imbere mu bituma idahabwa ubuyobozi bw’uyu muryango ariko ntisobanure icyo gihugu icyo ari cyo.

Kudahabwa uyu mwanya kwa Mali ngo byanagizwemo uruhare n’u Bufaransa nubwo bitavuzwe mu buryo bweruye.

Umwe mu bayobozi ba hafi ya Colonel Assimi Goïta we yamaganye ibihugu byo muri G5 Sahel bitubahiriza amategeko agenga uyu muryango.

Mali yashyiriweho ibihano by’ubukungu na dipolomasi kuva ku ya 9 Mutarama bikozwe n’ibihugu byo mu Burengerazuba bwa Afurika nyuma ya Coup d’etat ebyiri zabaye muri Kanama 2020 na Gicurasi 2021.

Ukwikura muri uyu muryango ni kimwe mu bishobora gusubiza inyuma umugambi uhurirweho wo kurwanya iterabwoba mu bihugu byo mu Burengerazuba bwa Afurika.

Mali yatangaje ko yikuye muri G5 Sahel nyuma yo kutumvikana n'ibihugu bigize uyu muryango ku miyoborere yawo yagombaga guhabwa iki gihugu muri Gashyantare uyu mwaka

Nairobi turashaka kuyihindura nka Kigali- Raila Odinga

Raila Odinga wiyamamariza kuyobora Kenya mu matora ateganyijwe muri Kanama 2022, yatangaje ko yifuza gusubiza Kenya icyubahiro yahoranye by’umwihariko Umujyi wa Nairobi ukagira isuku nk’uwa Kigali.

Yabigarutseho mu bikorwa byo kwiyamaza yakoze ku wa 15 Gicurasi 2022 nk’uko NTV yabitangaje.

Odinga yavuze ko mu bice byose bya Kenya, abaturage bananiwe, bakeneye impinduka nyuma y’izabaye mu bihe byo hambere zirimo ko igihugu cyabonye ubwigenge abazungu bakirukanwa, kikagira itegeko nshinga rishya maze kikinjira mu mpinduramatwara mu by’ubukungu.

Yagize ati “Ufite amaso narebe, ufite amatwi yumve. Nairobi yahoze ari umujyi usukuye ariko uyu munsi byarahindutse ni umujyi wuzuye umwanda. Turashaka kugarura Nairobi mu mwanya yahozemo.Turashaka guhangana n’ibibazo bitatu by’ingenzi bibangamiye abaaturage bacu ari byo indwara, ubujiji n’ubukene.Ibyo bibazo byahozeho kandi bifite ubukana bukomeye.”

Yakomeje avuga ko Abanyakenya bahangayitse barimo uurbyiruko n’abagore badafite akazi, ibibazo byo kutagira amazi mu Mujyi wa Nairobi, ibiciro by’ibiribwa n’ubukode bw’inzu bihanitse, ivumbi n’umwanda ahantu hose ku buryo Nairobi ari umunuko.

Ati “Iyo ugeze mu Mujyi wa Kigali ugira ngo ugeze i Burayi.Ahantu hose ubona hari isuku, mu mihanda nta binogo wabonamo. Abanyakenya na bo bashobora gukora nk’ibyo.”

Raila Odinga wiyamamariza kuyobora Kenya, yavuze ko hifuzwa impinduka zikomeye muri iki gihugu

Abasirikare bakuru 34 mu ngabo za Uganda bagiye gusezererwa

Nibura abasirikare 34 bafite amapeti akomeye bagiye gusezererwa mu ngabo za Uganda muri Nyakanga uyu mwaka.

Daily Monitor yatangaje ko mu bagiye gusezerwa harimo abo ku rwego rwa ‘General’ babiri, batatu ba ‘lieutenant general’, 10 bo ku rwego rwa Gen. Maj. na 19 bo ku rwego rwa Brigadier.

