Iki cyemezo cyafashwe nyuma y’inama yabaye hifashishijwe ikoranabuhanga. Ibikomoka kuri peteroli bigomba guhita bitangira gukurwa mu bubiko, bigashyirwa ku isoko mu gihe cy’amezi ane.

Mu minsi 20 ya mbere, ibihugu bya G7 n’abafatanyabikorwa babyo biteganya gushyira ku isoko mazutu nyinshi, kugira ngo bihangane byihuse n’izamuka ry’ibiciro byayo.

Perezida w’u Bufaransa, Emmanuel Macron, yavuze ko abayobozi ba G7 bemeranyije gukorera hamwe mu kugabanya ibiciro bya mazutu. Yasobanuye ko gushyira ku isoko utugunguru tugera kuri miliyoni 100 bizajyana no kongera umusaruro w’inganda zitunganya peteroli ndetse no kwirinda ingamba zibangamira ubucuruzi bw’ibikomoka kuri peteroli hagati y’ibihugu by’abafatanyabikorwa.

Mu itangazo ryabo, abayobozi ba G7 bavuze ko izi ngamba zigamije gutuma ibikomoka kuri peteroli bikomeza kuboneka, kurinda ingo n’ibigo ingaruka z’izamuka rikabije ry’ibiciro no kongera ubushobozi bw’urwego rw’ingufu ku isi bwo guhangana n’ibibazo mu gihe kirekire.

Ibihugu bya G7 bizanahuza gahunda zo gusana no kwita ku nganda zitunganya peteroli, kugira ngo inyinshi zidahagarikira umusaruro icyarimwe. Bizashishikariza kandi ibihugu bifite ubushobozi bunini bwo gutunganya peteroli kongera umusaruro, by’umwihariko uwa mazutu.

Iki cyemezo gifashwe nyuma y’uko Perezida wa Leta Zunze Ubumwe za Amerika, Donald Trump, yari akangishije guhagarika ibyoherezwa hanze bya mazutu, mu rwego rwo kugabanya ibiciro muri Amerika, keretse u Burayi bwemeye gushyira ku isoko ibiri mu bubiko bwabwo.

G7 yongeye gushimangira ko izirinda kubuza ibyoherezwa hanze by’ibikomoka ku ngufu hagati y’ibihugu biyigize. Yasabye n’ibindi bihugu bibikora kwirinda gufata ingamba nk’izo, zishobora kurushaho gukaza ikibazo.

Umuyobozi wa IEA, Fatih Birol, yavuze ko ibiciro bya peteroli byatangiye kugabanyuka nyuma y’itangazwa ry’icyemezo cyo gushyira ku isoko utugunguru miliyoni 100.

Ibiciro by’ibikomoka kuri peteroli byazamutse cyane kuva intambara ya Amerika na Israel na Iran yatangira, igahungabanya ikorwa n’itwarwa rya peteroli. Ingengo z’ubwato mu Muhora wa Hormuz, unyuramo peteroli nyinshi zisa nk’izahagaze.