Macron yashinje Turikiya uruhare mu byaha bikorerwa muri Libya

Yanditswe na Umwali Zhuri
Kuya 30 Kamena 2020 saa 08:18
Yasuwe :
0 0

Perezida Emmanuel Macron yashinje Turikiya ko ikomeje kwenyegeza intambara muri Libya, aho yavuze ko ifite uruhare mu byaha bikorerwa muri iki gihugu kubera uruhande yafashe.

Macron yavuze ko Turikiya yinjije muri Libya abarwanyi bavuye muri Syria. Turikiya ishyigikiye Guverinoma ya Gisirikare ikomeje kurwanya Gen Khalifa Haftar.

Macron yavuze ko Turikiya iri gukina imikino mibi cyane kandi ko inyuranyije n’ibyemejwe n’inama ya Berlin igamije gushakira amahoro Libya.

Ati “Ntabwo tuzihanganira uruhare Turikiya igira uyu munsi muri Libya”.

Turikiya iherutse kohereza muri Libya indege n’intwaro ku ruhande ishyigikiye, ndetse byifashishwa mu mirwano igamije kwigarurira uduce twose tw’igihugu.

U Bufaransa kandi buherutse gushinja Turikiya ko yabangamiye ubwato bwabwo bwari mu nkengero za Libya bwashakaga kugenzura ubwa Turikiya bwari buhari nabwo bwakekwaga ho kurenga ku mabwiriza yashyizwe na Loni ajyanye n’ibihano byafatiwe Libya mu by’intwaro.

Libya yatangiye kuba isibaniro ry’ibibazo kuva mu 2011 ubwo Muammar Gaddafi wari umaze igihe kinini ayiyobora yari amaze kwicwa. Ubu igihugu kiyobowe na Guverinoma y’Ubumwe bw’Igihugu ikorera mu Murwa Mukuru Tripoli, ishyigikiwe na Qatar na Turikiya.

Ihanganye n’Igisirikare kiyobowe na Gen Haftar, aho we abarizwa mu Burasirazuba bw’Igihugu ariko agenzura ibice byinshi. Ashyigikiwe na Misiri, u Burusiya na Leta Zunze Ubumwe z’Abarabu.

Gen Haftar yagabye ibitero muri Mata umwaka ushize ashaka kwigarurira Umurwa Mukuru ariko ntibiramukundira.

Raporo ya Loni iherutse guhishura ko hari abacanshuro b’Abarusiya bibumbiye mu kigo cyitwa Wagner Group bari kurwana muri Libya bashyigikiye Gen Khalifa Haftar, uhanganye na Guverinoma iriho.

Bivugwa ko Wagner ibarizwamo abo bacanshuro yanagize uruhare mu mvururu zabaye muri Ukraine, Syrie n’ahandi. Guverinoma y’u Burusiya yakunze guhakana ivuga ko nta sano na ruto ifitanye n’uwo mutwe w’abarwanyi.

Iyi raporo ya Loni yakozwe n’itsinda ryigenga rya Loni rishinzwe ibijyanye no kureba uburyo ibihano byafatiwe Libya bishyirwa mu bikorwa. Ntabwo irasohoka kugeza ubu ariko ibigo bitandukanye byamaze kuyibona.

Ni raporo ya paji 57 ivuga ko aba bacanshuro bo muri Wagner bari muri Libya kuva mu Ukwakira 2018 aho “batanga ubufasha mu bya tekiniki mu gukanika imodoka no mu mirwano”. Bagira n’uruhare mu bikorwa byo kugenzura ikirere no mu gutanga ba mudahusha bifashishwa mu mirwano.

Libya ikomeje kuba isibaniro ry'intambara, aho n'ibihugu by'amahanga bivugwa ko biri kubigiramo uruhare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .