Iri shuri ry’Imyuga n’Ubumenyingiro rya Tare ryubatswe mu Kagari ka Gasarenda, Umurenge wa Tare, Akarere ka Nyamagabe, riri ku buso bwa metero kare 25.000, imirimo yo kuryubaka yarangiranye n’Ukwakira 2026, aho rikazafasha urubyiruko n’impunzi n’abaturiye inkambi ya Kigeme kubona ubumenyi bubafasha kwihangira imirimo no kwiteza imbere.

Imibare itangwa na MINEMA igaragaza ko rizakira abanyeshuri basaga 600 barimo impunzi zirenga 120 n’abaturage bo mu gace riherereyemo basaga 450. Aho nibura 60% rizakira bazaba ari abakobwa n’abagore, mu rwego rwo guteza imbere ihame ry’uburinganire no kongera uruhare rw’abagore mu burezi bw’imyuga n’ubumenyingiro.

Rizigisha imyuga itatu irimo ikoranabuhanga mu bijyanye n’ibiti (Wood Technology), ikoranabuhanga mu nganda no gukora ibikoresho (Manufacturing Technology) n’ikoranabuhanga ry’amashanyarazi (Electrical Technology).

Ryubatswe ku nkunga ya Banki y’Isi (World Bank), binyuze mu mushinga ugamije guteza imbere imibereho myiza n’ubukungu by’impunzi n’abaturage baturanye na zo, uzwi nka Socio-Economic Inclusion of Refugees and Host Communities (SEIRHC), Jya Mbere Project, ushyirwa mu bikorwa na Minisiteri ishinzwe Ibikorwa by’Ubutabazi (MINEMA), ku bufatanye n’Akarere ka Nyamagabe.

Ishuri rifite ibyumba by’amashuri 12, inyubako y’ubuyobozi, ahatangirwa amahugurwa ngiro, igikoni, aho abanyeshuri bafatira amafunguro, ubwiherero, ikibuga cy’imikino n’uruzitiro ruzengurutse ikigo.

Mbwiruwumva Anasthase uturiye iri shuri ati “Iri shuri twari tumaze igihe turisaba, rije rikenewe ngo rizadufashe gusaza neza dusize abakiri bato bize umwuga wo kubafasha kwiteza imbere.”

Ingabire Brigitte utuye muri aka Kagari ka Gasarenda ati “Twashimishijwe n’iri shuri, ryaje turyifuza kuko byasabaga ko imyuga bajya kuyiga kure, bikagora ababyeyi mu gutegera abana.”

Biteganyijwe ko iri shuri rizagira uruhare mu guhuza impunzi n’abaturage bazaturana na zo, binyuze mu burezi n’amahugurwa ahuriweho, bityo bikarushaho guteza imbere ubumwe, kubana mu mahoro no kwishyira hamwe mu bikorwa by’iterambere.

Umuyobozi w’Akarere ka Nyamagabe w’agateganyo, Samvura Valens mu kiganiro na IGIHE yavuze Ishuri rya Tare rije ari igisubizo ku mashyamba yiganje muri aka Karere.

Ati “Bakomeje kurisaba kenshi cyane, hari santere ya Gasarenda twenda no kuhashyira agakiriro, tuhafite urubyiruko rwinshi rurimo n’urw’impunzi mu gukemura ibibazo basanzwe bahura nabyo, bazigishwa amasomo y’ubumenyingiro yo kubafasha kwihangira imirimo. Tugira amshyamba menshi, dukeneye kugira urubyiruko rwinshi rufite ubumenyi ku bikomoka ku biti nk’ububaji, bige amasomo abafasha guhita babona uko bahanga akazi.”

Samvura avuga ko iri shuri bateganya ko mu myaka itaha bazaryagura bagashyiramo abanyeshuri biga bacumbitse, asaba ko abarihawe baryitabira, bakaribyaza umusaruro bakahavana ubumenyi buzabafasha mu buzima bwo hanze.

Mbere y’uko iri shuri ritangira kwakira abanyeshuri muri Nzeri 2027, mu gihe rizaba rimaze kwemererwa n’Urwego rw’Igihugu rushinzwe Ibizamini n’Ubugenzuzi bw’Amashuri (NESA). hateganyijwe gutangwa amahugurwa y’igihe gito mu myuga imwe n’imwe, bitewe n’uko bizaba byemejwe n’inzego zibifitiye ububasha ndetse n’imyiteguro y’ibikorwa ikaba yararangiye, aho rizafasha n’abatuye mu mirenge iryegereye irimo Kitabi, Kamegeri, Gasaka, Uwinkingi na Kibilizi.