Charlie Hebdo ishobora kwibasirwa na Al-Qaïda nyuma yo kongera gutangaza ibishushanyo bya Mohammed

Yanditswe na IGIHE
Kuya 12 Nzeri 2020 saa 07:12
Yasuwe :
0 0

Ikinyamakuru Charlie Hebdo cyo mu Bufaransa cyongeye kwisanga mu bipimo by’umutwe w’iterabwoba wa Al-Qaïda, nyuma yo kongera gutangaza inkuru zishushanyije zizwi nka ’cartoons’, cyakoze ku ntumwa y’Imana Mohammed, yubahwa cyane mu idini ya Islam.

Uyu mutwe wateguje ko hashobora kongera kuba amahano nk’ayo mu 2015, ubwo abantu 17 barimo abakoraga inkuru zishushanyije mu Bufaransa, bicwaga hagati ya tariki 7 na 9 Mutarama 2015.

Charlie Hebdo yagaruye za nkuru zishushanyije zateje akaga, ubwo ku wa 2 Nzeri 2020 hatangiraga urubanza rw’abantu 14 bashinjwa ubufatanyacyaha mu bitero byo mu 2015, nubwo ababigabye bishwe n’inzego z’umutekano. Ni urubanza byitezwe ko ruzageza mu Ugushyingo.

Mu butumwa Al-Qaïda yasohoye kuri uyu wa 11 Nzeri 2020, yatangaje ko ifitiye u Bufaransa buyobowe na Emmanuel Macron, "ubutumwa bumwe" n’ubwahawe ubwari buyobowe na François Hollande mu 2015. Al-Qaïda ishinja Perezida Macron kuba yaratanze uburenganzira bwo gusohora ibyo bishushanyo.

Ni ubutumwa bwasohowe ku munsi hibukwagaho ibitero Al-Qaïda yagabye kuri Leta zunze Ubumwe za Amerika ku wa 11 Nzeri 2001, bigahitana abatari bake.

Bukomeza buti "Niba ubwisanzure bwanyu bwo gutanga ibitekerezo butubahiriza imipaka, mwitegure guhangana n’ubwisanzure bw’ibikorwa byacu".

Umuyobozi wa Charlie Hebdo, Laurent Sourisseau, wanakomerekejwe mu rutugu mu gitero cyo mu 2015, muri iki cyumweru yabwiye urukiko ko nta kintu na kimwe yicuza mu kuba barongeye gutangaza inkuru ishushanyije yazamuye uburakari bwa Al-Qaïda.

Gusa Sourisseau ubu usigaye urindirwa umutekano mu gutinya ukwisubiramo kw’ibikorwa by’iterabwoba, yavuze ko “iyo tureka gutangaza izi nkuru zishushanyije byari kuba bisobanuye ko twakoze amakosa mu kuzitangaza ku nshuro ya mbere.”

Kongera gutangaza ibi bishushanyo kwa Charlie Hebdo byamaganwe n’ibihugu birimo Iran, Pakistan na Turikiya.

Ku wa 7 Mutarama 2015, abavandimwe Saïd na Cherif Kouachi bishe abantu 11 barimo umunani bakoraga muri Charlie Hebdo, ubwo barasaga batarobanura mu biro by’icyo kinyamakuru mu murwa mukuru Paris, ubwo bagendaga bahunga banica umupolisi.

Nyuma yaho, Amedy Coulibaly yishe umupolisi, ku wa 9 Mutarama yica abagabo bane bose b’Abayahudi. Abakoze ibyo uko ari batatu baje kwicwa na Polisi, ubwo yagotaga aho bari bahungiye.

Charlie Hebdo ikomeje gusembura uburakari bwa Al-Qaïda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .