Bigizwemo uruhare na Trump, Bahrain na Israel biri mu nzira zo kunoza umubano

Yanditswe na Iradukunda Serge
Kuya 12 Nzeri 2020 saa 08:45
Yasuwe :
0 0

Perezida wa Leta Zunze Ubumwe za Amerika Donald Trump, yatangaje ko Israel na Bahrain byemeye ibiganiro bigamije kunoza umubano ndetse bikaba byiteguye gushyira umukono ku masezerano yo guhagarika umwiryane.

Ibi Perezida Trump yabitangaje nyuma y’ikiganiro yagiranye kuri telefone na Minisitiri w’Intebe wa Israel n’umwami wa Bahrain, Hamad bin Isa Al Khalifa.

Nyuma y’iki kiganiro cyahuje aba bagabo uko ari batatu, Perezida Trump abinyujije kuri Twitter yahise atangaza ko ibi bihugu byombi byemeranyije kunoza umubano.

Yagize ati “Iyi ni intambwe y’amateka itewe mu guharanira amahoro mu burasirazuba bwo hagati, gufungura ibiganiro n’umubano hagati y’ibi bihugu bikomeye bifite n’ubukungu buteye imbere bizakomeza impinduka nziza z’Uburasirazuba bwo hagati, bizamure umutuzo, umutekano n’uburumbuke mu karere.”

Uretse kubinyuza kuri Twitter, Perezida Trump na Netanyahu bakoranye ikiganiro n’abanyamakuru kigamije gusobanura iby’iyi ntambwe igiye guterwa mu mubano w’ibi bihugu byombi.

Perezida Trump yavuze ko ubu bwumvikane ari intambwe ikomeye mu kuzana ‘impinduka mu karere’ kandi ko asanga Uburasirazuba bwaranzwe n’imidugararo bwaba bugiye kugira ahazaza heza.

Ati “Umucanga wuzuye amaraso, kuri ubu uzuzura amahoro”.

Misitiri Netanyahu we yavuze ko yashimishijwe n’uku kumvikana hagati ya Israel na Bahrain, yemeza ko kuje gukurikira uko baherutse kugirana na Leta Zunze Ubumwe z’Abarabu.

Uku gushaka gukuraho umwuka mubi hagati ya Israel na Bahrain bije bikurikira indi ntambwe yari iherutse guterwa n’iki gihugu bigizwemo uruhare na Perezida Trump mu kunoza umubano wacyo hagati ya Leta Zunze Ubumwe z’Abarabu.

Biteganyijwe ko ku wa 15 Nzeri aribwo Bahrain, Leta Zunze Ubumwe z’Abarabu na Israel biri bizashyira umukono ku masezerano yo guhagarika umwiryane, mu muhango uteganyijwe kubera muri White House.

Kubera uruhare Donald Trump akomeje kugira mu kunga Israel n’ibihugu by’Abarabu byatumye mu minsi ishize ashyirwa ku rutonde rw’abantu bahatanira ibihembo bya Nobel.

Babifashijwemo na Trump, Minisitiri w'Intebe wa Isiraheli n'Umwami wa Bahrain bagiranye ibiganiro byo kunoza umubano hagati y'ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .