Ruto yakiriye Macron ku wa 10 Gicurasi 2026. Macron yitabiriye Inama ya ‘Africa Forward Summit’ izaba kuva ku wa 11-12 Gicurasi 2026.

Aba bayobozi ni bo bazayobora iyi nama igamije kwiga ku iterambere, imiyoborere ndetse n’ubufatanye Afurika igirana n’indi migabane yo ku Isi.

Macron yakiriwe ku Kibuga Mpuzamahanga cy’Indege cyitiriwe Jomo Kenyatta (Kenyatta International Airport) na Minisitiri w'Intebe wa Kenya akaba na Minisitiri w'Ububanyi n'Amahanga, Musalia Mudavadi n’abandi.

Ubutumwa Perezida Ruto yashyize ku mbuga nkoranyamaga akabuherekeresha amashusho yakira Perezida Macron, buvuga ko bashishikariye “guteza imbere ubufatanye burambye bwa Kenya n’u Bufaransa hashingiwe ku nyungu impande zombi zisangiye.”

Iyi nama Macron yitabiriye ni bwo bwa mbere yakiriwe n’igihugu gikoresha Icyongereza nka Kenya. Yitezweho guhuza abayobozi, abari mu nzego zitandukanye bahanga ibishya, abafata ibyemezo mu bihugu bya Afurika n’abandi hagamije kurebera hamwe inzira nshya ibihugu byafatanyamo mu bijyanye n’ishoramari, guhanga ibishya, kwimakaza amahoro n’ibindi.

Perezida William Ruto kandi yakiriye abandi bakuru b’ibihugu batandukanye barimo, Joseph Boakai wa Liberia, Alassane Ouattara wa Côte d’Ivoire, Julius Maada Bio wa Sierra Leone na Perezida wa Banki y’Amajyambere ya Afurika, Sidi Ould Tah.

Baganiriye ku bufatanye bw’ibihugu bya Afurika mu nzego nk’u bucuruzi, ubuhinzi, uburezi, ikoranabuhanga n’ibindi.

Byari biteganyijwe ko Africa Forward Summit izitabirwa n’abarenga 1500 barimo Abakuru b’Ibihugu na za Guverinoma barenga 30.