Itangazo ryashyizwe hanze na komisiyo ishinzwe gusezerera no gusubiza mu buzima busanzwe abasirikare mu ngabo za Uganda rivuga ko mu bagomba gusezererwa harimo uwahoze ari umuyobozi w’ibikorwa by’ubutasi, Gen. David Sejusa n’uwahoze ari Minisitiri w’Umutekano, Gen Elly Tumwine.

Uru rutonde kandi ruriho Lt Gen John Mugume, Lt Gen Prossy Nalweyiso, Lt Gen Andrew Gutti; Maj Gen Stephen Kashaka, Maj Gen Joram Kakari na Maj Gen Phenehas Kaitirima n’abandi.

Amakuru avuga ko isezererwa ry’abasirikare bakuru barimo abarwanye urugamba rwagejeje Museveni ku butegetsi rizakurikirwa n’ikindi gikorwa cyo kuzamura mu ntera abandi basirikare.

Bamwe muri bagiye gusezererwa bagombye kuba barabikorewe mu 2019 ariko komisiyo ishinzwe ibyo kuzamura mu ntera irabitinza ivuga ko hari abari bakiri mu nshingano mu Nteko ishinga amategeko mu gihe abandi UPDF yanze kubarekura ku mpamvu za politiki.

Abasirikare bakuru 34 bagiye gusezererwa mu ngabo za Uganda

RDC: Ibitero bya ADF byatwaye ubuzima bw’abagera kuri 20

Sosiyete sivile muri Repubulika Iharanira Demokarasi ya Congo yatangaje kuri iki Cyumweru ko abantu 20 ari bo baguye mu bitero byagabwe n’umutwe wa ADF muri teritwari ya Djugu mu cyumweru kimwe.

Umuryango utegamiye kuri leta uharanira uburenganzira bwa muntu (Convention pour le respect des droits humains: CRDH) wemeje ko abantu 20 ari bo bishwe barimo batanu batwitswe. Muri ubu bugizi bwa nabi kandi moto 21 na zo zaratwitswe nk’uko inkuru ya Radio Okapi ibivuga.

Abarwanyi ba ADF bateje impagarara muri Ituri, byatumye abaturage benshi bava mu byabo bakegera ibirindiro by’ingabo z’igihugu, FARDC.

Sosiyete sivile ikomeje gusaba FARDC kongera umurego mu bikorwa bya gisirikare hitabwa ku mutekano w’abaturage.

Ibitero bya ADF bikomeje guhitana abatari bake mu ntara ya Ituri muri Repubulika ya Demokaarasi ya Congo

Ibihumbi by’Abanya-Tunisie biraye mu mihanda bamagana Perezida n’izamuka ry’ibiciro

Mu mihanda yo mu Murwa Mkuru, Tunis, kuri iki cyumweru ibihumbi by’abaturage bari mu myigaragambo yamagana politiki ya Perezida wabo Kais Saied n’izamuka ry’ibiciro by’ibiribwa.

Mu byo bamagana harimo itegeko nshinga rishya ryashyizweho mu buryo bubogamye.
Abateguye imyigaragambyo bavuze ko ishobora gukomeza mu buryo butandukanye burimo kwicara hamwe, gukora ingendo cyangwa kwiyicisha inzara.

Abayitabiriye bitsaga basaba perezida kuva ku butegetsi. Bazamuraga amabendera y’igihugu n’imigati nk’ikimenyetso cy’uko ibiciro by’ibiribwa byazamutse bidahwanye n’ubushobozi bwo guhaha.

Perezida Saied yakoze ibishoboka ngo agire igitinyiro ku butegetsi bwe ndetse yagiye akuraho inzego zatowe n’abaturage uhereye mu mwaka ushize, ubwo yahagarikaga Inteko Ishinga Amategeko.

Imyigaragambyo yari yahinduye isura mu Mujyi wa Tunis, abayitabiriye bamagana izamuka ry'ibiciro by'ibiribwa na politiki ya Perezida wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .