Mu minsi ishize nibwo Perezida Trump yasohoye Iteka rikumira WeChat muri Amerika, aho ryabuzaga ko yakongera kugaragara muri Poragaramu ziri muri App Store na Play Store ku buryo umuntu yazimanura akazishyira muri telefoni ye.

Ikibazo cyo guhagarika WeChat cyageze mu rukiko nyuma y’uko bamwe mu bayikoresha muri Leta Zunze Ubumwe za Amerika biyemeje gutanga ikirego bavuguruza iri teka rya Perezida Trump ryo gufunga uru rubuga.

Uruhande rwa Leta rwagaragazaga ko kuba umucamanza yahagarika iri teka rya Perezida bishobora kurogoya umugambi we w’uburyo bwiza bwo kurwanya ibiteje inkeke k’umutekano wa Amerika.

Nubwo uruhande rwa Leta rwagaragazaga izi mpungenga, umucamanza Laurel Beeler, yavuze ko gukumira uru rubuga binyuranya n’ingingo ya mbere mu itegeko nshinga ry’iki gihugu iteganya ukwishyira ukizana.

Uretse ibi uyu mucamanza yavuze ko kandi nubwo hashobora kuba hari ibimenyetso bigaragaza ko ikoranabuhanga ryo mu Bushinwa ryaba ikabazo ku mutekano wa Amerika, nta bihari byihariye kandi simusiga bigaragaza ko WeChat yaba ari ikibazo ku mutekano wa Amerika.

Nubwo Perezida Trump akomeje gushinja WeChat gutanga amakuru y’Abanyamerika k’u Bushinwa, Leta y’u Bushinwa n’ubuyobozi bw’uru rubuga barabihakana ndetse baherutse gutangaza ko gukumira WeChat bitari bikwiye.

Muri Leta Zunze Ubumwe za Amerika WeChat ni rumwe mu mbuga nkoranyambaga zikunzwe dore ko abagera kuri miliyari 1.2 bayikoresha ku Isi, muri bo miliyoni 19 ni abo muri Leta Zunze Ubumwe za Amerika.

Umucamanza yavuze ko nta bimenyetso simusiga byatuma WeChat ikumirwa muri Amerika nk'uko Perezida Trump yabyifuzaga