00:00:00 IGIHE NETWORK KN KINYARWANDA EN ENGLISH FR FRANCAIS

U Buyapani bwatanze agera kuri miliyoni 360 Frw yo gufasha mu burezi no kubaka imihanda i Nyanza

Yanditswe na Habimana James
Kuya 24 February 2020 saa 09:11
Yasuwe :

Ambasade y’u Buyapani mu Rwanda, yatanze inkunga yo gufasha mu bikorwa bitandukanye birimo ibyo kwigisha urubyiruko kumenya gutunganya imihanda mu buryo buhendutse b, no kubaka ibyumba bishya by’amashuri abanza mu karere ka Nyanza.

Amadolari 288, 566, ni ukuvuga agera kuri miliyoni 274 z’amafaranga y’u Rwanda yahawe Umuryango w’Abayapani udaharanira inyungu CORE, ugamije gufasha uturere gusana imihanda y’imigenderano.

Uyu muryango ufasha urubyiruko rw’u Rwanda gukoresha uburyo buhendutse bwo gusana imihanda yo mu byaro hakoreshejwe ikoranabuhanga rya Do-nou.
Do-nou ni ikoranabuhanga gakondo Abayapani bo mu byaro bifashisha basana imihanda y’imigenderano bitabahenze.

Aya mafaranga yatanzwe, azakoreshwa mu gihe cy’umwaka mu turere twa Rubavu, Ngororero na Kirehe. Urubyiruko rugera kuri 200 rukazahabwa aya mahugurwa.

Ambasaderi w’u Buyapani mu Rwanda, Masahiro Imai, yavuze ko bishimiye gukomeza gufatanya na CORE na Guverinoma y’u Rwanda kuko bifasha urubyiruko kwihangira umurimo.

Yagize ati “Twishimiye gukomeza gufatanya na CORE, ndetse iri koranabuhanga gakondo ry’u Buyapani rikazafasha bitari gusa ugusana imihanda, ahubwo no guhuriza hamwe urubyiruko rwo mu cyaro kajya mu makoperative.”

Yavuze ko kuba imihanda imeze neza bifasha ibikorwa birimo ubucuruzi, uburezi no gutuma abantu bagera kwa muganga mu buryo bwiza.

Umuyobozi wa CORE, Yuko Yokomizo, agize ati “Iyi nkunga izakomeza kudufasha mu gukoresha ikoranabuhanga rya Do-nou ku rwego rw’uturere, bigizwemo uruhare n’urubyiuko kuko niwo mutungo ukomeye w’u Rwanda.”

Yavuze ko uyu mushinga kandi uzibanda mu gutanga ubumenyi ku rubyiruko no gushyiraho amakoperative bikazafasha kugabanya ubushomeri.

Indi nkunga ihwanye n’amadorali ya Amerika 90, 796 hafi miliyoni 86 z’amafaranga y’u Rwanda, yahawe umuryango Gira Impuwe, ufite amashuri abanza mu karere ka Nyanza.

Iyi nkunga izakoreshwa mu kubaka ibyumba by’amashuri n’ubwiherero, kugura intebe 124 n’ameza agera kuri 60.

Mu 2016 nibwo iri shuri ribanza rya Nyanza ryubatswe na guverinoma y’u Buyapani, ariko rikaba rifite n’amashuri y’inshuke.

Ambasaderi Imai yavuze ko iyi nkunga izafasha iri shuri mu gukomeza gutera imbere, ndetse bakaba bizeye ko bazongera umubare w’abanyeshuri.

Umuyobozi uhagarariye umuryango Gira Impuhwe , Dorcelle Mukarugwiza, yavuze ko bizafasha iri shuri kubaka ibyumba bishya mu mashuri y’inshuke kugira ngo bakomeze kwiga neza.

Yagize ati “Iyi nkunga iziye igihe kandi yari ikenewe, bigiye gufasha abanyeshuri bacu gukomeza amashuri abanza hano ku ishuri rimwe, mu gihe azaba amaze kuvugururwa.”

Kugeza ubu muri aya mashuri y’inshuke bahafite abanyeshuri 179, bakaba bateganya ko iyi nkunga izatuma aba banyeshuri biyongeraho 50.

Ambasaderi w’u Buyapani mu Rwanda, Masahiro Imai, yavuze ko iki gihugu cyishimiye gufasha umuryango CORE mu gufasha urubyiruko rw'u Rwanda kwiteza imbere
Ambasaderi w’u Buyapani mu Rwanda, Masahiro Imai, yavuze ko iki bazakomeza kubaha hafi y'u Rwanda mu rugendo rw'iterambere
Umuyobozi uhagarariye umuryango Gira Impuhwe , Dorcelle Mukarugwiza, yavuze ko ubufasha bahawe buzafasha iri shuri kubaka ibyumba bishya mu mashuri y’inshuke kugira ngo bakomeze kwiga neza
Umuyobozi wa CORE, Yuko Yokomizo, yavuze ko iyi nkunga izabafasha gufasha urubyiruko kwiteza imbere
Urubyiruko rwafashijwe na CORE rwabaye intyoza mu kubaka imihanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .