Karasira Aimable yirukanywe muri Kaminuza y’u Rwanda

Yanditswe na IGIHE
Kuya 14 Kanama 2020 saa 05:30
Yasuwe :
0 0

Umwarimu Aimable Uzaramba Karasira uzwi nka Professor Nigga yirukanywe muri Kaminuza y’u Rwanda yari amaze imyaka 14 yigishamo, nyuma yo gushinjwa imyitwarire mibi mu kazi.

Ibaruwa yanditswe n’Umuyobozi wa Kaminuza y’u Rwanda, Prof Philip Cotton, kuri uyu wa Gatanu tariki 14 Kanama 2020, yabanje kwibutsa Karasira amakosa atandukanye amaze iminsi akora ahabanye n’amategeko agenga abakozi ba Leta.

Ibaruwa ikomeza igira iti “Nyuma yo gusanga hari impanmvu zikomeye by’umwihariko isubiramakosa kuko ibihano byo mu rwego rw’akazi uheruka gufatirwa byafashwe tariki 10 Ukuboza 2019, bigahurirana n’andi makosa y’imyitwarire atandukanye, mbabajwe no kukumenyesha ko wirukanywe muri Kaminuza y’u Rwanda guhera uyu munsi.”

Iyi baruwa yanditswe nyuma y’iminsi mike Koleji y’Ubumenyi n’Ikoranabuhanga muri Kaminuza y’u Rwanda ari naho Karasira yigishaga, imusabye ibisobanuro ku myitwarire itandukanye yamuranze guhera muri Werurwe ubwo amashuri yafungwaga hirindwa icyorezo cya Coronavirus.

Muri iyo baruwa ya mbere, Koleji yamusabye gusobanura iby’amagambo amaze iminsi atangaza ku mbuga nkoranyambaga, harimo aho kuwa 3 Nyakanga anyuze ku rubuga rwa Youtube, yavuze ko “u Rwanda rudaha agaciro umunsi w’Ubwigenge”. Tariki 20 Nyakanga 2020, ngo yagize ati “Mu Rwanda hari ubuzima bubi" ko atifuza "gushyingiranwa n’umunyarwanda ndetse utifuza kuba umunyarwanda”.

Ayo makosa ari nayo yahereweho yirukanwa kandi, harimo kuba akoresheje umuyoboro we wa Youtube yaragiye atangaza amagambo yateza imyivumbagatanyo muri rubanda kandi atesha agaciro urwego akorera n’inzego za Leta muri rusange, bihabanye n’Iteka rya Perezida rigena imyitwarire y’abakozi ba Leta.

Guhera ubwo Coronavirus yatangiraga muri Werurwe uyu mwaka, ngo abarimu basabwe gushyira amasomo bigisha ku rubuga rutangirwaho amasomo mu buryo bw’ikoranabuhanga ntiyabikora, kugeza ubwo yandikirwa yibutswa n’umuyobozi w’ishami yigishamo.

Mu gihe kandi amabwiriza muri Kaminuza y’u Rwanda asaba abarimu kongera ubumenyi bakagera ku cyiciro cya Phd, ngo Karasira yarabyanze ndetse ngo yahawe amahirwe mu 2008 yo kujya kwiga mu mahanga, yanga kuyabyaza umusaruro.

Kaminuza yamwandikiye imumenyesha ko ibabazwa n’uko “afata umwanya munini wo kuvuga ku mbuga nkoranyambaga aho kuwufata yongera ubumenyi bwe no kwita ku kazi” kandi amabwiriza agenga abakozi ba Leta asaba umukozi wese kutajya mu yindi mirimo yaba ihemberwa cyangwa idahemberwa ituma adakora inshingano ze.

Ibaruwa ya Koleji y’Ubumenyi n’Ikoranabuhanga, Karasira yari yasabwe kuyisubiza mu gihe kitarenze iminsi ibiri. Yarasubije ariko ibisobanuro bye ntibyanyura ubuyobozi, biba ngombwa ko hitabazwa akanama gashinzwe imyitwarire.

Mu kiganiro aherutse kugirana na IGIHE, Karasira yavuze ko niba ibyo yakoze ari ibyaha, atakabaye abibazwa n’umukoresha we ahubwo yabibazwa n’inzego zishinzwe kubahiriza amategeko.

Ati “Bavuga ko uhereye igihe Guma mu Rugo yagiriyeho kugeza ubu ngo hari ibintu nagiye ntangaza kandi icyo gihe nta banyeshuri bari bari mu ishuri. Ni uburyo bwo gufunga uburenganzira bwanjye bwo gutanga ibitekerezo. Ntaho bihuriye n’abanyeshuri kuko nabikoze abanyeshuri batiga.”

