Amerika yasabye Kenya gushyigikira Israel niba ikeneye amasezerano yoroshya ubucuruzi

Yanditswe na Bukuru JC
Kuya 22 Nzeri 2020 saa 07:56
Yasuwe :
0 0

Leta Zunze Ubumwe za Amerika zamenyesheje Kenya ko niba ishaka ko bakorana ubucuruzi bweruye, ibicuruzwa byo muri Kenya bikajya muri Amerika bidasoze n’ibya Amerika bikaba bityo, igomba kwemera ko izajya ishyigikira Israel mu buryo bweruye.

Iryo ni rimwe mu mabwiriza Amerika isaba Kenya mu masezerano y’ubufatanye mu by’ubucuruzi ibihugu byombi biri kuganiraho. Avuga ko Kenya niba ishaka gukorana ubucuruzi bwihariye na Amerika ibicuruzwa byayo bigahabwa rugari, igomba kwirinda ikintu cyose cyabangamira inyungu za Amerika na Israel.

Ibyo birimo ibihano ibyo bihugu byombi byaba byafatiwe, mu gihe byamaganwe kubw’ibyo byakoze n’ibindi, Kenya igomba kuba ku ruhande rwabyo.

Amerika yasabye Kenya guha rugari ibicuruzwa bya Israel nabyo bikajya byinjira bidasoze, no kwirengagiza ibihano bindi byose by’ubucuruzi byaba byashyizwe kuri Israel.

Kubera uko kuzanamo Israel, bimwe mu bigo by’inzobere mu by’amasezerano mpuzamahanga y’ubucuruzi byasabye Kenya kwitonda, kuko ayo masezerano ashobora kuyishyira mu mazi abira.

Ambasaderi wa Amerika muri Kenya, Kyle McCarter, yabwiye The East African ko ibiganiro bigikomeje, naho ku bibaza niba kuzanamo Israel atari ukurengera, yavuze ko ariko amasezerano bagiye basinyana n’ibindi bihugu yagenze, kandi yagiye atanga umusaruro ufatika.

Leta Zunze Ubumwe za Amerika zimaze igihe ari umuterankunga n’umuvugizi ukomeye wa Israel cyane cyane mu bibazo bya politiki mpuzamahanga bihora biyihanganishije na Palestine.

Abasesenguzi bavuga ko gufatirana Kenya ari amayeri Amerika iri gukoresha ngo ikomeze kubona abayijya inyuma mu bibazo bya Israel.

Imiryango irengera ubucuruzi itandukanye muri Kenya yamaganye ayo masezerano ndetse isaba Kenya kubivamo.

Kenya isanzwe yemera Israel nk’igihugu ariko ntikunze kugaragara mu ruhame ishyigikira cyangwa yamagana imyanzuro yafatiwe Israel. Yakunze gushyigikira ko habaho igihugu cya Israel n’icya Palestine byigenga, ndetse mu murwa mukuru Nairobi, hari ibiro by’uhagarariye Palestine.

Amerika yasabye Kenya gushyigikira Israel mu masezerano mashya y'ubucuruzi bigiye gusinyana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .