Ibi byatangajwe ku wa 20 Ugushyingo 2026, ubwo Minisitiri w’Intebe w’u Bwongereza, Andy Burnham, yari i Bruxelles mu Bubiligi, aho yagiranye ibiganiro n’abayobozi ba EU bigamije kongera ubufatanye nyuma y’uko igihugu cye kivuye muri uwo muryango, mu cyiswe Brexit.
Ibiganiro byibanze ku masezerano ajyanye no koroshya urujya n’uruza rw’urubyiruko, ubucuruzi bw’ibiribwa, kugabanya ibyuka bihumanya ikirere ndetse n’abimukira.
Guverinoma y’u Bwongereza yatangaje ko ibiganiro byarangiye, ariko ko hari ibibazo bikigomba gukemurwa, birimo ishyirwa mu bikorwa rya gahunda yo korohereza urubyiruko kugenda no gukorera mu bihugu by’impande zombi.
Kimwe mu byateje impaka ni icyifuzo cya EU gisaba u Bwongereza kugabanya amafaranga y’ishuri yishyurwa n’abanyeshuri bo mu bihugu bigize uwo muryango, kugira ngo bangane n’ayo abanyeshuri b’Abongereza bishyura.
EU yahaye u Bwongereza amezi atandatu yo kumvikana ku buryo iki kibazo cyakemurwa.
Mu zindi ngingo zaganiriweho harimo gahunda yiswe Channel action plan, igamije gukaza ingamba zo kurwanya abimukira binjira mu Bwongereza mu buryo bunyuranyije n’amategeko.
Burnham yavuze ko isesengura ryakozwe rigaragaza ko amasezerano mashya na EU ashobora kongera umusaruro mbumbe w’ubukungu bw’u Bwongereza ku kigero cya 0,5%.
Ibi bibaye mu gihe ikigo cy’u Bwongereza gishinzwe kugenzura ingengo y’imari, OBR, cyagaragaje ko Brexit ishobora gutuma ubukungu bw’igihugu bugabanyukaho 4% mu gihe kirekire ugereranyije n’uko bwari kuba bumeze iyo igihugu kiguma muri EU.
Nubwo ibiganiro byasojwe, impande zombi ziteganya gukomeza kuganira ku ngingo zitarumvikanwaho kugira ngo ubufatanye bushya bushyirwe mu bikorwa.





Ibitekerezo 0