Yavuze ko ubusanzwe akazi ke agakora neza ndetse ngo mu manota y’imihigo nta na rimwe arajya munsi ya 80%.

Karasira Aimable yirukanywe muri Kaminuza y'u Rwanda ashinjwa imyitwarire mibi

Abajijwe niba we atajya yumva yarengereye bitewe n’ibiganiro atangaza, yagize ati “Kurengera nabyo byashoboka ariko sinagakwiriye kubibazwa n’umukoresha , nagakwiriye kubibazwa na RIB.”

Karasira yavuze ko ibyo akora ntaho bitaniye n’iby’abandi barimu bakorana uretse ko ngo bafashe inzira zitandukanye. Yavuze ko ibitekerezo bye hanze y’ishuri atajya abijyana mu ishuri.

Ati “Abanyeshuri bacu bazi ubwenge. Mu barimu ba Kaminuza harimo abapasiteri, ba Hajj n’abari mu mashyaka ariko iyo bageze mu ishuri bigisha ibyo bagomba kwigisha.”

Umunyeshuri utarashatse ko amazine ye atangazwa wiga mu mwaka wa gatatu mu bya mudasobwa, yashimangiye ko ku bijyanye n’amasomo Karasira nta kibazo cye ariko ko afite ukuntu yitwara hanze bikabatera isoni nk’umuntu ubigisha.

Ati “N’ubundi afite ukuntu atangaje. Biradutungura na none bitewe n’ukuntu avuga ibintu bikabije ariko n’ubundi yitwara ukuntu kudasanzwe. Umuntu wese iyo yumvise ngo wigishwa na Prof Nigga aravuga ngo ese ubwo akwigisha iki? Agatesha agaciro ibyo akwigisha.”

Karasira ni umuhanga cyane mu bya mudasobwa ari nabyo yigishaga dore ko afite impamyabumenyi y’icyiciro cya gatatu cya Kaminuza (Master’s) mu bijyanye na Software Engineering.

Ni umugabo utavugwaho rumwe kubera imyitwarire itangaje. Ni umuhanzi ari naho izina rye Prof Nigga arikomora ari naryo yagiye amenyakanaho cyane.

Uyu mugabo w’imyaka 43 yatangiye kuvugwa cyane ku mbuga nkoranyambaga mu myaka ibiri ishize, ubwo ibinyuzwa ku rubuga rwa Youtube byari bimaze gukomera. Yatangiye kugaragara avuga ku ngingo zitandukanye ndetse akenshi agatanga ibitekerezo bifatwa na bamwe nk’ibikakaye, binenga cyangwa bisebya Leta bitakabaye bitangwa n’umurezi muri Kaminuza nubwo avuga ko ari uburenganzira ahabwa n’amategeko.

Nk’umurezi, hari abatangiye kubigiraho impungenge, bagaragaza ko bidakwiriye nubwo yaba abyemererwa n’amategeko.

Kubera ibyo bitekerezo bye, hari abamubona nk’utavuga rumwe na Leta ndetse hari abatavuga rumwe na Leta baba mu mahanga bakunze kumushimagiza cyane iyo yatanze ibitekerezo, nubwo we yakunze kuvuga ko ntaho ahuriye nabo.

Imyitwarire ye kandi no hanze y’ishuri ikunze gukemangwa na bamwe nk’umurezi. Hari nk’amashusho amaze amezi make agiye hanze amugaragaza asinziriye ku meza ahacururizwa inzoga biboneka ko yaharaye. Umwe mu bahungu bari muri ayo mashusho yumvikana amubwira ngo “mwagiye munywa izo mushoboye’.

Karasira yari aherutse kubwira IGIHE ko afite impungenge ku myanzuro azafatirwa, gusa akavuga ko aramutse ategetswe guhitamo ubwisanzure bwo gukomeza gutanga ibitekerezo cyangwa kuguma muri Kaminuza akigisha, yahitamo kwigisha nubwo byamugora.

Ati “Urumva akazi kuko ariko gatunze umuntu yahitamo akazi ariko yaba abangamiwe.”

Karasira yavukiye mu Ntara y’Amajyepfo mu yahoze ari Butare mu 1977, mu mwaka wa 1980, umuryango we wimukiye mu Mujyi wa Kigali, yiga amashuri ye abanza ku ishuri ribanza rya EPA rihereye mu Gitega. Yakomereje muri Lycée de Kigali.

Yize muri Kaminuza Nkuru y’u Rwanda ayivamo mu 1998 afite impamyabumenyi y’icyiciro cya kabiri cya Kaminuza mu bumenyi n’Ikoranabuhanga. Icyiciro cya gatatu yagikomereje muri Suède.

Ibaruwa Kaminuza y'u Rwanda yandikiye Karasira imumenyesha ko yirukanywe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .