Uru rugendo yarukoze ku wa Gatandatu tariki ya 14 Ugushyingo 2026.

Xinhua yatangaje ko iyi ndege yakoze urwo rugendo ikoresheje ikoranabuhanga rigezweho riyifasha kuguruka.

Sosiyete y’Abashinwa ikora indege z’ubucuruzi, COMAC, yatangaje ko yari irimo abapilote babiri n’umwenjenyeri umwe ushinzwe igeragezwa ry’indege. Yagaragaje ko yakoze neza kandi ibipimo byose by’imikorere yayo bikaba byarageze ku byari byitezwe.

Iyi ndege iteye ite?

CE-25A ni yo ndege ya mbere ikoresha amashanyarazi yakozwe na COMAC igenewe ibikorwa by’ubucuruzi. Yateguwe ahanini kugira ngo itware abagenzi hagati y’imijyi, ku ngendo ngufi.

Ifite ubushobozi bwo gutwara abagenzi 19, ikagenda ku muvuduko wa kilometero 300 ku isaha, ku butumburuke bwa metero 2400. Ishobora gukora urugendo rwa kilometero 400.

Uburemere ntarengwa yemerewe kuba ifite igihe ihaguruka ni toni 10. Ibi ntibivuga ko itwara imizigo ya toni 10, ahubwo ni uburemere bwose bw’indege hamwe n’ibiyirimo igihe ihaguruka.

Ikoresha uburyo bwo kuyisunika bugizwe n’ibizunguruka bikoresha amashanyarazi, biri mu miyoboro yabigenewe kandi bikwirakwijwe ku mababa yayo.

Mu izina CE-25A, inyuguti “C” ihagarariye u Bushinwa ndetse na COMAC, naho “E” ikagaragaza ko ikoresha amashanyarazi. Umubare “25” werekeza ku mabwiriza y’u Bushinwa ya CCAR-25 agenga kwemera indege zo gutwara abantu n’ibintu, naho “A” ikagaragaza ko ari yo ya mbere muri ubwo bwoko.

Mbere y’uru rugendo, CE-25A yari yarakoze urugendo rwayo rwa mbere nta mupilote uyirimo, ku wa 2 Gashyantare 2026. Imaze gukorerwa igeragezwa ry’ingendo 19 yonyine.

Yakozwe na COMAC ku bufatanye na sosiyete ikora batiri ya CATL, Kaminuza ya Shanghai Jiao Tong n’abandi bafatanyabikorwa.

Urwego rushinzwe indege za gisivili mu Bushinwa rwamaze kwakira ubusabe bwo guha ubu bwoko bw’indege icyemezo cy’ubuziranenge n’umutekano. Kwakira ubwo busabe ntibivuga ko yamaze kwemererwa gutangira gutwara abagenzi mu ngendo z’ubucuruzi.