Tanzania: Impungenge kuri Minisitiri urembejwe na Coronavirus wiyeretse itangazamakuru yiyita mutaraga

Yanditswe na Bukuru JC
Kuya 25 Gashyantare 2021 saa 03:19
Yasuwe :
0 0

Bisa nk’aho byari ikibazo cy’igihe gusa kuko nyuma yo kubyitarutsa inshuro nyinshi no kubyamagana, Tanzania igeze ku rwego itakibasha guhisha ubukana bw’icyorezo cya COVID-19 bumaze kwiyongera cyane muri icyo gihugu.

Bigitangira, Perezida John Pombe Magufuli wa Tanzania, yahakanye ubukana bwa COVID-19, asaba abaturage gufata igihe bagasenga ndetse anategeka Minisiteri y’Ubuzima guhagarika ibikorwa byose byo gukurikirana ibijyanye n’iki cyorezo mu gihugu.

Nyuma yaho uyu mugabo yaje kuvuga ko COVID-19 yashize mu gihugu kubera amasengesho ndetse ko Tanzania ititeguye kwakira inkingo izo ari zo zose za COVID-19.

Uko iminsi yicumaga ni ko ubwandu bwakomezaga bukwirakwira ndetse abarimo abaganga bakajya ku mbuga nkoranyambaga bavuga ko hari abantu benshi bari gupfa kuko bari bakeneye umwuka wa Oxygen kandi washize mu mavuriro.

Mu gihugu kandi hakomeje kumvikana impfu nyinshi zifitanye isano na COVID-19 ariko Leta ikazihakana, ikavuga ko ari indwara y’ibihaha iri kwica abantu.

Ibintu byafashe indi ntera mu minsi ishize, nyuma y’urupfu rwa Seif Sharif Hamad wari Visi Perezida wa Zanzibar, byemejwe neza ko yishwe na COVID-19.

Nyuma ye kandi hari abandi barimo Umunyamabanga Mukuru wa Perezida Magufuli wishwe na COVID-19 ndetse n’undi mukozi wa Ambasade ya Namibia muri Tanzania, na we byavuzwe ko yishwe na COVID-19 n’ubwo Leta y’icyo gihugu yakomeje kubyamagana.

Ikibazo cyakomeje gukaza umurego ubwo Umuyobozi w’Ishami ry’Umuryango w’Abibumbye ryita ku Buzima, OMS, Tedros Adhanom Ghebreyesus, yatangazaga ko Tanzania ikwiye gufata ingamba zo kwirinda COVID-19 nyuma y’uko bigaragaye ko abenshi mu bantu baturuka muri Tanzania bajya mu bindi bihugu basangwagamo ubwandu bwa Coronavirus.

Ibihugu nka Oman kandi byahagaritse ingendo zose zinjira muri icyo gihugu ziturutse muri Tanzania ndetse na Kenya ikaza ingamba ku mupaka wayo na Tanzania, ndetse ikaba inaherutse guhagarika abakinnyi bayo biteguraga kwerekeza mu marushanwa yo gusiganwa ku maguru ategerejwe mu minsi iri imbere.

Leta Zunze Ubumwe za Amerika na zo ziherutse gusaba abaturage bazo batuye muri Tanzania kutajya hanze y’inzu zabo ndetse inategeka abatarajyayo gusubika izo ngendo.

Tanzania ikomeje guhisha umuriro w’inzu yahiye

N’ubwo ibi byose byerekana ko muri Tanzania hashobora kuba hari ikibazo gikomeye cya COVID-19, Leta y’icyo gihugu ikomeje ibikorwa byo guhisha ubukana bw’icyo cyorezo.

Ku Cyumweru gishize, Perezida Magufuli aherutse kuvuga ko abaturage bakwiye gukomeza ibikorwa byo gusenga kuko icyorezo cya COVID-19 gikomeje kwiyongera, anasaba abaturage b’icyo gihugu gutangira kwambara agapfukamunwa ariko bagakoresha gusa utwakorewe muri Tanzania.

Yaragize ati “Reka twese duhange amaso ku Mana tunafata izindi ngamba zo kwirinda. Nshyira Imana imbere niyo mpamvu ntambara agapfukamunwa.”

Ku rundi ruhande, Minisitiri w’Imari muri Tanzania, Philip Mpango, uri mu bitaro byo mu Mujyi wa Dodoma, aherutse kwiyereka itangazamakuru avuga ko atarembye nk’uko byari byavuzwe mbere, n’ubwo yagaragaye akorora inshuro nyinshi kandi anahumeka insigane, nk’umuntu urwaye COVID-19.

Muri icyo kiganiro, uyu Minisitiri yari kumwe n’Umuyobozi w’ibitaro ari kwivurizamo ndetse n’undi muganga wari umuri iruhande, bose batambaye agapfukamunwa.

Yaragize ati “Naje kwa muganga ndi muri oxygen ariko mu minsi itatu ishize sinigeze nyikoresha kuko ubuzima bwanjye bumeze neza.”

Ku ruhande rwa Tindu Lissu utavuga rumwe n’ubutegetsi, yavuze ko ibi bikorwa bya Leta ya Tanzania byuzuyemo ubugoryi.

Yaragize ati “Ubwenge bw’abayobozi bacu bwageze kuri uru rwego? Ni inde wemereye uyu murwayi kuza gukororera mu bantu aho kuvurizwa mu mavuriro no kuruhuka? Uyu muganga ni bwoko ki wari uri gukororerwaho nta gapfukamunwa yambaye? Ni iki turi gushaka kwerekana muri ubu bugoryi bwose?”

Imibare ya nyuma y’uko COVID-19 ihagaze, igaragaza ko abantu batarenze 600 mu gihugu gituwe na miliyoni 60 ari bo bamaze kwandura iki cyorezo.

Tanzania yatangiye gushyiraho ingamba zo kwirinda COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .