Urukiko Rukuru rushinzwe Amatora muri Brésil rwatangaje ko amajwi yose amaze kubarurwa, Lula yagize 51,79%, mu gihe Bolsonaro yabonye 48,21%.

Bolsonaro yanze kwemera ibyavuye muri ayo matora, anenga icyemezo cyo kongera amasaha abiri ku gihe cyo gutora. Yavuze ko icyo cyemezo kidasobanutse, nubwo abari bashinzwe ibikorwa bye byo kwiyamamaza n’aba Lula bari basabye ko igihe cyo gutora cyongerwa.

Ubwo yagezaga ijambo ku bamushyigikiye i Brasília, Bolsonaro yavuze ko azasaba ko ibyavuye mu matora biseswa.

Icyakora, ibyo ntibyabujije Lula n’abamushyigikiye kwishimira intsinzi bavuze ko ari iy’amateka, cyane ko yari yabanje gutsindwa mu cyiciro cya mbere cy’amatora cyabaye ku wa 4 Ukwakira 2026.

Benshi ntibatekerezaga ko mu byumweru bitatu gusa Lula yashoboraga kwisuganya agatsinda Bolsonaro mu cyiciro cya kabiri cyabaye ku Cyumweru, ku wa 25 Ukwakira.

Ibikorwa byo kwiyamamaza bya Lula byongeye kugira imbaraga nyuma y’icyiciro cya mbere, binyuze mu myigaragambyo yo kumushyigikira no mu bukangurambaga bukomeye ku mbuga nkoranyambaga.

Ni inshuro ya kane Lula atsinze amatora y’Umukuru w’Igihugu. Yayoboye Brésil muri manda ebyiri zikurikiranye, kuva muri Mutarama 2003 kugeza mu Ukuboza 2010, yongera gusubira ku butegetsi muri Mutarama 2023.

Lula ategerejwe n’imbogamizi zikomeye muri manda nshya izatangira ku wa 5 Mutarama 2027.

Mu rwego mpuzamahanga, azakomeza guhangana n’umubano utoroshye afitanye n’ubutegetsi bwa Perezida wa Amerika, Donald Trump.

Nubwo Trump atigeze atangaza ku mugaragaro ko ashyigikiye Flávio Bolsonaro, nk’uko yabikoze ku bakandida batsinze amatora muri Colombie na Honduras, ubutegetsi bwe bwari kwishimira kubona Brésil iyobowe n’uyu munyapolitiki.

Mu gihe Flávio Bolsonaro yari yarasezeranyije kurushaho kwegera Amerika, Lula yari yarayiburiye kutivanga mu matora ya Brésil, ashimangira ko igihugu cye kitazemera kugendera mu kwaha kw’ikindi.

Mbere y’amatora, Lula yari yarasezeranyije kuzahuza impande zitavuga rumwe binyuze mu buryo bushya bwo kuyobora.

Nubwo atatanze ibisobanuro birambuye ku mpinduka ateganya, yashimangiye ko azakomeza guharanira igihugu kirangwa n’ubutabera, giha buri wese amahirwe kandi kigashyira imbere gahunda zisubiza ibibazo by’abaturage.