Iperereza ryakomoje ku isano hagati y’icyateje impanuka y’indege ya Ethiopian Airlines n’iya Lion Air

Yanditswe na Mukaneza M.Ange
Kuya 18 Werurwe 2019 saa 12:56
Yasuwe :
0 0

Amakuru y’ibanze yakuwe mu dusanduku tw’umukara tw’indege Boeing 737 Max 8 ya Ethiopian Airlines iherutse gukora impanuka igahitana abantu 157 bari bayirimo, yagaragaje ko hari isano hagati y’icyateje iyi mpanuka n’iya Lion Air yabaye mu 2018.

Ku Cyumweru tariki ya 10 Werurwe 2019 nibwo indege ya Ethiopian Airlines yerekezaga i Nairobi yakoze impanuka nyuma y’imonota itandatu gusa ihagurutse. Yahitanye abantu 157 barimo n’Umunyarwanda.

Minisitiri w’Ubwikorezi muri Ethiopia, Dagmawit Moges, yavuze ko amakuru abari gukora iperereza bamaze kubona agaragaza ko mu byateje iyi mpanuka harimo ibisa n’ibyabaye ubwo indege ya Lion Air yagwaga igahitana abantu 189 bari bayirimo. Yaguye nyuma y’iminota 13 ihagurutse.

CNN ivuga ko Moges atigeze atangaza byinshi ku byo izi mpanuka zombi zihuriyeho. Ibihugu byinshi birimo n’u Rwanda byafashe umwanzuro wo kuba bikumiriye mu kirere no ku butaka bwabyo indege zo mu bwoko bwa Boeing 737 Max 8.

Ku Cyumweru, Umuyobozi Mukuru wa Boeing, Dennis Muilenburg, yavuze ko bakomeje gushyigikira ibikorwa by’iperereza no gufatanya n’abayobozi mu gusesengura amakuru mashya agenda aboneka.

Ubuyobozi bwa Ethiopian Airlines bwaherukaga gutangaza ko nyuma y’iminota mike ihagurutse, uwari utwaye iyi ndege yavuze ko afite ikibazo cyo kugenzura imikorere yayo, ndetse asaba gusubira ku butaka.

Ubwo yahabwaga ubu burenganzira ariko iyi ndege ntiyongeye kugaragara ku byuma byifashishwa mu kuzigenzura, ari nabwo nyuma byaje kumenyekana ko yakoze impanuka.

Ni mu gihe raporo yakozwe ku ndege ya Lion Air, yagaragaje ko nyuma y’iminota mike ihagurutse, abapilote bagerageje gukosora ikosa ryatumaga indege ishaka kugwa ibanje igice cy’imbere mbere y’uko igwa mu nyanja ya Java.

Bikekwa ko impanuka y’izi ndege zombi zishobora kuba zaratewe no kudakora neza kwa porogaramu ituma indege za Boeing 737 Max 8 ziyobora izwi nka ‘Maneuvering Characteristics Augmentation System’

Aka kuma kabitse amakuru mu buryo bw'ikoranabuhanga kagejejwe mu mujyi wa Paris mu Bufaransa ku wa Kane
Impanuka y'indege ya Ethiopian Airlines yaguyemo abantu 157 barimo n'Umunyarwanda
Indege ya Lion Air yo yakoze impanuka mu 2018, igwamo abantu 189

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza